Jisas i tamat ta di ira angelo kinong a Natine God ie.
1Nalalie God ga ianga ta ira hintubu dait metuma naramon ta ira nianga ta ira tangetus. Ma iga gil hobi a haleng na pana ma naramon ta haleng na mangana ngas.2Iesene kakarek um ra hauhawatna pana bung ma metuma naramon tano Natine ite ianga ta dait. Ma no Natine aie nong God ga tibe ter ie be na tinane ira linge bakut. Ma kaia tano lumana no Natine, God ga hakisi no mawe ma no ula hanuo bakut.3Ma i hamanis no minamar tane God. Ma i haruat tutuno iat tane God. Ila puspusak ma ila balbalaure no mawe ma no ula hanuo bakut ma no dades tano nuno nianga. Ma ing be igate gil no pinapalim na hagamgamatien ri sukun ira sana tintalen, iga kap no tamat na kinkinis. Ma ikino kinkinis i kis ter tano kata na lumana Nong i Manga Tamat Sakit tuma nalu.4Iga kap no tamat na kinkinis hokakarek ta ira angelo. Ma i takados be na kap ie hobi kinong no hinsang no Natine ga hatur kawase, i tamat ta ira kaba angelo.5Ma ikin i palai kinong God pai gale tange ta tike angelo be,“Augo no Natigu.Katiak iou te hanawat be no num Mama.”Pata. Pai gale tange hobi ta ira angelo mon. Ma iga tange habaling be,“Iou no nuno Mama um.Ma aie no Natigu balik um.”6Ma tano pana bung be God i kap hawat no Natine ukira tano ula hanuo, ikino Natine nong i kap no luaina kinkinis, God i tange habaling be,“Na tahut be ira angelo tane God bakut di na lotu tupas no Natigu.”7Ma kaia uta di ira angelo God ga tange horek:“God i gil ira nuno angelo hoke ra dadaip.Ma i gil ira nuno tultule hoke ra kalamena eh.”8Ma sene tano Natine balik i tange be,“No num kinkinis na harkurai na hana hathatikai ma pai nale pataam.Ma nu kure ira num matanabar ma ra taktakados.9U sip ira takados na tintalen ma u malentakuane ira sasana.Io kaie, God, no num God, te bul ra wel tuma nalu tam ura gilgilamis ugo.Hokakarek nu kap ra tamat na kinkinis ma a tamat na gungunuama ta di ira num harwis.”10Ma ne God ga tange habaling be,“Augo no Watong. Mekaia tano haburuana u ga hakisi no ula hanuo.Ma u ga gil no mawe ma ira lumam tus.11No mawe ma no ula hanuo dur na buner iesene u kis ter iat.Dur na tutuarena hoke ra mol.12Nu puli dur hoke ra sigasige.Ma nu kios dur hoke ira turadi di la harkios ma ira nudi mol.Ma sene be augo, pau lale kikios.Ma no num nilon pai nale pataam.”13Ma ne God pai gale tange ta tike angelo be,“Nu kap no tamat na kinkinis kira tano kata na lumagu,tuk iou ni bul hanapu ira num hiruo, hoke tike linge na bul kakim.”14Io, aso tuno di ira angelo? Di ira tanuo na tultule. Ma ne God la tultule ise di uta dong ing di na kap no haralon.