Ibru5bjp_wbt

1God tom i fule pes foron laulaumet na pris la tina fatpoton fanu.2Nenge laulaumet na pris ifasi in fofo ini fanu ae i barung e wolwol kiri, ma ri la rong, wara le i sabin imel e fale luut kia.3I e wara, ka tel tunmapek la isi foron sinang laulau kia tom, ke ken fanu sabin.4Biil tikas in kep foim arae laulaumet na pris na wolwol kia tom, biil. Na fakam ke God tom, arae i kam pes ta Aron.5Ke Karisito sabin arae, biil i falaumet u tom isi tapiek laulaumet na pris, biil. God tom i tara sing i aragii,“O keng Kalalik,igii ia ka tapiek Tamam.”6Na nenge orek sabin na Buk na Gogoh, God i tarah,“O nenge pris ae o kiis fitliu,matngan pris arae Melkisedek.”7Na foron biing ae Iesu i liu ta aga na piklinbat, i sising ma ka piispiis God la ini tineng turan danun mata, isi in faliu u koseng minet. Ma God ka ongen u wara le i fapu kanaka u tom na pikli.8Taftawa le i Kalalik ke God, isau le fangungut ae i kalsakai u, i fausum u isi ik misuut lo God.9Ma aunbiing ka fasuut ta u, ka tapiek waran fafaliu ae i kiis fitliu ken fanu tikii ae ri misuut lo.10Ke God ka luun u isi in tapiek Laulaumet na Pris, arae Melkisedek.

Fafanau isi Unune Gong i Luut

11Ifuun e tier biitom kemen use u na tier igii, isau le i ngangaten kanaka isi kemen famalal u usuf gam, wara le gam tom biil gam engenges isi kep u.12Gam ka unune ta na dolon aunbiing, ma igii ka fasi mang le gamek tapiek foron tom fafausum. Isau le, gamen dar tikas biitom isi in bele fausum gam sabin ini foron mulan fafausum na orek ke God. Gamen sus biitom, ma biil ifasi gamen ien inen rakrakai.13Se i sus biitom, i kalalik puun sau. Biil biitom i usum na tortores na sinang.14Isau le inen ae i rakrakai, an fanu matuk, ae ri falasan mulmul ri tom na par failiim rokap na sinang ke sinang laulau.
expand_more
Search