'Utseyaxi8hch_wb2

'Eka xekeneuka'etsa meta haikɨri 'amɨpa xepɨka'itsana

1»Kuxineta keneutahɨtsiri 'inɨari mayanikɨ.Kwixɨ hepaɨ 'akanamieni mɨkɨ waneɨkixiwi Yawé teɨterimama wahetsɨa.Tɨratu ketemɨte'uwewi mɨkɨtsie yamepɨkatekakɨmeta ne'inɨari niukiyari mɨkɨ mepuku'eiri,2hikɨta mɨyamenetekɨhɨawe:“'Ixaheri Kakaɨyarieya tepɨmatsimate”.3Peru 'Ixaheri 'aixɨa mɨti'ane pɨkatinaki'erie,'ayumieme xewitɨ waneɨkixiwi pɨwaranukuweiya.4Yɨkɨmana mepɨwaranuka'uitɨwa te'aitamete ne yanekahainekaku,hipame 'itsɨkate mepɨwaranuka'uitɨwa nemɨkawamate.Pɨratakɨ meta hurukɨ yukakaɨyarixi memɨwatiwewiwapara mɨkɨkɨ memuyuka'unakɨ.5Tsamariya kiekatari tsikerukakaɨyariyari xemayexeiya xekeneuku'eiri.Xehetsiemieme ne nepuyeha'a.'Atsitake kepauka xeyu'itietɨ xemakɨne.6Neuxei keneu'ena 'Ixaheri: Mɨkɨ tsikeru Kakaɨyari pɨkahɨkɨ,mɨkɨ tewi pɨwewiyaya.Mɨkɨ tsikeru Tsamariya miemekanitatarariemɨkɨ.
7»'Eka xepuka'e,haikɨri 'amɨpa xepɨka'itsana.Tɨriku kɨyeyari yumɨayeyari pɨkahexeiyatɨriku pɨkatixuawere.Xɨka 'utixuawere,teewatari kɨkamete mepitikwani.8Metsɨ 'Ixaheri kananukaxɨwieni,hikɨri 'etsiwa xeikɨa nuiwarite mepɨmetsinaki'erie.9'Ixaheritsixi mekanekɨne 'Atsiriya paitɨ,mekaniuyupata puxuri yeutari memɨkaheu'enana wahepaɨ,meta 'Epɨrahini yutuxexerima katiniwayetuiriwakaitɨni.10Tsepa nuiwarite watsata naitsarie mɨwananene,ne mana neniwakuxeɨrimɨkɨ,'ana mekatenita'aitɨariekunixewitɨ ti'aitame waɨkawa mariwemekɨ katiniwata'aitɨamɨkɨ.
11»'Epɨrahini waɨkawa mawarite taiyame kaniutiwewieni,para 'axamɨti'anekɨ memɨteheuyehɨwiyariekakɨ,peru mɨkɨ mawarite taiyame'axamemɨteyuriekakɨ pɨta patɨa.12Ne nepeka'utɨawe ne'aitsika waɨkawamexɨa,peru mɨkɨ memɨka'imateni hepaɨ mepɨte'ixeiya.13Mepɨnetemawirie mawari taiyariyarikɨ meta 'imikierite, waiyari mekwatɨ,ne mɨkɨ pɨkanetsinake.Hikɨ ne ke'axamemɨteyurie naime nepɨkaratɨmaiya,ke'axamemɨte'uyurikɨ mɨkɨkɨ nepɨwaranutaxɨrieni,mekanakunuaxɨakuni 'Ekipitu.14'Ixaheri kemɨ'ane mitawewi patɨmai, meta yɨkɨmana paratsiyute puyutiwewiri,meta Kura kiekaritetsie waɨkawa kuraru 'amatitetewa kanawewietɨyani,peru ne wakiekarite 'aixɨa mɨreukunatɨkatsietai nepaukaxɨriexɨani mɨwatixɨtsitɨanikɨ».
expand_more
Search