'Utseyaxi4hch_wb2

'Ixaheritsixi kememɨte'ayuye'unie

1Xekeneu'enana 'ixaheritsixi,Yawé niukieya xekeneu'eni,'ari Yawé yuxanetsika kanitsutɨamɨkɨmɨkɨ mana kiekatari wahetsie:«Neteɨterima wahetsie pumawe 'aixɨa mɨti'ane meta naki'eriya mepɨkahexeiya,meta Kakaɨyari mepɨkamate.2Matsi mepɨtexuaweriya 'axamɨti'ane meta 'itarika.Waɨkawa mepɨtenawatɨwe, hipame wahamatɨa mepɨhitɨwe, mepɨteyumemiwa.Xewitɨ xɨka tiuyumieni mɨkɨta xewitɨ pimieni.3Hikɨ 'ayumieme kwiepa pukuwani pɨkatitixuawere,'anari yunaitɨ mepukwini teɨteri.Yunaitɨ mepɨtekwini yeuta memɨte'u'uwa,memɨte'awɨwawe meta haramaratsie memɨteye'uwa.
4»Xewitɨ yu'iwa pɨkaxanetani meta pɨka'itate'ani.'Ateɨterima mawari wewiwame meputate'a.5Tukarikɨ tɨkarikɨ mepetiketamɨrike,Kakaɨyari niukametemama yaxeikɨata 'ahamatɨa mepekaxɨrɨwe,'amaamari pɨka'uyeikani,6neteɨterima mepuka'unarie'atsimekatehetimaika mepɨkwixime.»Metsɨ pepɨka'itanaki'eri tita yuri mɨraine,neta nepɨkametsinaki'erie mawari wewiwame pemɨhɨkɨtɨni.Kakaɨyari niukieya pematɨmaiyaxɨkɨ,netatsiere 'aniwema nekaniwaratɨmaiyamɨkɨ.7Kepauka mawari wewiwamete memɨyutimɨirixɨ,matsi waɨkawa 'axamepɨteyuriekai nehetsɨa,kemɨtimariwekai mekanipatamepɨtewinɨarieni yuhetsiemieme.8Mɨkɨ teɨteri 'axamɨti'ane mawariyari mawari wewiwamete pɨtiwa'ikwai,'ayumieme mawari wewiwamete mepɨyutemamawie teɨteri 'axamemɨteyuriekɨ.9Mawari wewiwamete meta teɨteri yaxeikɨa mepɨ'anene.'Ayumieme yanepɨtiwatawawirieni kememɨte'u'uximayataxɨmeta yuxexuime yanepɨtiwapitɨani kememɨte'uyuriexɨa.
10»Tsepa memɨte'utikwa'a peru mepauhakakwikuni,tsepa tɨɨri yuwaɨkawa memɨwarayexeiyaku, peru hatsuaku mepɨkawarayexeiya,Yawé memuku'eirikɨpara memɨyuyetuanikɨ,11hipame 'ukarawetsixi wahamatɨa me'ietɨwetɨ,kaxie winuyari pɨwareuyexɨrɨwa wa'eriwametsie.12Neteɨterima kɨye kakaɨyariyari xeikɨa mepayexeiya,mɨkɨ kuta kɨye tiwaku'eiya,mepɨkayumaiwawe hipame 'ukarawetsixi wahamatɨa mehitɨwetɨ xeikɨa mepauyexɨrie,yukakaɨyari mepuku'eiri mɨyameyɨatɨ.13Hɨrite 'amutitɨtɨtsie meta yemuritetsiemana mawari taiyariyari mepɨtiwewiwa meta 'imikieri,tuaxa kɨyeyaritɨa meta haramu meta xiutɨa.'Ayumieme waniwema tuminikɨ memuyuwitɨnɨa mepɨhɨkɨmeta wamu'e'ema hipame mepɨwakumaɨwa.14Peru nepɨkawaranutaxɨrienihipame yumɨireme wahamatɨa memɨhitɨwekɨ,wakɨnamata tuminikɨmemuyuwitɨnɨa wahamatɨa memukahipitekɨ,metatsiere 'ukitsi 'ukari mawari wewiwamete tukita wahamatɨa 'ixɨarari mepɨwewie.'Ayumieme 'ikɨ teɨteri mɨpaɨ mepɨteka'unarienimemɨka'u'enanakɨ.
15»Xɨka 'ekɨ, 'Ixaheri, mɨpaɨ peyɨaneni,Kura hetsie pepɨkarahɨpani.»Kirikari xepɨkaheuhuni Weti-'Aweni tukita xepɨkaheutahakeni,mɨpaɨ xepɨkahaitɨkani xeyɨhɨritɨatɨ: “Yawé 'apuyeika”.16'Ixaheri tsikeru mɨma hepaɨ pɨ'ane.Ketsɨ Yawé tiwaru'ɨwiyayeuta 'a'uyeukaku, muxatsi wahepaɨ pɨka'ane.17'Epɨrahini memɨkayuri kakaɨyarixi pɨwarutinɨi,tsepatsɨ wahamatɨa mɨtiuyuhayewaxɨ.18Kepaukari winu memɨkahexeiya,hipame wahamatɨa mepukahipite,metatsiere te'aitamete pɨwanake 'axamɨti'ane.19'Ayumieme haikɨri mɨtɨrɨkaɨye pɨwataxɨriexɨani,mepɨyutitetewiya hipame kakaɨyarixi memɨwarayexeiyakaikɨ.
expand_more
Search