Camba30sav_wbt

1Wa Rasel hot ne a minɗi raak na Yaŋhooɓa kuɓu, a ayrukka taambɗoh ce Leya ŋ raaki aa raake kuɓu ; a woosa Yaŋhooɓa ne : « Ɓoo raakaat kuɓu, ŋ kaaniɗ waay ! »2Yaŋhooɓa ayrukka ɗe, a woosa ɗe ne : « Ñam Kooh yi hondoh ɗa raak kuɓu e ? »3Rasel loffa ne : « Huna na Bilha ñaamiŋ ngo, a raakiɗ to kuɓu koɗaah, po ŋ min nik ɓasil. »4Rasel eɗta Yaŋhooɓa ñaamiŋ ɗe ɓitiɓ, a hunnda na ɗe ;5yeem ammba rook, a raakiɗta Yaŋhooɓa kuɓu ƴaar.6Rasel woosa ne : « Kooh atte'iɗ, a eɗiɗ to keeh, a namiɗ to kerah po a oniɗ to kuɓu ƴaar. » Weɗ tah, Rasel teekka ɗe Daan (a atte'iɗ).7Bilha ambissa rook, a raakɗissa Yaŋhooɓa kuɓu ƴaar.8Rasel woosa ne : « Ŋ leberiɗ na taambɗoh ho leber miskiɗ po ŋ saahiɗ. » A teekka kuɓka Naftaali (ŋ leberiɗ).9Wa Leya hot ne a tufkiɗ, a minisɗi raak kuɓu, a ɓayya ñaamiŋ ɗe Silpa a eɗta Yaŋhooɓa ɗe ɓitiɓ.10Silpa raakiɗta Yaŋhooɓa kuɓu ƴaar,11Leya woosa ne : « Wii deey, wa muuɗ. » A teekka kuɓka Gaad (muuɗ).12Silpa raakɗissa Yaŋhooɓa kuɓu ƴaar,13Leya woosa ne : « Ŋ sumiɗ po ɓitiɓ ci hey wee ne ŋ sumiɗ. » A teekka kuɓka Aser (sum).14Wa raakka mbeh, ŋ jamanoona ɓaa nguɗohe bele, Ruben hotta kidig ci na paƴe ɓitiɓ minaaɗi raak kuɓu, na woyse mandargoor, a kommba yaay ɓa Leya ca. Rasel hotta ca, a woosa Leya ne : « On ndo ŋ mandargoor ciŋ kuɓkiŋ ɗa, ne wa neɓ ɗa ɗah. »15Leya loffa ɗe ne : « Naafi fu naaf ƴaar ro doyɗi ɗa e ? Po fu waaɗis ɓay mandargoor ciŋ kuɓkiŋ ngo. » Rasel woosa ɗe ne : « Mbaa Yaŋhooɓa neehaat na ɗa woti te fu eɗ to kidig ci. »16Wa Yaŋhooɓa puloh yohon ca na niina, Leya kaɗta coha na ɗe, a woosa ɗe ne : « Woti, fu na hee neehe na so laam, ŋ romiɗ mbari na mandargoor ciŋ kuɓkiŋ ngo. » Mbaɗi, Yaŋhooɓa neehha na Leya.17Kooh teyɗukiɗta Leya, a ammba rook, a raakissa kuɓu ƴaar, yi yatuusɗoh.18Leya woosa ne : « Kooh wirndiɗ to ŋ eɗi ŋ eɗ ƴaar ro ñaamiŋ ngo. » A teekka kuɓka Issaakar (wirndiŋ ngo).19Leya ambissa rook, a raakissa kuɓu ƴaar, yi yasna-yino'ɗoh.20A woosa ne : « Kooh tumɗiɗ to in yakak, kotii ƴaar ro hey yo meeɓle, laam ŋ raakɗiɗ ɗe kuɓu ƴaar yasna-yino. » A teekka kuɓka Sabuloon (a hey yo meeɓle).21Ŋ mirndaani a raakissa kuɓu ɓitiɓ a teekka ɗe Dinaa.22Ŋ ini kaɗ ŋ Rasel, wa Kooh tufuk ŋ in ciŋ ɗe, a teyɗukiɗta ɗe, a onnda ɗe, a minnda raak kuɓu.23Rasel ammba rook, a raakka kuɓu ƴaar. A woosa ne : « Kooh pulɗohiɗ to ŋ kaciikiŋ ngo. »24A teekka kuɓka Yuusufa (a ɓaataat), a kiimmba Nikiɗi ne a ɓaat ɗe kuɓu ƴaar.

Findi Yaŋhooɓa raakoh gatiŋ ɗe

25Ŋ finho raakuukaŋ Yuusufa, Yaŋhooɓa woosa Laban ne : « On ndo ŋ haad kur ɓoo.26Fu eɗ to ɓitiɓ ciŋ ngo na kuɓuuciŋ ngo ŋ coot, laam, ɓeɗ tahee so pangkiɗeeɗa ɗa ; fu ŋ haf fu, fu inhiɗ ini ŋ haɓɗiɗ ɗa. »27Laban woosa ɗe ne : « On ndo wa on ! Laam, ŋ markiskiɗ po ŋ hotiɗ ne, Nikiɗi barke'ɗiɗ to saguufu,28woya ini fu waaɗ wirndu, ŋ eɗ ɗa wa. »29Yaŋhooɓa woosa ɗe ne : « Fu ŋ haf fu, fu inhiɗ findi ŋ pangkiɗoh ɗa, na findi gatiŋ ɗa mirndoh mand saguuso.30Ini ƴissuuti fu raakee bala ŋ hayan ɗah, wa ɓaatkiɗ baahiɗ. Laam ina ŋ aasoh kahan fu poyi, Nikiɗi barke'ɗiɗ ɗa saguuso. Mbaa wa reyiɗ kotii nak ne ŋ pangkiɗ haf fo. »31Laban meekissa ɗe ne : « Mi na hee ɗa eɗe hend na ? » Yaŋhooɓa woosa ne : « Fu heyɗi so eɗe ali in, waaye fu teyɗuk ini maa hee ɗa woye ɗah, ŋ hey taalndiɗe, ŋ niiɗɗissee ɗa gatiŋ ɗa.32Ŋ woo ne, woti, ŋ hey aase ŋ gat ciŋ ɗa, ŋ puliɗ pe' ci na mbaal ci jen, ci nik njeenje nga na mbaal ci suusus ci, ca nik wirndiŋ ngo.33Kim fu hey marke wirndiŋ ngo ɗah, fu hey hote kiyurhiŋ ngo, laam fu hot mbaal ci nikɗi suusus mbaa pe' ci nikɗi njeenje nga ɗah, fu inah ne ca roku roku. »34Laban woosa ɗe ne : « Ee ŋ huniɗ nga. »35Waaye mbaɗi, Laban ɓayya suket ca na pe' ca njeenjeeca raak in yaanow jen, na mbaal ca suusus ca, a degga ca ŋ yaah kuɓuuciŋ ɗe.36A cootta na ɓa, ɓa ussa Yaŋhooɓa ini ree tiindu neeh kaahay, waaye Yaŋhooɓa taambkoheeɗa ini tas ŋ gataŋ Laban.37Weɗ a waakoh ɓi ndooɗ iiri ngaŋ kidig kaahay ɓaahaaɗi, ndooɗ "poopaalye" na ndooɗ "gerte-tuɓaaɓ" na ndooɗ "palatan" ; a ŋeeƴ-ŋeeƴiɗta ca po ndooɗ nu nga ɗah, raakka yaanow yaanow.38A ɓekka ca ŋ ɗooƴ hongla na anɗohse, ne ɗoopaat ca hay ane ɗah, ca hot ca laam, ɗoopaat ca meeɗ rapkoh ŋ ndaam ne ca hayya ane ɗah.39Ca rapkohha ŋ fiki ndooɗ ceem ɗah, ca na rime buul njeenje.40Yaŋhooɓa saɓsohha buul ceem, a yurhiɗta haf ciŋ ca ngaŋ njeenjeeca na suusus ca nikee ngaŋ gataŋ Laban. A waakoh gat haf ce ɗaa, ɓaahaaɗi na waŋ Laban.41Ɗoopaat ca kapiɗ ca heesa rapkohe ɗah, a ɓekiɗ ca ndooɗ ca ne ca rapkee ɗah, ca yurhiɗkoh na ca,42waaye ca nikka ɗoopaat ca ñiiɓiɗ ca ɗah, a ɓekɗuu ca ali in. A tumee ɗaa po ca kapiɗ ca nikka caŋ ɗe, ca ñiiɓiɗ ca nikka caŋ Laban.43Ŋ mirndaani a nikka heɗ raak-raak yakak, a raakeen ɓi gat pe' na mbaal na ɓi ñaam ƴaar na ɓitiɓ na ɓi ngeelemb na ɓi mbaam.
expand_more
Search