1Ineem weɗ tah ɓoo joyiɗ uup amb ndengiɗ ŋ woo kiŋ Kooh ɓoo kerah, ne ɓoo yoɓuu ŋ kosi ɓoo kos po ɓoo kee faɗsuka.2Woo ki Kooh eɗoh ŋ ɗeɓgaana, wa taambohee ŋ malaakaaci, te wa tufkeen. Waaye muci ɓoo raak kotii, weɗ uup yak. Laam, a Heɗi koca gapoh, ɓi keraha ɓaatta ɓoo wa ndengɗiɗ. Kooh teeɓoheeɗa ne woo ciŋ ɓa keeh ngaŋ ɓi firnde, ŋ kehƴi na eel ci, na keemaan nu nik. A nammbaa teeɓoh ŋ in ci Fuuɗsi Hoolohngaani na onohe te a paysohee ca ŋ findi a waaɗoha. Ɓoo min na fusoh mbugal, ne ɓoo sagankoh muc hend an yak ɗah, nik ne woo ka ɗeɓgaan sah tufkeen po tumohaaɗ nu huneeɗi naa ɗah mbugaluusa findi wa joy mbugalohu ɗah ?
Yeesu, taambɗohi yakkiŋ ɓo' ci
5Ŋ waaɗ ɗu woo ne, adinaani na haye, wi ɓoo na woye, Kooh degɗaa ŋ yaah ciŋ malaakaaci.6Waaye, ŋ Fiis ci, raakiɗ ɓoyi woo Kooh ne :« Ɓo' ye,po fu liiɓee nga ɗe ?Wala kuɓu ɓo' ye,po fu liiɓsiɗohee nga ɗe ?7Fu degeen ɗeŋ ɗiski inah ne,a yi uupee ƴissuut malaakaaci,waaye wa maañɗi.Fu yakɗiɗ ɗe, a eɗuusa cir,wa nikka mbahne-buur nga ɗe.8Fu degga in ci jen ŋ yaah ciŋ ɗe. »Kooh woo ne a degiɗ in ci jen ŋ yaah ɓo' ɗah, kon a faɗɗi ali in ; moona woti-woti, ɓoo hotɗi paaɗ ne in ci jen degu ŋ yaah ɓo',9waaye ɗiski wa nik ndii, e Yeesu, a yi ɓoo na hote. Ɓoo hotiɗ ne Yeesu degseen ɗiski fu inah ne, a yi uupee ƴissuut malaakaaci, waaye wa maañeeɗi ; a degseen nga ne, ngaŋ baahohiŋ Kooh, a kaan wuu ɓooɓi jen. Te ɗiski wa nik, ɓoo na hotee ɗe yakɗuuɗ, eɗuuɗ cir po haa a ɓekɗu mbahne-buur, sagu miskiɗiŋ kakaan ki.10A Kooh fer in ci jen te ca jen ca raakiɗ ne ca nik wuu ce. A hotta ne wa baahiɗ ne a lahiɗ Yeesu ŋ miskiɗeem, ne yeem ree ɗiski a joyee ree ngaŋ mit ; ŋ ineem, a nikka yi adgiɗoh ŋ muci ne kuɓu laayiɗ ɓaah ŋ yaki a yak.11Laam yi na hoolɗohe na ɓi hoolɗu, ɓa jen ɓeɗ ɓaah Baab. Ineem weɗ tah po a supukɗi ɓa ɓeeɗkoh taambɗoh ciŋ ɗe12wi a woo Kooh ŋ Fiis ci ne :« Ŋ hey inhiɗe taambɗoh ciŋ ngo tiikiŋ ɗate ŋ hey ɗa ƴeeke ŋ fiki mboolo kosiɗ. »13A woyissa nga ca ne :« Mi, ŋ hey oolke Kooh. »A woyissa nga ca ne :« Ñam yii, na kuɓuuci Kooh eɗ to. »14Kuɓuuci a na woye ɓeem, ɓa ɓo' njaay, heɗ faan na ñif. Ineem weɗ tah po Yeesu ŋ haf ce, nammba ɓaah na ɓa mandohaaɗeem ne, taamboh ŋ kakaan kiŋ ɗe, a saah Seytaani yi ambohee doolndiŋ kakaan.15Ŋ ineem, a minnda tokis ɓooɓi jen, ŋ findi ɓa hend, ɓi nikee ñaam ŋ kipes kiŋ ɓa jen sagu neƴƴoh kakaan.16Wa wooriɗ ne, Yeesu na taambkohe malaakaaci haa, a na taambkohe ɓi rimkoh ŋ Ibrahiima.17Weɗ tah a joyya mand na taambɗoh ciŋ ɗe ŋ in ci jen ne a nik Seeƴkiɗohiŋ ɓa yakki wuu Kooh, Seeƴkiɗoh riifiɗ na yirmoh, tokɗukiɗ ŋ pangkiɗ Kooh, ne a rahas ɗaasuukiŋ bakaaɗ ciŋ ɓooɓi.18Ini a lah ŋ miskiɗ sagu fiir ci kipes na jaɗɗohe, weɗ tah po a miniɗ hirip ɓi kipes na jaɗɗe fiir.