Read NAANAA 35

NAANAA35bqp_sim

Luda arubarikadana Yakubugu Bɛtɛli

¹Luda pì Yakubunɛ: Ǹ futɛ ǹ tá Bɛtɛli ǹ vutɛ gwe. Ǹ ma gbagbaki bo gwe, zaakũ ma bo ma summa gwe gↄrↄ kũ ntɛn bàa lɛ́ n vĩ̀ninɛ.²Akũ Yakubu pì a ↄndenↄnɛ kũ gbɛ̃ kũ ò kú kãaonↄ ń pínki: À buri zĩ̀tↄnↄ tãna kũ á vĩnↄ kↄ́tɛ à zú o à á pↄ́kasanↄ lilin kɛ.³Óni futɛ ò tá Bɛtɛli. Mani Luda gbagbaki bo gwe, zaakũ à kpàmai ma warikɛgↄrↄ zĩ, àdigↄ̃ kú kũmao gu kũ ma gɛn pínki.⁴Akũ ò buri zĩ̀tↄnↄ tãna kũ ò vĩnↄ kpàa kũ pↄ́sã kũ ò dananↄ, akũ à pↄ́ pìnↄ vĩ̀ gbiri lí gbáru Sɛkɛmu sarɛ.⁵Kũ Yakubu kũ a nɛ́nↄ dà zɛ́n, Luda tò vĩna wɛ̃tɛ kũ ò kú ń sarɛnↄ denↄ kũ̀ manamana, akũ ń gbɛ̃ke dí pɛ́tɛńyĩro.⁶Akũ Yakubu kũ gbɛ̃ kũ ò kú kãaonↄ ń pínki kà Luzu kũ òdi pi tera Bɛtɛli, Kanaanↄ bùsun.⁷À sa'oki bò gwe, akũ à tↄ́ kpà gu pìinɛ Bɛtɛli Luda, zaakũ gwen Luda bò à sùan gↄrↄ kũ àtɛn bàa sí a vĩ̀ninɛ.⁸Debora kũ à de Rɛbɛka gwàri ũ yã gà gwe, akũ ò a vĩ̀ gbiri lí gbáru Bɛtɛli sarɛ. Akũ ò tↄ́ kpà lí pìinɛ Ɔ́ↄdↄlii.⁹Luda bò à sù Yakubua dↄ a suna kũ Mɛsↄpↄtamiao gbɛra, à arubarikaa dàagu¹⁰à pì: N tↄ́n Yakubu, ama oni pinnɛ Yakubu doro, sé Isaraila. Lɛmɛ à tↄ́ kpànɛ Isaraila lɛ.¹¹Luda pìnɛ dↄ: Luda Gbãnasĩndapinkidemɛ ma ũ. Àgↄ̃ nɛ́ i àgↄ̃ kara. Buri ni bo n kĩnaa kũ buri dasinↄ dↄ, n buri kenↄ nigↄ̃ de kínanↄ ũ.¹²Mani bùsu kũ ma kpà Ibrahĩ kũ Isaakuooa kpámma kũ n burinↄ n ga gbɛra.¹³Akũ Luda fùtɛ à bò gu kũ à yã ò kãaon.¹⁴Yakubu gbɛ̀ɛ pɛ̀tɛ gu kũ Luda yã ònɛn dↄngupↄ ũ. À í tↄ̀a à nísi kùa.¹⁵Akũ Yakubu tↄ́ kpà gu kũ Luda yã ònɛn pìinɛ Bɛtɛli.

Rahila kũ Isaakuo ganaa

¹⁶Akũ ò fùtɛ Bɛtɛli ò dà zɛ́n. Kũ ò kà kãni kũ Ɛflatao, Rahila nɛ́'igↄrↄ kà, akũ nɛ́'i kɛ̀a zĩ'ũ.¹⁷Nɛ́'iwãwã a kũ̀ gbãna, akũ nↄgbɛ̃ nɛ́sɛtɛrii pìnɛ: Ǹsun vĩna kɛro, n nɛ́gↄ̃gbɛ̃ ì dↄ.¹⁸Rahila gbãna vĩ doro àtɛn ga, akũ à tↄ́ kpà a nɛ́ pìinɛ Bɛnↄni, akũ a de tↄ́ kpànɛ Biliaminu.¹⁹Kũ Rahila gà, ò a vĩ̀ Ɛflata kũ òdi pi tera Bɛtilihamu zɛ́n.²⁰Yakubu gbɛ̀ dↄngupↄ pɛ̀tɛ a miraa. Rahila mira gbɛ̀ɛ pì kú gwe ari kũ a gbãrao.²¹Isaraila ɛ̀ra à dà zɛ́n, akũ à bùraa kàtɛ Migidalɛda arɛ kpa.²²Gↄrↄ kũ à kú bùsuu pìn Rubɛni gɛ̀ɛ à wùtɛ kũ Bilao, Yakubu nↄ yìgisaride, akũ Yakubu yã pìi mà. Yakubu nɛ́gↄ̃gbɛ̃nↄ ì mɛ̀n kuri awɛɛpla.²³Lea nɛ́gↄ̃gbɛ̃nↄn dí: Yakubu daudu Rubɛni, Simɛↄ, Levi, Yuda, Isaka kũ Zɛbulunio.²⁴Rahila nɛ́nↄn Yusufu kũ Biliaminuo ũ.²⁵Rahila zĩkɛri Bila nɛ́nↄn Dã kũ Nafatalio ũ.²⁶Lea zĩkɛri Zilipa nɛ́nↄn Gada kũ Asao ũ. Nɛ́gↄ̃gbɛ̃ kũ ò ń í kũ Yakubuo Mɛsↄpↄtamianↄn gwe.²⁷Akũ Yakubu kà a de Isaaku kĩnaa Mamare. À kú Kiriataba kũ òdi pi tera Ɛblↄnu sarɛ, gu kũ Ibrahĩ kũ Isaakuo vùtɛn.²⁸Isaaku kà wɛ̃̀ bakɛ̃ndo²⁹à zĩ kũ̀ yúkuyuku, akũ à gà à kàkara kũ a gbɛ̃nↄo, akũ a nɛ́nↄ Isau kũ Yakubuo a vĩ̀.

NAANAA 35 / bqp_sim

Luda arubarikadana Yakubugu Bɛtɛli

Rahila kũ Isaakuo ganaa

NAANAA35bqp_sim