1Ye uni ago di adina bi yomini: una bi Sei ma amiye utari naivo amiye tora mina kana nufa, kaere bi oma Odoro iniyeri amiye di ourefeidena amena fata vana rama eta rofu ameinu reyo.2Ma ina bi sana kikifari naivo redo amiye; mina bi diya amiye yaku akuyo, idu Varika amiye yaku akuyo karaga rama mini.3Adina Sei ma amiye utari naivo amiye tora tora neinei beika baika masi ori sisika regi omaro; ye makai mina amiye ka beika baika ori sisika reyaine bi buni.4Kamini gua konori amego vonisi, bi Sei ma amiye utari naivo amiye de amego, adina bi ago gira dada, beika baika madedi Sei ma amiye utari naivo vene amededi.5Ina vene yaku oma di beika baika di vima kana naivo rededi. Adina Moses yaku karaga akugi kora reyori, Sei ina rofu ago gira masi niyo, “Omuna odorori gokai ya nirorotari resi oteimaro kana, mina idari beika baika tau noibanu ri.”6Idu gua, Keriso yaku naivo rena burefe moiyo, kori kana de. Ma mina uka ago ruaka di utari naivo amiye kana maro ka bi burefe, kori kana de, nitore rena ago buni vayavaya dudu maro dada.7Adina mina ouresi uka ago di no yokoi de vonisi, bi yokoisa maina de reyagadu.8Ini adina Sei yaku ini no veitao regasa yomakai niyo:“Aiyo, Varika amiye yaku nido, uka ago ruakaIsrael vene ma Judah vene rofu magida meda baegedi.9Varika amiye yomakai niyo: Mina bi Egypt gaganiri, ini aufakai vanau moi yakusiuka ago maraka meda kana de.Adina nai uka ago toga usi de reyadi,ye ina vene rofu nai mokena moi tae riyaka.10Varika amiye yaku yomakai niyo: Adina gabi mirona medaribi uka ago Israel vene magida mini:Na yaku nai ago gira ini mokenari aesiini uka fafau bura resiini Sei nigidama nai vene nigedi.11Kamini ina yokoi yokoi yaku ini atafu amedo amiyema ini usika ourena rofu nisi‘Varika amiye diba ni’ oteimana de regedi,adina tora ma keika vene noibanubi na diba nigedi.12Ini adina ini mokena rorobo de rena fafau iriyeduka resiini vegu no toga de mokebigida.”13Uka ago ruaka magasa ourena uka ago moi kori riyo. Kamini beika baika kori nisi no niyo atafuri bi tovo nigo.