1Melkisedek yeem, a nikee buuraŋ Salem, a nammba nik seeƴkiɗohiŋ Kooh, yi ŋ ɗafka ɗafka. Wa Ibrahiima laɓ buur ca po a gurdeeɗa, a yi Melkisedek, a yi kee coha na ɗe, a yi barke'iɗ Ibrahiima ŋ cohaam.2Ɓaatta nga, Ibrahiima ɓayya ŋ in ca a naafee ŋ buur ca, a eɗta ɗe ndaŋkiyaah nu nik winooriŋ wa. Tiikiŋ Melkisedek, wa tokis buuri na tiindɗe waas. Te a nikee buuriŋ Salem, wa tokis buur jam.3Melkisedek nak ɓoo inhiɗɗi ɗe baab, ɓoo inhiɗɗi ɗe yaay wala caac. Te wa raakɗi ɗiski rimuukiŋ ɗe wala kakaan kiŋ ɗe fiisu. A mand na Yeesu Kuɓkiŋ Kooh, a seeƴkiɗoh po faw.4Markaat findi a yakoh, caaciŋ ɓoo Ibrahiima sah eɗiɗ ɗe ŋ in ca a kooɗohee ŋ hiñohaŋ ɗe na buur ca, ndaŋkiyaah nu nik winooriŋ wa.5Te waasiŋMusaa, wa nak ɓi ɓaah ŋ cuuɓiŋ Lewi, ɓi nikee seeƴkiɗoh ci, ne ɓeɗ rahsan ŋ ɓaah ciŋ ɓa Israayel ci, ngaŋ ini ɓa na raake, ndaŋkiyaah nu nik winooriŋ wa. Moona ɓa jen ɓa rimkoh ŋ Ibrahiima.6Waaye Melkisedek nak, ali a rimkohɗi nga ɓa, a rahsiɗ ineem ngaŋ Ibrahiima. Melkisedek barke'iɗta ɗe, te kat, Ibrahiima a yi nikee ɓoyi Kooh gape.7Wa raakɗi laam-laam, yi uup yak, a yi na barke'ɗe yi uup ƴin.8Seeƴkiɗoh ci rimkoh ŋ Lewi, ɓi na waɗse ndaŋkiyaah nu nik winooriŋ wa ngaŋ in ci ɓooɓi raak, mbeh na haye ɓa kaan, waaye Melkisedek nak, rahsiɗ waɗeem findiiɓa, te Fiis ci seede'iɗ ne a pesoh.9E ɓi ɓaah ngaŋ Lewi ɓeɗ na eɗse waɗeem, moona deey ɓo' miniɗ woo ne Lewi sah eɗiɗ Melkisedek waɗeem taamboh ŋ Ibrahiima.10A yi Lewi, raak ɗe rimuuɗi ndoom, a nikee ŋ ñif miŋ caac ɓa Ibrahiima, wa Melkisedek kaɗ coha na Ibrahiima.11Nikee ne pangkiŋ seeƴkiɗoh ciŋ cuuɓiŋ Lewi, wi waasiŋ Israayel ci gaƴkoh, mineen tum po ɓo' mit ɗah, mbaa wa heeɗi etohisse Seeƴkiɗoh wiiriis "findi Melkisedek", yi ɓaahɗi ŋ ɓi rimkoh ŋ Aaruna.12Kooh ɓoƴsoh findi seeƴkiɗoh ci na kooɗohse ɗah, e waasi ɓoƴsohu.13Laam, ɓoyi Fiis ci na woye ndii, a puloh ŋ cuuɓ wiiriis wi ɓaahɗi na wiŋ Lewi, te cuuɓeem, ali ɓo' moosɗi panguk nga findi seeƴkiɗoh.14Ɓooɓi jen inhiɗ ne Heɗ ɓoo Yeesu rimuk ŋ cuuɓiŋ Yudaa. Te Musaa, wi a na woye ŋ ini kaɗ ŋ seeƴkiɗoh ci, a wooɗi ali in ŋ cuuɓeem.15Wa ɓaatiɗ leer wi Seeƴkiɗoh wiiriis tufkiɗu, te findi Melkisedek,16a tumuuɗi seeƴkiɗoh ŋ nakohi kaɗ ŋ yi rimkoh ŋ cuuɓii wala ŋ cuuɓii, waaye a tumuuɗa ŋ doolndiŋ kipes ki minɗi reehɗu.17Laam Fiis ci woyiɗ inii nga ɗe :« Fu tufkiɗuuɗ Seeƴkiɗoh po faw,Seeƴkiɗoh findi Melkisedek. »18Ŋ ɓak, nakoha maañɗa nihsuuɗ sagu raakaaɗiikiŋ wa hatil na njiriñ,19laam waasiŋ Musaa moosɗi mitiɗ ali in ; ŋ ɓak wiiriis, Kooh oniɗ ɓoo ini uupa, wi ɓoo min ooluk ne ɓoo taamboh nga, ɓoo reɓ ɗe.20Ɓaatta nga, ineem nikɗi in ƴin ; wa hunee na giñ ! Seeƴkiɗoh ci ɓinooɓi tufkiɗasseesa ɗah, wa na huneeɗi na giñ,21waaye wi ɓoyi Fiis cii na woye tufkiɗasse, Kooh giñ giñ ɗiski Fiis ci woo ne :« Heɗi giñiɗ te a dokkanɗi finho nga,fu tufkiɗuuɗ Seeƴkiɗoh po faw. »22E giñi tah po yi deguk ambtiɗohi uup baah, e Yeesu.23Te wa raakissiɗ in wiiriis : Weɗ ne seeƴkiɗoh ci ɓinooɓi laayiɗ sagu kakaan ki ; gomal nu gomal, yaa nu kaannda ɗah, morom ce namsiɗ ɗe, ineem weɗ hondoh ɓa nik seeƴkiɗoh po faw.24Waaye Yeesu, kipes kiŋ ɗe heyɗi reehe, weɗ tah a Seeƴkiɗohi moosanɗi namsiɗu.25Ineem weɗ tah a namiɗ min muciɗ muc mitiɗ ɓi taamboh nga ɗe ne ɓa reɓ ngaŋ Kooh. Laam, a pesan pes po faw ne a ngelɗee ɓa.
Yeesu a yi Seeƴkiɗohiŋ Ambtiɗohi Asi
26Seeƴkiɗoh yakak mand ɗaa, a yi ɓoo etohee keeh-keeh, a hooliɗ, a raakɗi bakaaɗ, a raakɗi usuɓ, a saɓsohuuɗ na bakaaɗoh ci te Kooh meeɓiɗ ɗe po ŋ ɗafuk Eel ca.27A mandɗi na seeƴkiɗoh ci yakak ci ɓinooɓi ne mbeh nu nik, ɓa joyiɗ seeƴuk sagu bakaaɗ ciŋ ɓa haf ɓa, po ƴut, ɓa seeƴkis sagu caŋ ɓooɓa. Yeesu seeƴkiɗ waas yino po faw wi a eɗoh haf ce ne a hooliɗ bakaaɗ ci.28Seeƴkiɗoh ci yakak ci waasiŋ Musaa tufkiɗee, ɓa nikee seeƴkiɗoh mitaaɗi, waaye Seeƴkiɗohi yakki Kooh tufkiɗ na giñ, wi waasi eɗohu po ƴutta, e Kuɓkiŋ ɗe, te Kuɓkeem, a mitɗiɗ ɗe po faw.