Read أَمزْوَارُو 45

أَمزْوَارُو45rif_ati

يُوسُوفْ إِسَّارْڭبْ إِخفْ نّسْ إِ أَيْثْمَاسْ

¹خنِّي وَارْ إِزمَّارْ عَاذْ يُوسُوفْ أَذْ إِطّفْ إِخفْ نّسْ زَّاثْ إِ يِينِّي أَكِيذسْ مَارَّا ؤُشَا إِڒَاغَا: ”سُوفّْغمْ مَارَّا إِنِّي أَكِيذِي ذَا!“ وَارْ إِقِّيمْ حذْ أَكِيذسْ ڒَامِي إِسّْشنْ يُوسُوفْ إِ يَايْثْمَاسْ مِينْ إِعْنَا.²ڒخْذنِّي يَارْخُو ثْمِيجَّا نّسْ س إِغُويَّانْ، أَڒَامِي ذ أَسْ سْڒِينْ إِمِيصْرِييّنْ، ؤُشَا ؤُڒَا ذ ثَادَّارْثْ ن فِيرْعُونْ ثسْڒَا أَيَا.³إِنَّا يُوسُوفْ إِ يَايْثْمَاسْ: ”نشّْ ذ يُوسُوفْ! مَا إِدَّارْ عَاذْ بَابَا؟“ أَيْثْمَاسْ وَارْ زمَّارنْ أَذْ خَاسْ د-أَرّنْ، مِينْزِي ثُوغَا ڭّْوذنْ زَّايسْ.⁴إِنَّا يُوسُوفْ إِ يَايْثْمَاسْ: ”قَارّْبمْ-د ڒخُّو غَارِي!“ ؤُشَا نِيثْنِي قَارّْبنْ غَارسْ. إِنَّا خنِّي: ”نشّْ ذ يُوسُوفْ ؤُمَاثْومْ، ونِّي ثزّنْزمْ إِ مِيصْرَا.⁵ڒخُّو، وَارْ كسِّيمْ س ومْنُوسْ ؤُ وَارْ ث تّجِّيمْ أَذْ يِيڒِي ذ أَخيّقْ ذِي ثِيطَّاوِينْ نْومْ ؤُمِي ذ أَيِي ثزّنْزمْ ذَانِيثَا إِ مِيصْرَا، أَقَا أَربِّي إِسّكّْ أَيِي-د، مَاحنْذْ أَذْ كنِّيوْ جّغْ ثدَّارمْ.⁶أَقَا ڒخُّو عَاذْ ثْنَاينْ ن إِسڭّْوُوسَا ن ڒَاژْ ذِي ثمُّورْثْ ؤُشَا قِّيمْ عَاذْ خمْسَا ن إِسڭّْوُوسَا وَارْ ذَايْسنْ إِتِّيڒِي ثْيَارْزَا نِيغْ ثَاميْرَا.⁷مَاشَا أَربِّي إِسّكّْ أَيِي-د زَّاثْومْ، حِيمَا أَذْ أَومْ ڭّغْ مِينْ إِقِّيمنْ خْ ثمُّورْثْ ؤُ حِيمَا أَذْ حْضِيغْ ثُوذَارْثْ نْومْ إِ يِيجّْ ن ؤُسنْجمْ إِمْغَارْ.⁸خنِّي ڒخُّو، كنِّيوْ وَارْ ذ أَيِي د-ثسّكّمْ شَا ذَا، مَاشَا أَربِّي ذ ونِّي ذ أَيِي إِڭِّينْ ذ بَابَاسْ إِ فِيرْعُونْ ذ سِيذِي خْ مَارَّا ثَادَّارْثْ نّسْ ذ ڒْحَاكمْ خْ مَارَّا ثَامُّورْثْ ن مِيصْرَا.⁹قدْجْقمْ ذغْيَا، سْڭعّْذمْ غَارْ بَابَا، إِنِيمْ أَسْ: ’أَمُّو إِ إِقَّارْ مِّيشْ يُوسُوفْ: أَربِّي إِڭَّا أَيِي ذ سِيذِي ن مَارَّا مِيصْرَا. أَرَاحْ-د غَارِي، وَارْ تّعْڭِيزْ.¹⁰أَذْ ثْزذْغذْ ذِي ثمُّورْثْ ن جُوشَانْ، أَذْ ثِيڒِيذْ زَّاثِي، شكْ ذ إِحنْجِيرنْ نّشْ، ذ إِحنْجِيرنْ ن إِحنْجِيرنْ نّشْ، ذ وُودْجِي ذ إِفُونَاسنْ ذ ثْفُونَاسِينْ ؤُڒَا ذ مَارَّا مِينْ غَاركْ.¹¹أَذْ أَشْ ڭّغْ أَرْزقْ ذِينْ، مِينْزِي أَذْ د-أَسنْ عَاذْ خمْسَا ن إِسڭّْوُوسَا ن ڒَاژْ، حِيمَا وَارْ ثتّضْعِيفذْ، شكْ لَّ، ثَادَّارْثْ نّشْ لَّ، ؤُڒَا ذ مَارَّا مِينْ غَاركْ لَّ!¹²خْزَارْ، ثِيطَّاوِينْ نْومْ ژْرِينْثْ، ؤُڒَا ذ ثِيطَّاوِينْ ن ؤُمَا بِينْيَامِينْ، أَقَا ذ نشّْ إِ كِيذْومْ إِسَّاوَاڒنْ.¹³عڒْممْ إِ بَابَا خْ مَارَّا أَعُودْجِي إِنُو ذِي مِيصْرَا ؤُ خْ مَارَّا مِينْ ثژْرِيمْ. قدْجْقمْ ذغْيَا، ثِيوْيمْ-د بَابَا ذَا.“¹⁴ؤُشَا إِنْڭزْ خْ يِيرِي ن بِينْيَامِينْ ؤُمَاسْ، إِرُو، ؤُشَا بِينْيَامِينْ إِرُو خْ يِيرِي نّسْ.¹⁵إِسُّوذمْ مَارَّا أَيْثْمَاسْ، إِرُو خَاسنْ. أَوَارْنِي مَانْ أَيَا سِّيوْڒنْ أَكِيذسْ أَيْثْمَاسْ.¹⁶ڒَْامِي ثسْڒَا ثَادَّارْثْ ن فِيرْعُونْ ڒخْبَارْ-أَ، نَّانْ: ”أَيْثْمَاسْ ن يُوسُوفْ ؤُسِينْ-د!“. ثُوغَا-ث ذ ڒخْبَارْ أَصبْحَانْ ذِي ثِيطَّاوِينْ ن فِيرْعُونْ ذ إِمْسخَّارنْ نّسْ.¹⁷إِنَّا فِيرْعُونْ إِ يُوسُوفْ: ”إِنِي إِ أَيْثْمَاشْ: ’ڭّمْ أَيَا: سَارْبُومْ زْوَايڒْ نْومْ ؤُشَا ڭعّْذمْ، رُوحمْ غَارْ ثمُّورْثْ ن كنْعَانْ.¹⁸كْسِيمْ-د بَابَاثْومْ ذ رَادْجْ نْومْ، ثُوسِيمْ-د غَارِي. أَقَا أَذْ أَومْ وْشغْ لمْلِيحْ ن ثمُّورْثْ ن مِيصْرَا ؤُشَا أَذْ ثشّمْ زِي مِينْ إِشْنَانْ ن ثمُّورْثْ.¹⁹أَقَا تّْوَاڭّنْثْ ثِيوصَّا ذِي طّْوعْ نّكْ. ڭّمْ أَيَا: كْسِيمْ زِي ثمُّورْثْ ن مِيصْرَا إِكَارُّوثنْ إِ إِحنْجِيرنْ نْومْ ؤُ إِ ثمْغَارِينْ نْومْ، أَوْيمْ-د زَّايسْ بَابَاثْومْ ؤُشَا أَسمْ-د ذَا.²⁰وَارْ تّجِّيمْ ثِيطَّاوِينْ نْومْ أَذْ سّْحِيسّْفنْثْ إِ ڒْقشّْ نْومْ، مِينْزِي لمْلِيحْ ن ثمُّورْثْ ن مِيصْرَا أَذْ يِيڒِي نْومْ.‘ “²¹ؤُشَا أَمُّو إِ ڭِّينْ أَيْثْ ن إِسْرَائِيل. إِوْشَا أَسنْ يُوسُوفْ إِكَارُّوثنْ خْ ڒُومُورْ ن فِيرْعُونْ ؤُشَا إِوْشَا أَسنْ عَاوذْ مَاشَّا إِ وبْرِيذْ.²²إِوْشَا إِ كُوڒْ إِجّْ زَّايْسنْ وحّْذسْ أَرُّوضْ ن جْذِيذْ، مَاشَا إِ بِينْيَامِينْ إِوْشَا أَسْ ثڒْثْ-مْيَا ن ؤُقِييَّاثْ ن نُّوقَارْثْ ذ خمْسَا ن وَارُّوضْ ذ جْذِيذْ.²³ؤُ أَمُّو عَاوذْ إِسّكّْ إِ بَابَاسْعشْرَا ن يغْيَاڒْ شُّورنْ س مِينْ إِفَارْزنْ ن مِيصْرَا ؤُعشْرَا ن ثغْيَاڒْ شُّورنْثْ س إِمنْذِي ذ وغْرُومْ ذ مَاشَّا إِ بَابَاسْ ؤُمِي غَا يِيڒِي نتَّا ذڭْ وبْرِيذْ.²⁴إِقبّضْ أَيْثْمَاسْ ؤُشَا رُوحنْ. إِنَّا أَسنْ نتَّا: ”وَارْ تّْمنْغِيمْ شَا ذڭْ وبْرِيذْ.“²⁵ڭعّْذنْ زِي مِيصْرَا، إِوْضنْ غَارْ ثمُّورْثْ ن كنْعَانْ غَارْ يَاعْقُوبْ، بَابَاثْسنْ.²⁶وْشِينْ أَسْ ڒخْبَارْ، نَّانْ: ”يُوسُوفْ أَقَا إِدَّارْ عَاذْ، وَاهْ، أَقَا-ث ذ ڒْحَاكمْ ن مَارَّا ثَامُّورْثْ ن مِيصْرَا!“ خنِّي إِسْخفْ وُوڒْ نّسْ، مِينْزِي وَارْ ثنْ يُومِينْ شَا.²⁷ؤُمِي ذ أَسْ عَاوْذنْ مَارَّا أَوَاڒنْ ن يُوسُوفْ إِنِّي ذ أَسنْ إِنَّا ؤُ ڒَْامِي إِژْرَا إِكَارُّوثنْ إِنِّي د-إِسّكّْ يُوسُوفْ حِيمَا أَذْ ث أَوْينْ، إِعْقبْ-د بُوحْبڒْ ن بَابَاثْسنْ يَاعْقُوبْ.²⁸ؤُشَا إِنَّا إِسْرَائِيل: ”كْفَا! يُوسُوفْ مِّي أَقَا إِدَّارْ! أَذْ رَاحغْ ؤُشَا أَذْ ث ژَترْغْ قْبڒْ إِ غَا مّْثغْ!“

أَمزْوَارُو 45 / rif_ati

يُوسُوفْ إِسَّارْڭبْ إِخفْ نّسْ إِ أَيْثْمَاسْ

أَمزْوَارُو45rif_ati