ይሁዳነ ትማሮ
1ሄ ዎደ ይሁድ ባ እሻታፐ ሻከትድ፥ አዱላማ ካታማን ደእያ ህራ ጌተትያ ኡራራ ዳናዉ ብስ።2ያን ይሁድ ሹአ ጌተትያ ካናነ ኡራ ናእዉ ማችስ።3እያ ይሁዳስ ቃንታዳ አደ ናአ የላሱ። እ ሄ ናአ ኤራ ግድ ሱንስ።4ቃስካ ቃንታዳ አደ ናአ የላሱ። እያ ሄ ናአ ኦናና ጋዳ ሱንሱ።5ዛራዳካ ሀራ አደ ናአ የላሱ። እያ ሄ ናኣ ሴላ ጋዳ ሱንሱ። ሄ ናአይ የለትያ ዎደ ይሁድ አክዚባ ቢታና።6ይሁድ ባ ባይራ ናአ ኤራስ ትማሮ ጌተትያ ማቾ እሚስ።7ይሁዳ ባይራ ናአይ፥ ኤር፥ ጎዳ ስንን ኢታ አስ ግድያ ግሾ፥ ጎዳይ እያ ዎስ።8ይሁድ ኦናናኮ፥ “ዎጋይ ነና ኪተይሳ መላ ነ እሻ ማቸራ አቃ። ነ እሻስ ናአ የላዳ እያ ሱን ፄግሳ” ያግስ።9ሽን ኦናን የለታና ናይት እያባ ግዶናይሳ ኤርዳ ግሾ፥ ባ እሻ ማቸራ አቅያ ዎደ ባ እሻስ ናእ የለቶና መላ ባ አቱን ሳአን ጉሴስ።10እ ኦዳባይ ጎዳ ስንን ኢታባ ግድዳ ግሾ፥ ጎዳይ እያካ ዎስ።11ሄሳፈ ጉየ፥ ይሁድ ባ ናኣ ማችዉ ትማሮ፥ “ታ ናአይ ሴል ድጫና ጋካናስ ነ አዋ ሶ ባዳ፥ አምኤተን ደኣሻ” ያግስ። ሄሳ እ ግዳይ፥ እካ ባ እሻታዳ ሀይቃነኮነ ግድ ህርግዳ ግሾሳ። ሄሳ ግሾ፥ ትማራ ባዳ ባ አዋ ሶን ደአሱ።12ዳሮ ዎደፐ ጉየ፥ ይሁዳ ማችያ፥ ሹአ ናእያ ሀይቃሱ። ይሁድ ባ ካዮ ዎድያ ኦንግድ፥ ባ ዶርሳታ እክስያ ሜድያ አሳታኮ ትምና ጌተትያ በሲ ባ ላግያ አዱላማ አድያ ህረራ ብስ።13አሳይ ትማሮ፥ “ሄኮ፥ ነ አዝና አዋይ ይሁድ፥ ባ ዶርሳታ እክስያ ሜዳናዉ ትምና ቤስ” ያግድ ኦድዶሶና።14እያ ባ አምኤተ ማኡዋ ላማዳ፥ ባና ባለናዉ ሻሸ ኤካዳ ጉሉንታሱ። ያታዳ፥ ትምና ኤፍያ ኦግያ ዶናን ደእያ ኤናይመ ካታማ ጋፃን ኡታሱ። ሄሳ እያ ኦዳይስ፥ ሴል ድጭድ ጋክንካ እያዉ ማቾ ግዳዳ እመቶናይሳ እያ ኤርዳ ግሾሳ።15እያ ባ ሶምኡዋ ጉሉንትዳ ግሾ፥ ይሁድ እዮ በእዳ ዎደ፥ ላይማ ማጫስ ግድ ቆፕስ።16ባ ናኣ ማችዉ ግደይሳ ኤሮና ደእሸ፥ ኦግያ ጋፃ ኢኮ ሺቅድ “ታራ አቃኔ?” ያግድ ኦይችስ። እያ፥ “ታኒ ኔራ አቅኮ፥ ነ ታዉ አይ እማኔ?” ጋዳ ኦይቻሱ።17እ፥ “ታኒ ታ መህያፐ እስ ኮለ ነዉ የዳና” ያግስ። እያ፥ “ኔኒ ሄሳ ታዉ የዳና ጋካናስ አይ ኦይኔ?” ያጋሱ።18እ፥ “አይ ኦይ?” ያግስ። እያ፥ “ነ ማታምያ እያ ጎሹዋራነ ነ ኩሽያን ደእያ ፃምአ ኦይ” ያጋሱ። እ ሄሳታ እምድ፥ ኢራ አቅስ፤ እያካ ቃንታሱ።19እያ ሄሳፈ ደንዳዳ ብዳፐ ጉየ፥ ባ ጉሉን ቃራዳ፥ ባ አምኤተ ማኡዋ ማአሱ።20ይሁድ ባ ኦይዳባ ሄ ማጫሴፐ ዛር ኤካናዉ ዴሻ ባ ላግያ ህራ ቦላ እዉ የድስ። ሽን እ እዮ ደምቤና።21እ ሄ ቢታ አሳኮ፥ “ኤናይመ ካታማን፥ ኦገ ዶናን ኡትዳ ላይማ ማጫስያ አዉኔ?” ያግድ ኦይችስ። አሳይ፥ “ላይማ ማጫስ ሀይሳን ኡባካ ባዋ” ያግዶሶና።22እ ይሁዳኮ ስሚድ፥ “ ‘ታኒ እዮ ደማብከ፤ ሄሳ ቦላካ ሄ ቢታ አሳይ፥ ላይማ ማጫስ ሀይሳን ኡባካ ባዋ’ ያግዶሶና” ያግስ።23ይሁድ፥ “ባ ኦይክዳይሳ ባዉ ኤኮ፥ አቶ ጊኮ፥ አስ ኑና ሚጫና። ህዛ ታኒ እዉ ዴሸ የዳስ ሽን ኔኒ እዮ ደማባካ” ያግስ።24ሄ አጌና ግድሽን አሳይ፥ “ነ ናኣ ማጫስያ ትማራ ላይማታዳ ቃንታሱ” ያግድ ይሁዳስ ኦድዶሶና። ይሁድ፥ “እዮ ካረ ከስድ ታማን ፁግተ” ያግስ።25እዮ ካረ ከስያ ዎደ፥ “ታኒ ቃንትዳይ ሀ ሚሸታ ጎዳሳ። ሀ ማታመይነ ፃምአይ ኦደባየኮ ኤራናዉ ዳንዳእኮ ኤራ” ጋዳ ባ አዝና አዋካ ኪታሱ።26ይሁድ ሄ ሚሸታ ኤርድ፥ “ታኒ ታ ናኣ ሴላስ እዮ እማቦና ግሾ፥ ታፐ እያ ፅሎ” ያግስ። ሄሳፈ ጉየ፥ እ ኢራ ዛሪድ አቅቤና።27እዉ የሎ ቃም ጋክያ ዎደ፥ እ ኡሎን መንተ ናይት ደኤይስ ኤረትስ።28እያ ማረትሽን፥ ኤንታፈ እሶይ ባ ኩሽያ ከስን የልስያራ፥ “ሀይስ ኮይሮ ከይስ” ጋናዉ ዞኦ ቃጭና ኤካዳ እያ ኩሸን ቃቻሱ።29ሽን እ ባ ኩሽያ ጉየ ኤክዳ ዎደ፥ እያ እሻይ ከይን እያ፥ “ኔኒ ዋናዳ ፖርፁ ጋዳ ከያዲ?” ያጋሱ። ሄሳ ግሾ፥ ፓረሳ (ፖርፁ ግስ) ጋዳ ሱንሱ።30ሄሳፈ ጉየ፥ እያ ኩሸን ዞኦ ቃጭን ደእያ እያ እሻይ የለትስ። እያ ሱንይ ዛራ (ዞኦ) ጌተትስ።