1“Am ssgenfiɣ Israil, tᵉttwaɛarr řmuɛṣiyyet n Ifrayim d tuɛeffna n Samarya, maɣar nitni tteggen s řɣecc. Aceffar ittadef u ict n bandiyya tᵉttkeccaḍ di barra.2Maca war qqaren ɛemmarṣ deg wuř nsen, aqa Necc ad xarrṣeɣ di marra řɣar nsen. Xenni řexxu, nnḍent asen tmegga nsen, aqa atent zzat i wudem inu.3Nitni ssfraḥen ajeǧid s řɣar nsen u řḥukkam ssfraḥen ten s ixarriqen nsen.4Nitni marra d imzennayen, aqa aten am yijj n ufarran nni ittwasseḥman zeg uxebbaz. Wanita ad issbedd zeg ucemmuḍ awarni řami ggʷin arecti ař ismem qaɛ.5Deg wass n ujeǧid nneɣ ssheřcen řḥukkam ixef nsen s řḥaduq n binu. Netta isswiẓẓeḍ afus nnes i yimestehzayen.6Xmi dd-ttqarraben, yareqq uř nsen am yijj n ufarran zi tḥraymect nsen. Itteṭṭeṣ uxebbaz nsen ǧiřet tekmeř. Ɣar ṣṣbeḥ yareqq ufarran am tmessi itteḥduduqen.7Nitni marra ḥemman am yijj n ufarran u nitni ttᵉtten řquḍat nsen. Marra ijeǧiden nsen ad wḍan, war din uřa d ijj jar asen i dd xafi ɣa iřaɣan.”8“Ifrayim ijja ixef nnes issur jar řegnus, Ifrayim d ict n tefḍiřt war tᵉttwassneqřeb ca.9Ibarraniyyen sarḍen jjehd nnes, war akides ittici. Uřa d acuwwaf nnes ittcab, war akides ittici.10Aɛeffar n Israil ad xas idɛa, maɣar nitni war ddikkwiřen ca ɣar SIDI, AREBBI nsen, u war t arzun ca di marra man aya.11Ifrayim igga am yict n tedbirt aḥafi, war dayes řefhamet. Nitni ttřaɣan x Miṣra, gguren ɣar Accur.12Xmi gguren nitni, ttbezzaɛeɣ Necc tracca inu xasen, ad ten dd-ssehwiɣ am yijḍaḍ n ujenna, ad ten webbxeɣ x řeḥsab n řexbar zi jjhet n tmesmunt nsen.13Uct xasen maɣar nitni arewřen zzayi. Akeḥḥeḍ xasen, maɣar nitni ɛeddan xafi. Necc ggiɣ ad ten fdiɣ, maca nitni nnan xafi ixarriqen.14Nitni war dd-sɣuyen ca ɣari s wuř nsen, xmi ṭṭṣen nitni x řectu nsen ttcetcan. Nitni ttmunan di ṭṭweɛ n imendi d binu n jdid, aqa ttɣennan xafi.15Necc darrbeɣ u ssjehdeɣ iɣaǧen nsen, maca nitni ttxarraṣen dayi di řɣar.16Nitni ttɛaqqaben, maca war iǧi ɣar Umɛuǧi x kuřci. Aqa aten am yijj n řqews ixeṭṭan, řḥukkam nsen weṭṭan zi ssif, zi semm ineqqen n yiřes nsen. S uyenni ad xasen ggen tiḍeḥḥac di temmurt n Miṣra.”