HEBREOS5ztp_wbt

1Tak reta nglweyꞌ ro, xij men reꞌ mblí Dios xaꞌ, nde sinꞌ nakà xaꞌ nak, tyo xaꞌ lo Dios kwent chanꞌ men sa taꞌ xaꞌ re jwanꞌ yon lo Dios nde kuj xaꞌ maꞌ taꞌ xaꞌ lo Dios sa yax xken men.2Nde naꞌyoched lazoꞌ xaꞌ re men nanchenta nde re xaꞌ ngetetab lo xned Dios, tak nogaꞌ xaꞌ men nak xaꞌ nde ndriꞌd xaꞌ reta jwanꞌ ndriꞌdka re mena.3Nde jwanꞌ nasa ndablo kuj xaꞌ maꞌ taꞌ xaꞌ lo Dios, por xken xaꞌ nde por xken reta men.4Nde ngen cho thi men leꞌga leꞌ ak xaꞌ nglweyꞌ ro, benꞌta xaꞌ jwanꞌ mbrez Dios nkayaꞌ sinꞌ ya, ta xa mbrez Dios Aaron.5Tagaꞌ Crist nanakta leꞌga leꞌ mbli naro Xaꞌ lazoꞌ Xaꞌ sa nak Xaꞌ nglweyꞌ ro, cheꞌla Dios mbli naro Xaꞌ sa nak Xaꞌy lo nchab Dios lo Xaꞌ:Lu nak Xinꞌ na,na mbli sa nzoa naya.6Nde ta xa nchab tedibaꞌ lad lo xkiꞌs Dios:Lu nak nglweyꞌ dib tyemp,ta xa ngok Melquisedec nglweyꞌ.7Nde senꞌ mkete Crist lo izyo reꞌ xajka mena, jwanꞌ toz mdodiꞌsno Xaꞌ Dios, ne mbrez Xaꞌ mnaꞌb Xaꞌ lo Dios nde mbinꞌ Xaꞌ lo Dios, Dios jwanꞌ toyal tolaꞌ Xaꞌ lo yalguj, mbin Dios xkiꞌs Xaꞌ tak mxobyek Xaꞌ Dios.8Teꞌnyega Xinꞌ Dios nak Xa', per lo reta yalti jwanꞌ mbriꞌd Xaꞌ, mteꞌd Xaꞌ mxoꞌbyek Xaꞌ Dios,9nde lo nawe tir mbyanꞌ Xaꞌ lo Dios, tamod ngolal Xaꞌ, Xaꞌ jwanꞌ tolaꞌ adiꞌ reta men jwanꞌ nxoꞌbyek Dios.10Nde Dios mtanꞌ Xaꞌ sa nak Xaꞌ nglweyꞌ ro ta xa ngok Melquisedec nglweyꞌ.

Nathoz naka laꞌ men xkiꞌs Dios

11Mbay lo jwanꞌ reꞌ nzo toz jwanꞌ tej náꞌ lo goꞌ, nde nagana par náꞌ koꞌxkan náꞌy, tak tsowꞌ thoz nchen goꞌ.12Ndablola ak goꞌ maestr loꞌ goꞌ xkiꞌs Dios, tak ndala nzolo goꞌ xkiꞌs Dios, per cheꞌla nakinꞌ goꞌ bere loꞌ náꞌ reta jwanꞌ mas nambi nchab lo xkiꞌs Dios lo goꞌ. Tak cheꞌ ngolal goꞌ xaja thi mbed jwanꞌ nakinꞌ gu nisa nde naꞌakta war, ta nak goꞌ.13Nde re men jwanꞌ nak xaja nak mbed ta benꞌ nchuꞌ nisa, naꞌlid xaꞌ gan yen xaꞌ jwanꞌ galꞌ, tak xa nak mbed nak xaꞌ.14Leꞌ re men jwanꞌ ngola xgab naꞌ lo xkiꞌs Dios, mnea xaꞌ kwan nak jwanꞌ wen nde kwan nak jwanꞌ narax, ta xa nak men jwanꞌ nchala re ned jwanꞌ.
expand_more
Search