Ma Hibruqäna1uro_wbt
Ma Ngämuqa Aa Emga Di Ama Vit Na Qa Daver Iarhongäkt Moe
1Mudu ma ama rhäqäp nä imek dä varhäm ama rhäqäp na ngät ama is dä sa ma Ngämuqa qa märhamän särha aut mamäkkäna ama Judaqäna nämät aa vämginarha2sokt di vät tangät täkt ama dängdängini na ngät ama qunäng di sa qa märhamän särhäm ut nävät aa emga qärakni i sa ma Ngämuqa qa muqunän bät a qa iva bä ba qa nä iarhongäkt moe bä qosaqi nävät a qa di sa ma Ngämuqa qa säm ama ivätki.3Iaqäkt ma Ngämuqa aa emga di qät sen nä ma Ngämuqa aa murhämeska dä qa di qoki qa rhoqor ma Ngämuqa. Näkt iaqäkt aa emga di qat sangar ama ivätki qi na ama leqäs dä ama usäpki na aa enge ama qrot ngät. Sa qa rhäksot na aurha vuirhong dä qa mualat sä ut bä ut män i ama räktta na ut dä ma Ngämuqa aa saqong näkt nasot dä qa muqun da ama usäpki arha ron dä ma Ngämuqa aa märmär qärakni i ama vit na qa mamär.4Bä nga aa emga qa mualat toqoräkt dä qa qur a ut i qa di ama vit na qa vät ama enselqäna arhä väs di qosaqi rhoqor aa ngärhipki qäraktni i sa ma Ngämuqa qa von ga rhäm gi i ama vit na qi vät arhä ngärhep angät tpäs.5Inguna ngu lu agi anga ensel iaqäkt kärak i sa ma Ngämuqa qa qoar na qa i,“Ainge di ngua emga na nge qärakni i rhäqyerhäkt di sa ngua sa nge?”bä ngu lu agi anga ensel iaqäkt kärak i sa ma Ngämuqa qa qoar toqortäqyia,
“Aingo diva ama ngätmamäk na ngo ba qabä qa diva ama ngärhoemga na qa ba ngo?”6Dä qosaqi nga rhoqoräkt i qät täk na aa emga ama narhoer qa sämäni ama ivätki dä qa qoar toqortäqyia,
“Mamär iva ma Ngämuqa aa enselqäna moe diva rhi nänsäs sagem ga.”7Ma Ngämuqa qat tamän sävät ama enselqäna rhoqortäqyia,
“Qat tualat sa aa enselqäna qärarhani i rhat tualat ba qa bä va ama laur na rhadä va ama rhäptäp nämät ama mudäbäs na rha.”8Sokt di sävät ama Ngärhoemga di qat tamän doqortäqyia,
“Ai Ngämuqa, gi mämugunäs diva qale läs ma ama soktämdä va ngiat turäkt sokt na ama räkt ngät ama lat pä gi Muräktpäm.9Ainge di sa gia snäng bät ama räkt ngät ama lat dap ama lat ama vu ngät di sa ama vu dä gia ron na ngätdä soknga ma Ngämuqa qärakni i gi Ngämuqa na qa sa qa vritne dä ngia väsna ama oel na ama märmärgem bä gi märmärgem di ngä vit pät gia ruavek arhä märmärgem angät tpäs kärarhani i sa qale rha gem nge.”10Dä qosaqi sävät ama Ngärhoemga di qat tamän doqortäqyia,
“Ainge Engeska, mudu vät ama rharimini di sa ngia säm ama ivätkidä qosaqi ama leqäs di sa äs ngä män nämät ngia rhäkt.11Iangärhäkt diva qäbäs na ngät. Sokt di nge diva qale nge ma ama soktäm.Ari, iarhongäkt moekt diva mava nä irhong i irhong doqor ama mru qi ama boiqi.12Ainge diva ngi imum bät irhong doqor ama boiqi ama uiu qibä va ngi qutsasot irhong doqor ama boiqi qäraktni i ngit kutsasorhane na qi mäni nas.Sokt di ainge diva qaku ngi naqutsasorhanedä gi qoeo diva qaku rhäksot na ngät.”13Dä ngu lu sa ma Ngämuqa qa märhamän särha agi anga ensel toqortäqyia,
“Ngia rhuqun dä gu märmärbä qale nge e bä dängdäng iva ngua rhän näp gia ikkäna arhä väs bä va rha rhän i ama laiqa na rha nanokt gia qäriglem”?14Nak ama enselqäna moe di ama latta qärarhani i ama qloqaqa na rha qärarhae i sa ma Ngämuqa qa rhäk na rha ivakt iva rhat tatnärha ama ruvek kärarhani iva as nasot dä va bä ba rha na ama mumaiar.