Sinang una nining ilo bala Rum Tarawen Tikin gii lo nal
1War a-uu baba tikii, e mel e fam fafanau tinglo una ninining ma e mel e felu una nining, ri feti wagii lo nal,2ri bilseni lo sel ma e u e rum lo.3Ma una miu e laplap baba e u, e mel e neng e sun ruw ming ri fotngi ini “Rum Tarawen Tikin.”4Ulo bala e mel e altar ri gow lo gol una tataiif lo insens, ma ming e mel e bokiis una tatafu e war a-uu ke Deo, ri gow lo kalut ma ri kam afti ine gol.5Ulo poktow e ampilmatu e bokiis a, gii Deo ka sagisu tengis re tongge ma ka sangsangintafngi e fan tubiil keri, ri tafu e un anggelo ulo. Un anggelo a ru fafanas ine finaswen ke Deo ma fam papa-u ru e afti kiruur e ampilmatu bokiis a. Sakle kiar tibi fasi una seseng ine fan mok a gii.6Biing ri sau fagateni e mara mok kabuk la ngo aregii, fam pris ri kaukau ulo bala rum baba tikii una la gowgow e fam faim keri.7Ma sakle paklure fam pris tibom e kaukaulek ilo bala Rum Tarawen Tikin, lo e su tikii biing ilo bala tikii matamfaim. I e sagisu fafafen ine dadak are finafen use fan tubiil kia tibom ma use fan tubiil kere fan Juda, ri sam gow ma ri ka tibi ten usi.8Tangwa Riis e fanangsi ini sal una kaulek ilo bala Rum Tarawen Tikin e tifik ipiik, lo biing felun nining baba tikii e titi uwa.9Mok gii e ta fafanas lo biing geinggii, e fanangsi ini finafen ma fan finafen na ongker gii ri ka fafen ini, e tibi fasi una gau re tongge ri ku riis tikin, iya ri ku ten ini ri tifing kalkaliis.10Fan mok gii e su ta fan mok lo tuan ma in, ma lo sinang una gau re tongge ri ku puek ri ku kalkaliis. Ri su war ine fan mok tinglo pinumfong kaltu. Deo e tow e fam fafanau a usi ini tongge riu usi ku la muut lo biing fan mara mok fuu eu puek.
Andaku e Kristus e gow e war a-uu fuu ka tangen
11Biing Kristus e puek are paklure fam pris lo konona fan mara mok gii kabuk puek, i e la kaulek ulo bala felun nining ilo balambat, felun nining a e bakir iyat ma e kulfi tikin e felun nining tinglo nal. E tibi ta ini tongge ri bilseni e fel a, ma e ten ini e tibi ta ini ti su lo fan mok ting wagii lo nal.12I e tibi kaulek ulo bala Rum Tarawen Tikin, lo ti dadakun sipsip tam ti dakum buuluumakau, i e su fatikii kaulek ulo bala Rum Tarawen Tikin ine andaku tibom una kepfamil kiar, ma i e mu tibi gow mil.13Dadakun sipsip ma buuluumakau tamat ma pi-iif lo buuluumakau fefin, riu tipeni talo re tongge ri tibi kalkaliis una fatarawennge ri, ri ku kalkaliis ususi e ninis tinglo fafanau.14Sakle andaku e Kristus e kulfi e dadaku re fan talaman gii. Kristus e tek ti boron tubiil kia. Ma lo rawas ke Tangwa Riis, i e fafen kiruurngeni tife Deo. I e fakalkaliisnge kiar, usi ini kiar u ten ini kiar sam kalkaliis tikin kosnge fan sinang a ku tatfe kiar wilo minet, usi ini kiar u ususi e Deo.15Anwarow lo sangsang gii, Kristus e ta kaltu falifu ine war a-uu fuu usi ini le seri a Deo ka tau iri, riu kepe e warfakausi bingne bingne lewa Deo kabuk limlim ini tifri, le Kristus e sau met are fimfiil una kep familri tinglo fan tubiil ri sam gow ilo pikliu e war a-uu baba tikii.16Le ku mel e ti war a-uu ke tikas una efe lo fan mok kia wimi ini i e sau met, e samusu mel ming e ti fafanas una fanangsi ini kaltu gii ka fapueku e war a-uu gii e sau met.17Anwarow war a-uu a eu tangen le kaltu gii ku met. Le kaltu a ka gow e war a-uu a ku liuliu iwa, war a-uu a eu tibi tangen.18Ilea, war a-uu baba tikii e sam tangen tikin lo dadaku re fan talaman.19Biing Moses e sam sesngeni e fan mara fatungen tinglo fam fafanau tifre tongge nano, i e kepe e antelen isop ri kawi ine ololon sipsip buuluum, dadaku re fam buuluumakau fuu ri iksi tura dan, ma ka sapsi e buk tiim tura re tongge nano,20ma ka war, “Igii e dadak lo war a-uu gii Deo kabuk tungen gam una usi.”21Ilo tikii sal, i e sapsi ming e felun nining baba tikii tiim tura mara mok gii ri ka sagisu musmus ini, lo fam biing na nining.22E tikin, ususi e fafanau, e par areini fatat ma mara mok ku kalkaliis singe dadak. Anwarow, le enggi tek tikas enggi met ma dadaku ek lingiuf, enggi tek ti sangintafngi e fan tubiil.23E kausi ini riu fakalkaliisngeni e fam fafanas lo fan mok tinglo balambat ine fam finafen na ongker gii, sakle una gow a fan mok tikin ilo balambat ku kalkaliis, ri samusu gow e konona fam finafen na ongker sekit e kulfi e fam finafen gii.24Anwarow Kristus e tibi kaulek ulo ti felun nining kaltu e bilseni ka su ta fafanas lo neng e tikin. I e kaulek ulo balambat tiktikin ma gii i e ti na mata e Deo naforer.25Tam, i e tibi kaulek ulo balambat una la fafen sok mil ini, aregii paklure fam pris ka kaukaulek ilo bala Rum Tarawen Tikin, lo mara matmatamfaim tura dadak gii ka tibi ta ini daku tibom.26Le enggi ngo aiya, Kristus enggi sam kepe e ongker lo fam biing fuunfuun, tofnge tinglo biing Deo e lamlames makrau ine nal. Sakle gii i e sau fatikii puek use re tongge nano, lo biing gii ka fatfatat lo biing muut, una tii ine fan tubiil, tikin lo finafen una fafen ini tibom.27E su ngo are kaltu, Deo e sau fagati ini eu su fatikii met ma wimi i ku ti ilo anganggon.28Lo tikii sal, Kristus ming e su fatikii fafen ini una kepufu e fan tubiil kere tongge fuunfuun,