Koda꞉na꞉ pita꞉ ipika꞉ Eiyeke pa꞉ta꞉ yama꞉ la ka꞉la꞉eki
1Mo hande ambi sanake sanake aneketa꞉ Koda꞉ma꞉ hoto eleke elekema꞉ make mandane hau manuma꞉ make ipika꞉ pita꞉ mo potopede haliweki pa꞉ta꞉ yama꞉ nika꞉ apa꞉na꞉ atekena꞉ ateketonu pa꞉ta꞉ la hala꞉tiki pu hayekeme.2Kutu pieke pateta꞉ pa ame do wetepe naneta꞉ Koda꞉ma꞉ ipika꞉ Eiyeke pa꞉ta꞉ yama꞉ ipika꞉ pi niki pa꞉ta꞉ la kina꞉ la꞉la꞉me. Kutaata꞉ Koda꞉ma꞉ koto Eiyekena꞉ kikima꞉ta꞉ do kenke ya yaapona꞉ ula꞉ alemanu paeyao wepia wina꞉ laa ipikana꞉ma꞉ mo paelo pa꞉la꞉ naneta꞉ ala꞉ta꞉ ala꞉ta꞉ paeyao kilu tombuao haena꞉ Koda꞉ma꞉ ipiki mea hayekeme.3Ipikita꞉ Koda꞉na꞉ pa̱a̱ tieke nikina꞉ pa̱a̱ peaasa꞉ hali hata꞉ make Koda꞉ma꞉ handeke kone make hata꞉ ipika꞉ wele wotu piki pima꞉ do kenke ya paeyao miniliao hala꞉me.
Koda꞉na꞉ Eiyekena꞉ hau tieke
4Koda꞉na꞉ Eiyeke ipika꞉ bikita꞉ mo enisolo tonuna꞉ biki lombei piki biki mieke tupa꞉ ipiki make mo enisolo tonu lombei pao hayekeme.5Amba꞉ Koda꞉ma꞉ leeke pita꞉ dupaeNeketa꞉ ya wekie. I̱ ameta꞉ naka꞉ Apa꞉ halome leekeme.Kutupa pa yaapo pao pima꞉ make alota꞉I̱ma꞉ ipika꞉ Apa꞉ hano ipikita꞉ ya weki haliekeleeke pita꞉ mo enisolomanu ma꞉nda꞉ pa꞉ta꞉ leeke yeke yekea. Dia꞉me.6Kotoeki na piekepate ipika꞉ mupeke weki do kenkena꞉ tapaalo pieke ekina꞉ta꞉ pi dupa leekeme.Mo Koda꞉na꞉ enisolo tonu paeyaoma꞉ta꞉ mo Weki pa꞉ta꞉ panda꞉ puniaaso ipika꞉ biki yeiya꞉ lalimikieleeke pateta꞉7mo enisolo tapake ikina꞉ta꞉ pi dupa leekeme.Koda꞉ma꞉ ipika꞉ enisolo tonuta꞉ mo po tupa꞉ wepiaata꞉ ipika꞉ e pokaasa꞉ tapake tonu ti uleke tupa꞉ mea haena꞉ la꞉la꞉me leekeme.8Kutupa Koda꞉ma꞉ ipika꞉ Eiyekena꞉ta꞉ dupa leekeme.O Koda꞉ naka꞉ kilu tombuao halo pele ekita꞉ na paeke pa u halieke.Naka꞉ tikitiki piki hauma꞉ta꞉ naka꞉ wanda꞉hali epeke tupa꞉ handeteke hao haleme.9Nakana꞉ma꞉ta꞉ epeke hau pa꞉ta꞉ta꞉ puki wopu pelepate hoke hau pa꞉ta꞉ta꞉ honditi wopu peleme.Koto ekima꞉ta꞉ Koda꞉ naka꞉ Koda꞉ hata꞉ neke mea mo naka꞉ yankeke tonu lombei piki some halena꞉ tombo kitolo hata꞉ ta꞉na꞉ peaasa꞉ honku naka꞉ kitawaya꞉me leekeme.10Kutaa Koda꞉ma꞉ paa pi ma꞉nda꞉ma꞉ make alota꞉Tekehalio. Mo hande panake kini pu miki ale pa꞉ta꞉ta꞉ nakana꞉ma꞉ mo hande yu paeyao wepitolo hata꞉ naka꞉ kikima꞉ mo ya nane ula꞉ alemanu paeyao make wepeme.11Koto alemanu paeyaota꞉ pa alu pulu pa꞉la꞉pate neketa꞉ pa hao halipikie.Kutu pulu pelepate mo ale manuta꞉ dau sinkipa꞉ pa pa pu pula꞉ tupa꞉ sinkipa꞉ pa pa pu pelieke.12Nakana꞉ma꞉ ikita꞉ mo hande daumanu panka꞉ pita꞉la꞉ tupa꞉ panka꞉ pilipikie.Kutupa nakana꞉ma꞉ mo ale manuta꞉ wanda꞉halima꞉ ika꞉ dau topo piteleme tupa꞉ ma꞉nda꞉na꞉ topo pilipikie.Koto ale manuta꞉ kutu pulu pa꞉la꞉pate neketa꞉ topu ma꞉nda꞉ na pu make naka꞉ da꞉ta꞉la꞉eki na paeyo piki pa hao halipikie leekeme.13Koda꞉ma꞉ leeke pi ma꞉nda꞉ta꞉ dupaNaka꞉ a꞉nda꞉ tunkiliki tapaketa꞉ naka꞉ anke oto pa꞉ta꞉ haena꞉ laano neketa꞉ ya popeke kiki nanema꞉ hando pitie leekeme.Koto pita꞉ mo hande enisolomanu ma꞉nda꞉ pa꞉ta꞉ leeke yeke yekea. Dia꞉me.14Mo enisolo paeyaota꞉ Koda꞉na꞉ deto hala꞉eki mulu peleme wanda꞉halina꞉ pa꞉ta꞉la꞉la꞉ temokomanu na halemeke yekea.