1Zab gethek è nyie yao pha jine ji ro chiih-è hanyie yi hamangkhung hà Hamangkhung-aphuii ro so pha biang ro phazoi shii dug pha ji pha Kho Phabi um ro.2Ai ne Bajo So ithua Kho Phabi duiine blia rek, ji ne, haliig sbhang nyie yi tharothamang wad è asi pha Ithong è ruii pha ji ro.3Zab kho phabi shii ne Hamangkhung-aphuii shii miiram zid phi pha chiih-è mizidthek phi pho ro chiih-è gethek ro Kho Phabi shii mizid pha ne nyie um chid.4Ai ne sohnyiak hà um arone ai ne phabi arey, nyieliieshii Jewish ro Iphey shii chid pha lasen phi pha ne phabithek um jong.5Phabithek duiine ithek è rek pha blia ne nui bie pha chiih-è hamangkhung hà nyie um pha ragia ji ro. Hì ne Moses rog shii um pha duiine ò ro. Ai è Shiinyie Haliig rab shii, Hamangkhung-aphuii è aishii yao, “Na è phiing shii nyie doh pha ji duiine zab rab bo.”6Jishii thuh, Hamangkhung-aphuii nane awairo bran shii shiinyie shii khriig wie rab pha duiine Isu shii phi pha phabi blia ne ithek è de boh ba ro, nyieliieshii hìne wie manathek pha sbangthek duiine rab ro.7Ibi pha shiinyie rog shii ichiig oi arone jihà ne din pha ji arab chid phro.8Jishii ai è yao shii, Hamangkhung-aphuii è ai bran rog shii ichiig doh,“Ithong è yao, gu è Israel pha bran rog nane Judah pha bran rog shii iwo shiinyie rab pha,inaithek ne thog sharuii ro.9Hì ne gu è ithek shii wad è noh ne ithek shii Egyph hà fuang noh pha inai shii gu è ithek ro blangthek shii rab phashiinyie duiine asi phro.Ithek gu è ithek shii shiinyie shii migi arek ro,chiih-è ji è gu ithek shii agayiig ro.10Thuh, Ithong è yao, inai thog ruii shii Israel pha bran rog shiigu è rab pha shiinyie ne hì ro:Gu ne gui ro iphey ithek khani shii chab phichiih-è ithek lubuthek shii zey phi pha ro.Gu ne ithek ro Hamangkhung-aphuii rey,chiih-è ithek ne gu bran rey ruii phro.11‘Ithong shii ìd bo ne’ Hanyie jia de awaithek iijiiak shii ayua sha phroawaithek ro hadung-haluiipho shii ayao sha phro,Chiih-è ìu de zabèboh de ithek ne zab gu shii thieg ruii phro.12Gu ne ithek ro layog shii khung phichiih-è awie pha ji shii khuchung de anow ruii phro.”13Shiinyie iwo ji è yao srane, Hamangkhung-aphuii è rab, igobi pha jine ihèg rab; chiih-è nyie ihèg rey srane ùb ne sand dun phro.