Iɛibraniyyen4rif_lti
Areyyeḥ i řgens n Arebbi
1Ejj aneɣ ad neḥḍa xenni, aqa uřa d ijj zzaywem, umi ɛad din ijj n lwaɛd n wadaf di arraḥet nnes, ad iḍhar ittɣima ɣar ḍeffar ɣar wadaf.2Minzi ittwabarreḥ Řexbar Aṣebḥan ɛawed i neccin, am ittwabarreḥ uřa i nitni, maca awař war d asen infiɛ i yinni d as isřin, minzi tuɣa war dd-ittis ca ak-d l’iman deg inni d as isřan.3Maca neccin, inni yumnen, ad nadef ɣar arraḥet.Maca am mammec inna:
“Am mammec jjuǧeɣ deg weɣḍab inu: ‘Nitni war dd-ttidfen ca ɣar arraḥet inu!’”
U xzar, řexdayem n AREBBI aqa ttwakemmřent zeg wami tᵉttwagg ddunect,4am mammec inna x ssebt:
“Yareyyeḥ AREBBI zi marra řexdayem nnes deg wass wiss sebɛa.”5Ammu i inna ɛawed deg wawař-a wanita:
“War dd-ttidfen ca ɣar arraḥet inu!”6Umi teqqim belli marra zemmaren ad dd-adfen ɣar arraḥet-a, maca inni umi ittwabarreḥ s Řexbar Aṣebḥan ɣar umezwaru, war udifen ca x ssibbet n řmuɛṣiyyet nsen,7aqa Netta igga ɛawed, awarni aṭṭas n řweqt, ijj n wass nneɣni, am mammec ittwari qbeř aqa Dawud inna:
“Ass-a mařa tesřim i tmijja nnes, war seqsiḥem ca uřawen nwem!”8Minzi mařa tuɣa Yacuwa, mmis n Nun, issidef i-ten di arraḥet, war ɣares ittiři ɛad řhard s uqemmum n Dawud x ijj n wass nneɣni awarni man aya.9S uya ad teqqim aqa din ɛad arraḥet n ssebt i řgens n AREBBI.10Minzi wi yudfen ɣar arraḥet nnes, yareyyeḥ ɛawed zi řexdayem nnes am mammec AREBBI zi tinni nnes.11S uya jjem aneɣ ad nemkabar ḥima ad nadef ɣar arraḥet nni, maḥend war nweṭṭi am mammec wḍan inni war iṭṭiɛen.12Minzi Awař n AREBBI iddar, ixeddem mani ma, iqḍeɛ ktar zi kuř ssif s tnayen n wudmawen, ittakkwaḍ ař abeṭṭu n řeɛmar d arruḥ, ař ttasiɛ jar řemfaṣeř, ař aymir jar waḍuf d iɣsan, uca iḥekkem x tnawi d ixarriṣen n wuř.13Uřa d ict n tmesřact i zzayes dd-ittwaxeřqen war zzayes tᵉttwassnuffar ca, maca marra timesřayin aqa atent ttwaɛarryent, ttwarezzment ɣar tiṭṭawin n Wenni umi i-k-dd i ɣa negg řeḥsab.
Yasuɛ d Arrays nneɣ imɣar n ikehhanen14S uyenni, am ɣarneɣ Arrays n ikehhanen imɣar, Yasuɛ Lmasiḥ, Mmis n AREBBI, wenni issgeɛɛden ɣar ujenna, ejj aneɣ ad ncebbar di cchadet nnes.15Minzi war ɣarneɣ arrays n ikehhanen i war izemmar ad yaca ak-d tuḍɛeft nneɣ, maca Ijjen wenni ittwajarrben di marra am neccin, maca břa ddenb.16S uyenni ejj aneɣ ad dd-nqarreb xenni s ttiqqet ɣar řɛarc n arḍa nnes, ḥima ad neksi arreḥmet uca ad naf arḍa di řweqt n řmeḥnet.