Popodalaina50lga_sco

1Ego sa opo gore borua i Josepa sa na tamana ko sa ao lulukania.2Beto sa garunuria i Josepa sira nona nabulu dokita ko mai roitia beto mai orani mereseni sa na kokobu tinina na tamana ko mike nyabo sauniria. Ko qai roitia beto qai orania na mereseni sa na kokobu tinina i Izireli,3ko sa tekuniria ka made ngavuluputa rane sa na roiti isa beto sa okoto sa na roitina na kokobu tini. Beto ka vitungavuluputa rane sa qai kole lukania ira na tinoni pa Ijipi si Jekopi.4Totonai sa jola sa na totoso qai kole lukania ira sisa sa, pira sauniria i Josepa sira na tinoni lalavata tai Pero, <<Vei muna tavaraguanisiu ara sagou sa, mu paranga vanisiu i Pero,>> pira mugunia,5Na tamaqu sa vamaulusiu sara pira sau, <<Ara sa tata mana mate ko pa bevi ketakoi qa kori vaoqilia mekaqu pa ia pa Kenani sa ketakoi sa muna golomonisiu,>> sau. Ko kopira bi vamalumusiu ko ba sae golomia na tamaqu beto ba mule bugunia, sau.6Poni pira sau si Pero, <<Mu sae ko mu golomia na tamamu isa vei sa vamaulunigo ko muna roitinia sau,>> saunia.7Ko sa sae golomia na tamana pa Kenani si Josepa. Doru tinoni lalavata tai Pero, ira na tinoni poreveveidi pa ruma tana beto doru tinoni poreveveidi pa Ijipi sa qai tutia sae i Josepa8beto ira na tatamana tai Josepa, ira na tugana na tasina beto ko ira na tavitina na tamana. Na tudia gu beto na dia papausu gu sa qai loaria pa ia pa Qoseni.9Ira qai kokoi pa totopili beto pa hose ba qai tutia sae tugu isa ko na minete lavata sosoto sa qai sae.10Totonai qai kamu pa ia tatapuni kiko tai Atadi, tata pa Jodani, qai lukana roroma beto uui viviva sira beto ketakoi sa i Josepa sa kole suvere lukania sa na tamana ka vitu rane.11Totonai qai batiria ira na tinoni qai lulukana pa ia tatapuni kiko tai Atadi sira na tinoni Kenani qai suvere ketakoi sa, pira qarigu, Koi! <<Ira pa Ijipi sa qai korapa roitinia na dia roiti tututi pa totoso takulanga,>> qarigu. Sa vei isa sa, na ia isa kai kalena pa Jodani sa qai vaisongonia Ebolo Miziraimi.12Ko ira na tuna marene i Jekopi sa qai tutia tugu sa na sa sa pojaniria na tamadi.13Qai surana saenia pa ia pa Kenani beto ko qai golomonia pa bevi pa ia tai Makipela tata pa Mamiri isa i Ebarahami sa vai tavitini ia tai Eporoni na tinoni Hitai perangana ko na ia vavaigolomona saunia isa.14Pa liguna sa golomia na tamana si Josepa sa, sa mule gore pa Ijipi sisa, ira na tugana na tasina beto ira doru tinoni qai tutia sae isa golomia na tamana.

I Josepa Sa Vamanotoria Na Tugana.

15Ego totonai qai batia ira na tugana i Josepa sa mate sa na tamadi, poni sa pira qarigu, <<Ai vei vei bi korapa tu tagigirinigita i Josepa sa gita pa doru sela taqe roiti laonia tana ko bi vaibeiona biu?>> qarigu.16Ko qai valao paranga tai Josepa, pira qarigunia, <<Na tamamu sa pira saunigei sa totonai sa oqoro mate:17<Pira munagunia si Josepa sau: Ara qa tepago sao tuqu ko mu taleosoniria sa na tugamu pana sela beto ira na tapata qai roiti vivikere laonia tamu.> Mu taleosoniria sa na sela qai roitiniria ira na nabulu tana Tamasa isa na Tamasa tana tamamu,>> sau, qarigu. Poni sa lukana si Josepa totonai sa lame kamu tana sa na nongoro isa.18Beto poni qai tuti lame sira na tugana ko qai gona oponiria pa moena isa beto pira qarigu, <<Agei sa na mua pinausu gu ao,>> qarigunia.19Ba pira sauniria i Josepa sira, <<Muke matagutu. Na Tamasa sara?20Agou qu qaqirinisiu na ikerena saraba na Tamasa sa qairinia na jongana ko mi roitinia vei isa korapa taroiti pa ngeni alepi, na alodi na sosoku toa sau.21Ko vei sa muke matagutu. Ara mana dodogorogou sagou beto ira na miu koburu,>> sau sisa. Ko sa vamanotoria beto sa paranga vabubuleria sira na tugana na tasina.

Na Mate Ti Josepa

22Ego ko sa suvere pa Ijipi si Josepa, isa beto ira na tatamana tana tamana. Sa suvere kai gogoto manogaputa aoro sisa,23ko sa bati kamua isa sa na vinaue popodo tadira na tuna i Eparemi beto vei tugu ira na tuna i Maki isa na tuna marene i Manase qai vakoleniria pa tutunguna i Josepa totonai qai podo.24Ego beto pira sauniria i Josepa sira na tugana na tasina, <<Ara sa tata gu mana mate. Ba na Tamasa kode mina lame sosoto tokanigou ko mina toni votunigou pa ia api lao pa ia sa maulu tarinirianiria ira Ebarahami, i Aisake beto i Jekopi,>> sau.25Beto ko sa vamauluria sira na tuna i Izireli, pira sau, <<Na Tamasa mina lame sosoto tokanigou ko totonai muna taloa lani sa muna pogoso vaioloria lani sa na pupudaqu ara,>> sauniria.26Ko kai gogoto manogaputa aorona si Josepa beto sa sa mate. Ko qai roitia beto qai orani mereseni sa na kokobu tinina beto qai kurania pa kai kesi vavakoleni tinoni matena pa Ijipi.
expand_more
Search