እሳያሳ ማፃፋ16gof_etw
1ሞአበ አሳዉ፥ ባዞ ብያ ኦግያን ደእያ ሴላፐ ኡርገ ዶርሳታ እሞታ ኦድ፥ የሩሳላመን ደእያ ቢታ ሃረይሳስ የድተ።2ሞአበ ማጫሳይ ባንታ ኬፈ ጎደትዳ ካፎታዳ አርኖና ሻፋ ፕንያ በሳን ላለታና።3ሞአበ አሳይ ይሁዳ አሳኮ፥ “ኑና ዞርተ፤ ኑና ኑ ሞርከታፐ አሽተ፤ ሴታ ጋላሳን ም ኩያዳ ህንተ ኩያ ኑ ቦላ ኩያይተ። ጎደተይሳታ ቆስተ፤ ቆሰትዳይሳታ አድ እሞፕተ።4ሞአበፐ ጎደተይሳት ህንተ ግዶን ደኦ፤ ኤንታ ይሳናዉ ኮየይሳታፐ ቆሰትድ አትያ በሰ ግድተ። ኤንታ ኡንኤይሳት ዉርዶሶና፤ ኤንታ ዮይ አትስ፤ ኦቶራንቾት ቢታፈ ይዶሶና።5ሄሳፈ ጉየ፥ ሲቆን እስ ካዎተ አራታይ ኤቃና፤ ሄ አራታን፥ ዳዊታ ኮቻፈ እስ አማነትያ ካዎይ ኡታና። እ ሱረተ ኮያና፤ ፅሎተ ኦናዉ ኤለሳና” ያጋና።6ይሁዳ አሳይ፥ “ሞአበ አሳይ አይ መላ ኦቶርያኮ ኑ ኤንታ ኦቶሩዋ ስእዳ፤ ኤንታ ጬቁዋነ ኤንታ ጫሻ ስእዳ፤ ሽን ኤንታ ኦቶሮይ ሀዳ” ያጋና።7ሄሳ ግሾ፥ ሞአበይ ባዉ ዬኮ፤ አስ ኡባይካ ሞአበስ ዬኮ። ቅር-ሄሬሳን ህንተ ደእያ ዎደ ምዳ ሎኦ ካ ሀሳይሸ ዬክተ።8ሀሰቦና ጎሻይነ ሰባማ ዎይነ ጋደይ ይስ። ካዎተታ ሀላቃት የረዳ ታሸት መላ ቢታ ካንድ ያእዜራ ጋክዶሶና፤ ኤንታ አጫይ ዳይድ፥ አባ ፕንስ።9ታኒ ያእዜራ ካታማስ ዬክዳይሳዳ ሰባማ ካታማ ዎይነታስ ዬካይስ። ሀሰቦና ካታማስነ ኤልኣላ ካታማስ፥ ታኒ ታ አፉ ጉሳይስ። ህንተ ም አይፍያነ ህንተ ቦትዳ ካ ቦላ ኦል ደንድስ።10ጎሻ ጋድያፐ ኡፋይስነ ሀሹ ጉስ ኤከትስ። ዎይነ ጋድያን ማዝሙረይ የፀተና። ኡፋይሳን ዎይነ ጉምእያ በሳን ጉምእያ አስ ባዋ፤ ታኒ ጉምኤይሳታ እልልሳ ይሳስ።11ሄሳ ግሾ፥ ታ ዎዛናይ ሞአበስ፥ ታ ጋርሳ አሳተይካ ቅር-ሄሬሳስ ዬኬስ።12ሞአበይ ባ ዙማ ቦላ ከይኮካ፥ ባና ጮ ዳቡርሴስ፤ እ ዎሳናዉ ባ ኤቃ ኬ ገልኮካ ባና አይኮካ ማደና።13ጎዳይ ካሰትድ ሞአበባ ኦድዳ ቃላይ ሀይሳ።14ሽን ሀእ ጎዳይ፥ “ኡነ ኦሳንቾ ዎደይ ጉ ግደይሳ መላ ሞአበ ቦንቾይነ እያ ዳሮተይ ሄ ላይ ግዶን ዉራና። እያን አትያ አሳይ ፓናይሳታነ ዎልቅ ባይናይሳታ ግዳና” ያጌስ።