ካህንያ ማልከፃደቃ
1ማልከፃደቀይ፥ ሳሌማ ካዎይ፥ ኡባፈ ቦላ ፆሳ ካህነ። ሄ ማልከፃደቅ አብራሃመይ ካዎታ ኦል ፆንድ ስምሽን እያራ ጋሄትድ እያ አንጅስ።2አብራሃመይ ባ ድእዳባ ኡባፈ እያዉ አስራታ ከስድ እሚስ። ማልከፃደቃ ሱንይ ኮይሮ “ፅሎተ ካዋ”፥ ናምአን፥ “ሳሌማ ካዎ” ብርሸይካ “ሳሮተ ካዋ” ጉሱ።3ማልከፃደቃስ አይያ ዎይኮ አዉ ዎይኮ ኮቻ ፓይዶይ ባዋ። እያ የለተስ ዶመ ዎይኮ እያ ደኡዋስ ዉርሰ ባዋ፥ ሽን ፆሳ ናአ ዳንድ መርናዉ ካህነ ግድስ።4ማልከፃደቅ አይ መላ ግቴኮ በእተ። ኑ አዋታ ማይዛይ፥ አብራሃመይ፥ ባ ደእዳባፐ እያዉ አስራታ እሚስ።5ካህነ ግድያ ሌወ ኮቻይ እስራኤለ አሳፐ፥ ሄስካ አብራሃመ ኮቸ ግድዳ ባንታ እሻታፐ አስራታ ኤካና መላ ህገይ ኪቴስ።6ማልከፃደቅ ሌወ ኮቸ ግዶና እፅኮካ አብራሃመፐ አስራታ ኤክስ፤ ኡፋይሳ ቃል ደእያ አብራሃመ አንጅስ።7ጉይ ግታን አንጀተይስ ፓላንና።8እስ ባጋራ፥ አስራታ ኤከይሳት ሀይቅያ አሳታ፥ ሽን ሀራ ባጋራ አስራታ ኤከይስ ደኦን ደኤስ ያግድ ኦደትዳይሳ።9ህዛ፥ አስራታ ኤክያ ሌወይ፥ አብራሃመ ባጋራ አስራታ እሚስ ጋናዉ ዳንዳኤቴስ።10አይስ ጊኮ፥ ማልከፃደቅ አብራሃመራ ጋሄትያ ዎደ ሌወይ የለትቦናባ ግድኮካ፥ ባ ማይዛ አብራሃመ ጉልባታን ደኤስ።11እስራኤለ አሳስ ህገይ ሌወ ካህነተ ባጋራ እመትስ። ሀ ሌወ ካህነተይ ፖሎ ግድዳባ ግድያኮ አሮናይሳ መላ ግዶናሽን፥ ማልከፃደቃ መላ ሀራ ካህነ ሹማናዉ አይስ ኮሽዴ?12ህዛ፥ ካህነት ላመትያ ዎደ ህገይካ ቃስ ላመታናዉ በሴስ።13ሀ ኑ እያባ ኦድያ ኡራይ ሀራ ኮቸ፤ እያ ሼሻፐ ኦንካ ያርሾ በሳን ካህነተን ኦቤና።14ኑ ጎዳይ ይሁዳ ሼሻፐ ይዳይስ ኤረትዳይሳ። ግዶሽን፥ ሙሰይ ካህነተባ ኦድሸ ይሁዳ ኮቻባ አይባካ ኦድቤና።15ማልከፃደቃ መላ ሀራ ካህነይ ይዳባ ግድያኮ ሀ ኑ ኦድያባይ አድ ቆንጫና።16እ ካህነ ግድዳይ ዮና ደኦ ዎልቃናፐ አትሽን፥ እያ ማይዛ ህገንነ ዎጋን ግደና።17ጌሻ ማፃፋይ፥“ማልከፃደቃ ካህነተ መላ፥ኔኒ መርናዉ ካህነ”ያግድ ማርካቴስ።18ኮይሮ ህገይ ዳቡራንቾነ ማዶናባ ግድያ ግሾ ሻረትስ።19ሙሰ ህገይ አይብንካ ፖሎ ኦናዉ ዳንዳእቤና። ሽን ኑኒ እያ ባጋራ ፆሳኮ ሺቅያ ኡባፈ አያ ኡፋይሳ ቃላይ ኑስ እመትስ።20ክርስቶስ ካህነ ግድያ ዎደ ፆሳይ ጫቅስ፥ ሽን ሀራት ካህነ ግድዳ ዎደ ሄሳ መላ ጫቆይ ባዋ።21ሽን የሱሲ ጫቆን ካህነ ግድስ። ፆሳይ ያግድ ጫቅስ፤“ጎዳይ ጫቅስ፤ እ ባ ቆፋ ላመና፤‘ኔኒ መርና ካህነ’ ”ያግስ።22ሀ ጫቁዋ ጋሶን የሱሲ ኑስ ኡባፈ አያ ቃላ ጫቁዋስ ዋሰ ግድስ።23ካህነተን ኦና መላ ሀይቆይ ኤንታ ድግዳ ግሾ ኮይሮ ካህነታ ታይቦይ ዳሮ።24ሽን የሱሲ መርናዉ ደእያ ግሾ እያ ካህነተ ሀሪ ላተና።25ሄሳ ግሾ፥ እ ኡባ ዎደ ኤንታ ግሾ ጋናታናዉ መርናዉ ደእያ ግሾ ፆሳኮ እያ ባጋራ የይሳታ ፖሎ አሻናዉ ዳንዳኤስ።26ህዛ፥ ኑስ ኮሽያባ እምያ፥ ጌሻይ፥ ቦረይነ ቱን ባይናይስ፥ ናጋራንቾታፐ ሻከትዳይስነ ሳሉዋፐ አድ ቅዳ ካህነ ሀላቃይ ኑስ ኮሼስ።27እ ሀንኮ ካህነ ሀላቃታ መላ ኮይሮ ባ ናጋራ ግሾ፥ ካልድ አሳ ናጋራ ግሾ ጋላስ ጋላስ ያርሾ ያርሻናዉ ኮሸና። እ ባና ያርሽዳ ዎደ ዛረና ኦገን እስ ቶሆ ባና ያርሽስ።28ሙሰ ህገይ ዳቡራንቾ አሳ ካህነ ሀላቃ ኦድ ሹሜስ። ሽን ህግያፈ ጉየ ይዳ ጫቆ ቃላይ መርናዉ ፖሎ ግድዳ ፆሳ ናኣ ሹምስ።