1Ti laamua Moroaa tii tigiri papaare sin xida no iaaiaa sin no propet lalon no mat laxen sal.2Oro talaawaa sin no xapkap ina leng, tii se paare sin gita sin xan tsi, iwaa tii axilangi ngali momtsaxali no mat maarang, ma sin ia tii axosngi bula xolkolmoxo ina inaman.3Ia tsilatsila ina xan minaalam Moroaa ma ia patpatsen so ma no matan so Moroaa, ma ga xosaraa no maarang araraa ngali taxaa sin xoror ina xan totore. Tii amixati no namaang tsaxa, mil ga tsotso sin xan lima mua Moroaa ta minaalam lapalaa balalangit.4Ma sin abala sal ga tsap lot buxa sin no angelo, malen tsaa abia ies ta momtsaxali asuk mamainaang buxa ngen xadi no.5Amuina Moroaa tii xap paare tsaa ngali xaa angelo malen ta paare sin xan tsi. A paare taman abala sin ia,â Iu nugu tsi;ma talaawaa iaa se tsap, num Mom.âMa lalon biexa inaatel, Moroaa a paareâ Iaa ba tsap xan Mom,ma ia naba tsap nugu tsi.â6Ma sebula biaa tii tali xan tuaa ina tsi xaalame lalon xolkolmoxo ina inaman, ma tii ga paare,â Xan no angelo araraa Moroaa di na langaari laa sin ia.â7Sin no angelo a paare we,â A xosaraa no angelo ngali tsap no maalma xan no untutule, no ie rarar.â8Oro laa sin xan tsi a paare we,â Moroaa, num muina xalkale naba man laaliuma num banam naba tali ininte tutiik.9Iu se titii abia inatutiik ma iu ga palolii namaang morokon;biaabi Moroaa, num Moroaa, iu ta manglen a se apati iu taman abia daanwe ina pinaalam,ngalibi iu ba lapalaa buxa ngen no turaam.â10Moroaa a paare bula,â Sin atiltsoli, Orong, iu tii axosngi balan pula,ma no balalangit biaa no tinaxaa ina no limaam.11Di ba xap araraa, oro iu ba manmandi ba rumi malen uga xabaar.12Malen pu uga disdis iu ba putaxi no,ma malen no pu uga, di ba soxisi no.Oro iu ba man weaatiama num no miet naba xap kap.â13Oro Moroaa tii suk xap mager paare sin xaa angelo;â Tsotso sin nugu lima mua,pupua iaa ba ta xosaraa num no matenkorot num niaan xutxutsiil.â14Moroaa tii tulen xan no angelo ngali di ba tiltsomi biaa no inaman, di ba ta tapkina abia atotoaa.