Read EBERUNƆ 1

EBERUNƆ1bus_sim

Luda Nɛ́ dɛ malaikanↄla

¹Luda yã ò wa dezinↄnɛ yã káaku annabinↄ gãzĩ gɛ̃̀n baaagↄ̃ zɛ́nↄn pari,²mↄde à yã òwe a Nɛ́ gãzĩ gurↄ zãa kɛ̀nↄn sa. Nɛ́ pì gãzĩn Luda anduna kɛ̀, à dìɛ kɛ̀ àmbe eégↄ̃ pↄ́ sãnda píngi vĩ.³Àmbe Luda gakui tɛ́kɛna ũ, à dɛ à kuuna sãnsãn ũ. Àmbe à pↄ́ sãnda píngi kũna kↄ̃n a yã'ona gbãaao. Gbɛ̃nↄ durunkɛ̃nnɛna gbɛra à vɛ̃̀ɛ musu Luda bíta ↄplaazi.⁴Lán tↄ́ kɛ̀ à blè pì dɛ malaikanↄ pↄ́la nà, lɛn à bíta dɛńla lɛ.⁵Luda yã kɛ̀kii ò malaika kenɛ yãↄ́?Ma Nɛ́n n ũ, gbã̀an ma n i,Kesↄ̃:Mɛ́gↄ̃ dɛnɛ De ũ,eégↄ̃ dɛ ma Nɛ́ ũ.⁶Kɛ̀ Ludaa tò a daudu mↄ̀ anduna guu à bè:A malaikanↄ dↄnzi kɛnɛ ń píngi.⁷Malaikanↄ yã musu à bè:Eè a zĩ̀rinↄ li ĩa ũ,a zĩkɛrinↄ sↄ̃ↄ tɛ́vura ũ.⁸À Nɛ́ yã musu sↄ̃ à bè:Luda, nɛ́gↄ̃ vɛ̃ɛna kíblekitaa ai gurↄ píngimɛ,nɛɛ̀gↄ̃ n kíkɛgo kũna yãzɛdee ũ.⁹Ń ye maakɛnazi, n za zaakɛnan.Beee yãnzi Luda, n Luda, n ka kpatan,à pↄnnaa pìsimma dɛ n gbɛ̃nↄla.¹⁰Wà bè dↄ:Dii, n anduna kãsãa pɛ̀ɛ zaa káaku,musu nɛ́ n ↄzĩimɛ.¹¹Aↄ̃ píngi é gɛ̃tɛ, mↄde nɛ́gↄ̃ kuu.Aↄ̃é zi kũ lán pↄ́kãsãa bà,¹²nɛ́ ń koko lán uta bà,nɛ́ ń liɛ lán pↄ́kãsãa bà.Mpi sↄ̃, n kuuna ègↄ̃ dↄ̃nkↄ̃,n gurↄↄ yãana vĩro.¹³À yã kɛ̀kii ò malaika kenɛ yãↄ́?Ǹ vɛ̃ɛ ma ↄplaaziai màgↄ̃ n ibɛɛnↄ kɛnnɛ n tinti ũ.¹⁴Malaikanↄ nɛ́ nini zĩkɛrinↄmɛ ń píngi. Luda è ń zĩ lɛ aↄ̃ dↄ gbɛ̃ kɛ̀ aↄ̃é mìsina enↄlɛmɛ.

EBERUNƆ 1 / bus_sim

Luda Nɛ́ dɛ malaikanↄla

EBERUNƆ1bus_sim