Genesis4mbb_wbt

1Ne zutun mid-uvayan ni Adan haazà is esawa zin he si Eva, ne mibmeǥingey sikandin ne mid-anak sikandin te maama, ne ke si Eva te, “Midtevangan a te Nengazen he mekeanak a, umbe egngezanan ku sikandin te Cain.”2Ne mibmeǥingey en maan si Eva ne mid-anak sikandin te maama, ne mid-ngezanan din te Abel. Ne hein midekelà en si Abel, perevantey sikandin te menge kerehidu, ne si Cain, ne mibasuk mulà.3Ne neuma is andew he nemuhat si Cain diyà te Nengazen. Ne iyan impemuhat din is menge veǥas te menge pinemula zin.4Ne si Abel mulà migkuwa sikandin te kinekekayan duen te menge uyaǥen din ne midlapè din, ne impemuhat din is kineupiyahan he vahin diyà te Megbevayà. Nelipey is Nengazen ki Abel wey zuen te pemuhat din,5piru wazè din mulà dewata si Cain wey is kandin he impemuhat. Ne zutun utew nepauk si Cain ne mibmerembunut is dagwey zin.6Ne migkaǥi zutun is Nengazen diyà te ki Cain te, “Maan is utew ka egkepauk wey maan is mibmerembunut is dagwey nu?7Su emun hustu is ed-ul-ulahan nu edewaten ku sikew; ne emun kenà, melemu ka ebpekesalà, su is salà ne iring te kumekaid he langgam he ed-ayan kenikew keniyan te ǥemawan. Utew zin egkesuati he mezaag ke zin, iyan, kinahanglan he iyan ka edaag kandin.”8Sevaha zutun he andew, migkaǥi si Cain diyà te hazi zin he si Abel te, “Edhendiyè ki te vevesukà.” Ne hein diyè dan en, midhimetayan ni Cain si Abel.9Ne mid-insaan te Nengazen si Cain te, “Hendei is hazi nu he si Abel?” Ne midtavak si Cain te, “Hanew ta. Bantey e ve te hazi ku?”10Ne migkeǥiyan te Megbevayà si Cain te, “Utew mezaat is mid-ulaula nu! Is lengesa te hazi nu ne henduen be te ebpehizuhizu he edsilutan ku is etew he midhimatey kandin.11Ne ǥuntaan tenged te mid-ulaula nu, edrewakan ku sikew ne edhimuwen ku he kenè ke en ebpekevasuk kayi te tanà su netiǥisan is tanà te lengesa te hazi nu he mibunù nu.12Minsan duen ibpemula nu kayi te tanà ne ebpengelinteuwan ku he kenè en ebeǥasan heini. Wazè en egketendù he egkeubpaan nu umbe ebpekeriǥuriǥu ke zà te minsan hendei zini te lumpad.”13Ne zutun migkaǥi si Cain diyà te Nengazen te, “Utew meveǥat is silut nu kediey. Kenè ku egkaantus.14Midsegseg a kenikew kayi he tanà wey nekepekeziyù ad kenikew. Ne wazè en egketendù he egkeubpaan ku, umbe ebpekeriǥuriǥu a zini te lumpad. Ne egkehimu he edhimetayan a te minsan hentei he egkeuma ku.”15Ne midtavak kandin dutun is Nengazen te, “Kenà egkehimu su ebpengelinteuwan ku he ke zuen edhimatey kenikew, Cain, ne kepipitu ku edtekepa is keveǥat te silut ku kandin.” Ne zutun midtuusan si Cain te Nengazen ne zutun ke egkeuma sikandin te minsan hentei ne egkeehè dan haazà is tuus ne kenè dan edhimetayan.16Ne mibpekeziyù si Cain te Nengazen, ne ziyà med-ubpà te tanà he Nod he ziyà te zapit te edsilaan te Eden.

Is menge Kevuwazan ni Cain

17Ne mid-uvayan ni Cain is esawa zin ne mibmeǥingey ne in-anak din is batà he maama ne migngezanan dan te Enoc. Ne midtukud dutun si Cain te inged ne migngezanan din te Enoc su in-iring din te ngazan te anak din.18Ne hein neuǥet nevuwad daan si Enoc ne nehimu sikandin he amey ni Irad. Ne si Irad, amey ni Mehuel; ne si Mehuel amey ni Metushael; ne si Metushael, ne amey ni Lamec.19Dezuwa is esawa ni Lamec, is sevaha, ne iyan si Ada, ne is sevaha, ne iyan si Zila.20In-anak ni Ada si Jabal he iyan nehuna te langun he ed-elima te menge ayam wey ed-ubpà te menge tulda.21Duen hazi ni Jabal he maama ne iyan ngazan din si Jubal, he nehuna te langun he metau he ebpen alpa wey ebpemulalà.22Si Zila mid-anak daan te maama ne iyan ngazan din si Tubal Cain he iyan dengan utew metau he pandey te ǥalang wey putew. Ne is etevey ni Tubal Cain ne iyan si Naama.23Ne zutun he andew migkaǥi si Lamec diyà te menge esawa zin te,“He Ada wey Zila, pemineg kew te egkeǥiyen ku.Midhimetayan ku is kengkenakan he midrasey wey mibpalì kedì.24Ne emun kepipitu egketakep is silut te edhimatey ki Cain,ne 77 is kegketakep is silut te edhimatey kediey.”

Is menge Kevuwazan ni Set

25Ne mid-umanan ni Adan uvayi is esawa zin he si Eva, ne mid-anak te maama, ne migngezanan din ki Set, he ke và dà egkeǥiya, imbeǥey, su ke sikandin te, “Mibeǥayan a te Megbevayà te anak he ilis ki Abel.” Umbe iyan heini mid-ulaula te Megbevayà su mibunù ni Cain si Abel.26Ne hein neuǥet, nevuwad daan si Set te maama ne migngezanan din ki Enosh. Iyan haazà timpu zengan he ebpuunan te menge etew is paaǥi te ked-azap he egemiten is ngazan te Nengazen dutun te kebpengumew-umew zan.
expand_more
Search