'Utseyaxi5hch_wb2

'Ixaheritsixi kememɨtekwinitɨarieni

1»'Ikɨ niuki xekeneu'eni xeme mawari wewiwamete.Xekeneu'enana 'ixaheritsixi.Xekene'enanaka ti'aitame nuiwarimama.Xehetsie pɨmieme kexemɨte'anutaxɨriyani.Mitsipa kiekariyaritsie xeme xekateni'irɨwiyarieka,Tawuxi hɨriyaritsie winiyari 'amɨtewi xekaniutawieka.2Tsitihini mɨrakutewatsie putsu muwatixawa xekaniutawewieni.'Ayumieme ne netinixekwinitɨaka 'aixɨa nexeyurietɨ.3Ne 'Epɨrahini nekanimateni,meta 'Ixaheri nepɨkahatɨmaiyawe.Peru 'Epɨrahini tuminikɨ kaniyumayɨinɨaka,meta 'ixaheritsixi meka'itiyatɨ mepayuyeitɨwa.
4»'Axakememɨteyurie pɨkawapitɨaKakaɨyari hetsɨa memɨ'axɨani,mepɨkayumaiwawe 'axamemɨteyuriekɨ hipame wa'ɨitama memɨwakumaɨwakɨmepɨkayɨwawe Yawé memetimanikɨ.5'Ixaheri 'uyuta'ɨretɨ 'uxa'atɨniwarie yuhetsie pɨrahɨani.'Ixaheri meta 'Epɨrahini ke'axamemɨte'uyuri yukɨmana mepekaxɨrieni,Kura meta wahamatɨa kanekawemɨkɨ.6Yumuxatsima meta yuwakaitsixi metewara'arietɨ,Yawé mekanitiwaukuni,peru mepɨka'itaxeiyamɨkɨ mɨwaruku'eirikɨ.7Yawé xekaniuku'eirieni,yumɨiretɨ tɨɨri mekaniutinunuiwa hipame waniwema.Hikɨ 'ayumieme xekanika'unariekuni meta naitɨ xekwie.
8»Kuxineta xekenetahɨtsi Kiweya kiekariyaritsie,Xamatsie paitɨ 'awa kehetahɨtsieni,Weti-'Aweni meta xekenetihiwa xemɨyutakwinikɨ, mɨpaɨ mete'uhiwatɨ:“Wenikamini, kene'a'ɨwiyani 'awarita”.9Kepauka memɨtekwinitɨarieni,'Epɨrahini yuxaɨta puyuhayewa.'Ixaheri nuiwaritemama watsatayanepɨtiwatahɨawe kemɨtiwayurieni.10'Itsɨkate te'aitamete Kura kwieyaritsie miemetekwie memɨnawatɨwe wahepaɨ mepɨ'anene.Wahetsie nehaxɨa nepɨtatuanihaa nemɨwayenetɨani hepaɨ.11'Epɨrahini 'axapɨtixeiyarie,memeye'unie xeikɨa mepitsaipɨna,memɨkayuri kakaɨyarixi mɨwaruweiyakɨ.12'Epɨrahini tepaxi wahepaɨ nekaniwakwimɨkɨ,kɨye mɨkɨmie Kura teɨterimama mepɨhɨkɨtɨni.
13»Kepauka 'Epɨrahini yukwiniya muxei,Kura katinetimani haiyayatsie,'Epɨrahini kaneyani 'Atsiriyatsiemana parewiya kaniutawauni ti'aitame mɨmariwe hetsɨa.Peru ti'aitame mana kiekame pɨkayɨwekai menayehɨanikɨ,meta haiyaya mu'uayemani.14Ne maye nepayani 'Epɨrahini hetsiemieme,maye nunutsita Kura hetsiemieme.Ne nekɨmana nekaniwatitsanamɨkɨ,meta nekaniyemieni,nemiwiyaxɨ ne'atɨtɨ,nixewitɨ pɨkayɨweni mɨnetsi'unawairieni.15'Ana nepakunuani nemɨra'aitatsie,kepaukake mɨpaɨ memɨtehetimani kename 'axamete'uyuri.Mepitiwauni kehepaɨ meyɨakaku nemɨwatanaki'erieni,me'u'uxetɨ mepɨnetsitiwauni meyuwaɨriyatɨ».
expand_more
Search