उत्पत्ति50hoy_twf
1आग यूसुफ तान आप्प उन बाय मा बिदकु वर्लदुन अदिक आऊक चुम्सदुन.2अदिक यूसुफ आ वैध्यगोळी, जो आऊन सेवक ईरोर, आग्या कोट्टुन कि आऊन आप्प उन लाश मा सुगन्ध द्रव्य तुमुल; आग वैध्यगोळ इस्त्राएल उन लाश दा सुगन्ध द्रव्य तुमदुर.3अदिक आऊनव चालीस दिन पुरा आदव, यतिकी यार लाश दा सुगन्ध द्रव्य तुमकु आगतद, आंदरी ईसा दिन पुरा हत्ताव; अदिक मिस्त्री लॉकुर अदुर साटी सत्तर दिन ताला विलाप माळतेला ईत्तुर.4याग आऊनव विलाप उन दिनगोळ बितसेदव, आग यूसुफ फिरौन उन घराना अन लॉकुर से अनली कुरतुन, “अगर नीम अनुग्रह अन नजर नान मा ईतीदाद रा नान ईद बातणी फिरौन उक केळसी,5नान आप्प ईद अनकु, ‘नोळ ना सोत्तुर मा आईन,’ नानी ईद कसम तीन्सदुन, ‘जो कब्र ना कनान द्याश दा अगळुसीन अल्या नी नानी मुण्ण कोळेत.’ इदुरसाटी ईग नानी अल होगकु तान आप्प उक मुण्ण कोळोद आग्या कोळुल, अदुर बाद्दा ना वापस होट बराईन.”6आग फिरौन अंदुन, “होगकु तान आप्प उन तिन्सद कसम अन अनुसार आऊक मुण्ण कोळ.”7इदुरसाटी यूसुफ तान आप्प उक मुण्ण कोळोर साटी होदुन, अदिक फिरौन इन सप्पा कर्मचारी, मतलब आऊन भवन इन स्याणा मंळसागोळ अदिक मिस्त्र द्याश इन स्याणागोळ आऊन सांगुळ होदुर.8अदिक यूसुफ उन मान्या गोळोर सप्पा लॉकुर, अदिक आऊन वार्टुर, अदिक आऊन आप्प उन मान्या गोळोर सप्पा लॉकुर भी सांगुळ होदुर; लेकीन आंदुर तान चिकोरी, अदिक मर्र म्यांडा, अदिक गोसीगोळी गोशेन प्रदेश दा बिटकु बंदुर.9अदिक आऊन सांगुळ रथ अदिक सवार होदुर, ई प्रकार भीळ हापाळ आगेत.10याग आंदुर आताद उन खलयान ताका, जो यरदन गांगा अन आप्पाटी आद, पोहचुसदुर, आग अल हापाळ भारी विलाप माळदुर, अदिक यूसुफ तान आप्प उन साटी येळ दिन इन विलाप माळसुसदुन.11आताद इन खलिहान दाकळोद विलाप इक नोळकु आ द्याश इन ईरावाळेर कनानीगोळ अंदुर, “ईद रा मिस्त्री लॉकुर्द भारी विलाप आगीदाद.” ईदा कारण आ जागा अन हेसुर आबेल मिस्रेम बित्त, अदिक अद यरदन इन आप्पाटी आद.12इस्त्राएल उन पारगोळ ठीक अदा क्याल्सा माळदुर यदुर आव आंदरी आग्या कोटीदुन:13मतलब आंदुर आऊक कनान द्याश दा वोतकु मकपेला अन आ जमीन इन गुफा दा, जो मम्रे अन मुंद आद, मुण्ण कोट्टुर; यदरी अब्राहम हित्ती एप्रोन उन कय देल इदुरसाटी कोंडीदुन, कि अद कब्रस्तान इन साटी आंदुर्द खुद इन जागा ईरूल.14तान आप्प उक मुण्ण कोटकु यूसुफ तान वार्टुर अदिक आ सप्पा सांगुळ, जो आऊन आप्प उक मुण्ण कोळोर साटी सांगुळ बंदीदुर, मिस्त्र वापस बंदुन.