Ngkarte anwerneke angkeke Alere Ikwerenhenge anpere-irrenhemele
1Arrule anthurre, Ngkarte atningke-ngare angkeke nhenge yanhe areyenge anpere-irrenhemele angkentye Ikwerenhe-arle ilerlte-apetyarteke arrenge ante atyemeye anwerne-kenhe areyeke-arlke. Rarle angkentye arrpenhele renhe itneke ileke.2Kenhe lyete anteme aneme, arlte utyaknge-arle itwe-irremenge, Ngkartele Alere Ikwerenhe apmere ahelhe nhenhe-werne yerneke Re nhenge anwerneke iletyeke ingkirreke anthurre Ngkarte-akerte. Arne anetyakenhenge-urrke, Alere ikwerenhe-arle itethe akwete aneme, apurtele anteme Ratherre-arle arne arrpe-anenhe mpwareke alkere uthene ahelhe uthene. Urreke, ilengare apeke, arne ingkirreke anthurre Alere Ikwerenhe-akenhe anteme anetyenhe. Re anteme pwathe akngerre arne ingkirrekeke-artweye anetyenhe.3Nhenge anwerne Alere Ngkarte-kenheke itirremele, re alkngenthe-arteke imparrkeme Ngkarte-ngentyele. Rarle anwerneke imerneme re kwenhe Akngeye ikwerenhe-arteke anthurre aneme. Alere Ngkarte-kenhele arne ingkirreke anthurre mwerre arntarnte-aremele atnyeneme apmere ahelhe nhenhele ane alkerele uthene angkentye akngerre ikwerenhele. Anwerne-arle akurne anthurre anerlte-anetyarte. Kenhe Alere Ngkarte-kenhe anwerneke piwelhemele ilweke anteme re anwernenhe akurne-ketye arlkngetyeke nhenge Ngkartele-arle anwerneke urtepe akeketyenge arriletyeke akurne anthurre anwerne mpwaremele aneke. Ikwere-iperre, re itethe-irrirtnemele, alkere-werne alpeke anetye-alpemele Ngkarteke akwe-arratyele.4Arratye kwenhe alakenhe aneke. Ngkartele Jesus Alere Ikwerenhe akeke. Arritnye yanhe alkere-arenye-kenhe-arteke anetyakenhele, arrangkwe-arle. Ngkartele Alere Ikwerenhe akngakeke alkere-arenye areyenge akertne-ulkere anetyeke.Jesus kwenhe impene aneme, alkere-arenye areyenge irntwarre-ulkere akwete
5Ngkarte alkere-arenye areyeke angketyakenhele aneke,“Unte Alere Atyinhe.Lyete ayenge Akngeye ngkwinhe aneme.” Psalm 2:7.Ngkarte alakenhe angketyakenhe-arle aneke,“Ayenge lyete Akngeye ngkwinhe aneme,ante unte Alere Atyinhe anteme aneme.” 2 Samuel 7:14.Nhenge Ngkarte alakenhe angkeke-arle iperre, Re alkere-arenyeke alakenhe angketyakenhe-arle aneke, Re Alere Ikwerenheke ware-arle angkeke.6Nhenge Rarle itirreke yernetyeke Alere anyente-arenye Ikwerenhe apmere ahelhe nhenhe-werne. Kele imerte Re alakenhe-arle angkemele,“Alkere-arenye ingkirreke anthurre renhe tnakewarretyeke.” Deuteronomy 32:43 (Greek version).7Nhenge Re alkere-arenye areye-akerteke angkemele, Ngkarte imerte alakenhe-arle angkemele,“Tharle alkere-arenye mpwareke atyenge warrke-irretyeke.Itne rlke-arteke anetyenhe ane ure alkngenthe-arteke-arlke.” Psalm 104:4.8Kenhe Ngkarte Alere Ikwerenheke angkeme,“Ye Alere Atyinhe, unte apele Atyenge irrpatye anteme-arle, Ngkarte.Ayenge-arteke, unte tyerrtye ngkwinhe-areye arratye anthurre akwete-ante arntarnte-aretyenhe arlenge arlentyeke.9Unte mwantyele arntarnte-areme angwenhele apeke-arle akwetethe arratye mpwarerlte-anemeke.Unte akenhe ilkelhetyakenhe aneme tyerrtye areye aretyeke arne akurnentye mpwaremele anerlenge.Alakenhe ikwerenge anteme The ngenhe akngakeke unte Alartetye anthurre anetyeke.The ngenhe mpwareke arrpenhe ingkirrekenge intwarre akangkentye anetyeke.” Psalm 45:6-7.10Nhenhe angkentye arrpenhe-arle aneme Ngkartele Alere Ikwerenhe ileke.“Alartetye-aye, arrwekelenge aneke, nhenge arne-arlke anetyakenhe aneke, arrangkwe anthurre-arle,Unte kwenhe ahelhe nhenhe uthene alkere uthene angampelhe-ileke iltye ngkwinhe atherrele mpwareke.11Urreke ulkerenge anteme ahelhe uthene alkere uthene arrangkwe-irretyenhe,ratherre akurne-irretyenhe mantere angkweye-arteke.Mantereke itirraye, nhenge nthakenhe-arle itne angkweye-irremele, re-anteme itnenhe irlwelhe-ileme iwemele anteme,Unte alkere uthene ahelhe utheneke alakenhe mpwaretyenhe.Kenhe unte akenhe akngarte-iwelhetyakenhele anetyenhe,kenhe unte akenhe uyerretyakenhe, unte alakenhe akwete ahawethe akwete-arle anetyenhe.” Psalm 102:25-27.13Ngkarte alkere-arenye Ikwerenhe areyeke angketyakenhele aneke:“Atyenge itwele anaye atyengenge alartetye atherre ilerne anetyeke,The tyerrtye uternetyenhenge ilkelhetyakenhe areye artepe-arrernelhetyeke ingke ngkwinhe-arleke,ngkwenge itne aywerre-irretyeke.” Psalm 110:1.14Jesus-arteke anetyakenhe kwenhe alkere-arenye areye. Itne-arle kwerrene areye ware-arle Ngkarteke warrke mpwarentye akngerre areye. Yanhe itnenhe-arle Re nhenhe-werne akwetethe yerneme apetyetyeke anetyeke anwerneke-nge arntarnte-aremele anetyeke. Anwernenhe-arle Ngkartele akngakeke Re itetheke mpwaretyenhenge anwerne ilweke-ketyenge.