Xoossay Babiloone Seerana
1Amoxe na7ay, Isayaasi Goday Babilooneba qoncisin be7idaysi haysa.2Aykoy bayna deriya bolla malla essidi, hinte qaala dhoqu oothidi waassite; enti halaqata pengiyara gelana mela wuttite.3Taani hanqetidaysata seerana mela ta geeshshata kiittas; ta xoonoy ufaysiya ta wolqaamata xeegas.4Daro asay wocameysada deriya huuphiyan de7iya wocamaa si7ite! Qassi kawotethati issife shiiqidi palamiya palama si7ite! Ubbaafe Wolqaama Goday olanchota olas giigisis.5Godaynne iya hanqo ola miishey biitta ubbaa dhaysanaw haaho biittafe, salo gaxape yoosona.6Godaa gallasay matida gisho yeekite! He gallasay Ubbaafe Wolqaama Xoossaa matape dhaysanaw yaana.7Hessa gisho, yashshan enta kushey doccana; asa ubbaa wozanay til7ana.8Enti dagammana; iqethinne un7etethi enta oykana. Yelo keyida maccasada enti inxaxana. Enti dagammidi issoy issuwa xeellana; enta som7oy bido gidis.9Heko biitta baysa kessanawunne iyan de7iya nagaranchota dhaysanaw yiloninne suullida hanqon Godaa gallasay yaana.10Salo xoolintotinne xoolinto koceti banta poo7uwa diggana; doliya away dhumana; ageenayka ba poo7uwa immenna.11Goday, “Taani ha sa7aa iya iitatethaa gisho, iitataka enta nagara gisho seerana. Taani otoranchota otoruwa shaarana; iitata ceequwa kawushana.12Attidaysati walahi bayna worqafe al7o gidana; asa na7i Ofira worqafe aadhidi boncho gidana.13Hessa gisho, Ubbaafe Wolqaama Godaa hanquwan, iya hanquwa suulaa gallas, taani salota kokorsana; sa7aaka iya bessaafe qaathana” yaagees.14Shankafe baqatiya gaarada woyko heemmiya asi bayna dorsa wudeda asi ubbay ba asaako simmana; ubbay ba biitta baqatana.15Bentida oonika cadetana; oyketida oonika mashshan hayqana.16Enta guutha nayti enta sinthan busetana; enta keethay bonqetana; enta macheta hara asi iissana.17Bira koyonnanne worqan ufaytonna Meedona asaa taani enta bolla denthana.18Enta dongey na7atethata wodhana; yooga naytaka maarokona; enta ayfey naytas qadhetenna.19Kawotethatas boncho, ba asaas alleeqo gidida Babiloone biitta, Goday Sodoomedanne Gamoorada shiri yeggana.20He biittan asi uttenna; woyko yeletaape yeletaa gakanaw yan asi deenna. Arabe asay yan banta dunkaaniya tolokona; dorse heemmeysatika yan banta wudiya heemmokona.21Shin bazzo do7ati yan aqana; workanati enta keethaa kumana; guttoti yan daana; yanchoti yan keexana; bazzo deeshati yan gupana.22Enta keethatan godarey waassana; enta kawo gadhon workanati boccana. Iya wodey matis; iya gallasayka gam7enna.