1ኦዝያን፥ እዮአታም፥ አካዝነ ህዝቅያስ ካል ካል ይሁዳን ካዎትዳ ዎደ ቃስ ዮኣሳ ናአይ እዮርባም እስራኤለን ካዎትዳ ዎደ ብኤራ ናኣ ሆሰኮ ይዳ ጎዳ ቃላይ ሀይሳ።
ሆሰ ማችዉነ እያ ናይታ
2ጎዳይ ኮይሮ ሆሰ ባጋራ ኦድዳ ዎደ “ታ አሳይ ታፐ ሃክድ ኢታ ላይማተ ኦዳ ግሾ፥ ኔኒ ባዳ፥ ላይማ ማጫስ ኤካዳ ላይማ ናይታ ኢፐ የላ” ያግስ።3ሄሳ ግሾ፥ ሆሰይ ብድ፥ ድብላይማ ናእዉ ጎመሮ ኤክን፥ እያ ቃንታዳ አደ ናአ የላሱ።4ያትን፥ ጎዳይ ሆሰኮ ነ ናአ ሱን፥ “እዝራኤለ” (ላላና ዎይኮ ዘራና) ያጋዳ ሱን። አይስ ጊኮ፥ እዝራኤለን ጉክዳ ሱ ግሾ ታኒ እዩ ኮቻ ቃን ዎደን ፕርዳና፤ እስራኤለ ካዎተካ ይሳና።5ሄ ጋላስ ታኒ እዝራኤላ ዛንጋራን እስራኤለ ኦላንቾታ መንረና።6ጎመራ ናምአን ቃንታዳ፥ ማጫ ናአ የላሱ። ያትን፥ ጎዳይ ሆሰኮ፥ “እ ሱን ሎሩሃማ (ማሮተ ደሞናሮ) ያጋዳ ሱን። አይስ ጊኮ፥ ህዛፐ ጉየ ታኒ እስራኤለ አሳስ ቃትከ፤ ኤንታዉ አቶ ጊከ።7ሽን ታኒ ይሁዳ አሳስ ቃታና፤ ታኒ ኤንታ ዶንገን ዎይኮ ማሻን ዎይኮ ኦላን ዎይኮ ፓራታን ዎይኮ ፓራ አሳታን ግዶናሽን፥ ታኒ ጎዳይ፥ ኤንታ ፆሳይ፥ ታ ዎልቃን ኤንታ አሻና” ያግስ።8ጎመራ ሎሩሃሞ ን ዱዳፐ ጉየ ቃንታዳ ሀራ አደ ናአ የላሱ።9ያትን፥ ጎዳይ ሆሰኮ፥ “እያ ሱን ሎኣማ (ታ አሰ ግደና) ያጋዳ ሱን። አይስ ጊኮ፥ ህንተ ታ አሰ ግደከታ፤ ታካ ህንተ ፆሰ ግድከ።10“ግዶሽን፥ እስራኤለ አሳይ ማካናዉነ ታይባናዉ ዳንዳኤቶና አባ ሻፍያ መላ ግዳና። ኤንቲ፥ ‘ህንተ ታ አሰ ግደከታ’ ጌተትድ ፄገትዳ በሳን ህንተ ‘ደኦ ፆሳ ናይታ’ ጌተታና።11ይሁዳ አሳይነ እስራኤለ አሳይ እስፈ ሺቅድ ባንታዉ እስ ሀላቃ ዶርድ ድኤትዳ ቢታፈ ስማናነ እንጀትድ ዳና። ሄ ጋላሳይ እዝራኤለስ ግታ ጋላስ ግዳና።