1Da bitsintaꞌ Anutu maran rufur Noa da apu santan rungꞌ mpada madzung igi da itangin manis irunt da igufi mpui tsiraꞌ igi da isasariꞌ iruꞌ.2Da Anutu itsungin mpui bampun mingꞌa intap warangꞌ da mingꞌa gunungun wagungꞌ da gamiꞌ intap ruan.3Gubuꞌ 150 nanga i ntsupan da mpui isasariꞌ iruꞌ isangꞌ madzung iba mpa iyab mamai mangan mingꞌa Ararat da ukam 7 gubuꞌ gan 17.5Mpui rungꞌ isasariꞌ iruꞌ da waꞌa ukam 10 gubuꞌ gan 1 da mamai fain gudzun iwaꞌ.6Mamai fain gudzun iwaꞌ sib da gubuꞌ 40 mangan ntsupan da Noa itus muantsi isiꞌ mangan mingꞌa wagungꞌ7da itangin ngampuaꞌ mangan idzuf ifan. Da ngampuaꞌ igi idzuf iyung ifa iba isangꞌ mpui riꞌan da intap waꞌan.8Da Noa itip itangin ngasabusir ifan i tsanganda bida mpui iriꞌ iruꞌ sib, ma imaꞌ.9Da bitsintaꞌ mpui rungꞌ imunti, ibinigi da ngasabusir isau gan mpada gin, da itip idzuf iba madzung da Noa yintsi bangin iwaꞌ ifan da iyu apu arangan yatangꞌ ifan.10Arangan itip impa isangꞌ gubuꞌ 7 fada sib da itip itangin ngasabusir ifan.11Nam nufan da ngasabusir itip iba da Noa. Hai, mingꞌa ngasabusir nifun da Noa itsanga gai oliv yafan faꞌ, da arangan isruꞌ gin ibi mpui iruꞌ sib wa.12Da arangan itip impa isangꞌ gubuꞌ 7 fada sib da itangin ngasabusir itip ifan. Da gubuꞌ igi da ngasabusir watip idzuf iba da Noa u.13Noa udzufan ibawaꞌ 601 sib. Da atupa udzuf faꞌ ukaman 1 da gubuꞌ gan 1 da mpui iriꞌ sib. Noa iraꞌ i buari i nam buafira madzung gudzun gin da irarab nam santan iruꞌ da itsangan ibi mpui iriꞌ sib da intap iwaꞌ.14Da waꞌa ukam 2 gubuꞌ gan 27 da intap itsaraꞌ sib.15Ida Anutu ini da Noa ibiani,16“Watangin madzung rai da warut fininggam da narum rusam da gan finin rusan nawaꞌ.17Wayu apu mara maran santan, apu dzufan da yungan da sruakan, ruta agu mpadan igi nawaꞌ manaꞌ i rima narun rusan da utusa i ruan da mpada sangꞌa intap santan.”18Ibinigi da Noa itangin madzung da irut fininggan da narun rusan da narun rusan finin rusan impruꞌ ruan waꞌan.19Apu mara maran yunga intap da dzufan impruꞌ ruan i utup utupan da itangin madzung rai da iwaꞌ.
Noa Itsara Nam da Yawe
20Noa yantungꞌ tauf isu mumai mararam tsarada nam da Yawe gin. Da arangan iyu apu fain imingꞌ apu mara maran yungan da dzufan Anutu maran aridagin i rima dangki rutin, da itai isu dangkiifan da Yawe.21Yawe itungis Noa dangki gan riman igi da gauntan iwaꞌ ngarubini iyus, da Arangan ini i unggan ibiani, “Dzi wasangꞌ i tipa wayada intap i garam gar nanggan maisan mungaꞌ gan u. Nan nidzun, mingꞌa ribarangan marafaꞌ gan da maran ifur nam maisan iyus angu, da bitsintaꞌ dzi wasangꞌ i tipa siata nam marantaꞌan sib angu bida dzi nangan ugu u, imaꞌ.22“Da gubuꞌ intap rungꞌ mingꞌan,da bungꞌ awaꞌ gubuꞌ ntanga nam gadanda gubuꞌ yunga nam gadan,gubuꞌ rangarang da gubuꞌ sasus,gubuꞌ fus da gubuꞌ gamiꞌ,nam idziang da gubuꞌ pisan.Gubuꞌ mara maran gubuꞌ gan bida nigiwasangꞌ i ntsupan.”