1GUIAU i taumasaraha ia arinai, Mamare aiarudi eai, ia ena numa‐lulu dobilana eai i babawa, asuasubenalai gigiborina eai.2Matana i helabaisinidi ie italau, hede tatao haiona matana eai se totoro. Ie itadi abo ena numa‐lulu wa dobilana i laugabaei ie tau hesabadi bena i hailobaidi, abo tano eai i tabaohu.3I ene, “Egu guiau e, ena matam eai ea henualolom, tabu em heaheari tauna u laugabaei.4Goila begana hage se leawa, aemiu aba deuridi, eo au aieawasi begana oeagi loguloguna eai ta.5Na aiai ami begana ea leama, amnamiu se lolo abotai emi eda eai au lau; paana au laoma’o ina emi heaheari tauna arinai.” To si ene, “Besi, doha u ribaei wa u ginauri.”6Abo Aberahama i heuheula ie lau numa‐lulu alona eai wa, Saraha arinai, eo i ene, “U heula falawa lolololona nonoina haiona u henonohaidi, u helasa eo keke u ginauridi.”7Aberahama abo i aitautau ena bulumakau eawoina arinai, bulumakau natuna esau ie abi, natuhariuna, lolo aririna, i mosei ena heaheari esau arinai, ia ie abi heulai bena i henonohai.8Abo bata eo susu ie abi, eo bulumakau natuna se henonohaiya’o wa, eo i toredi matadi eai wa na isi se aiai.9Se ribalau ia arinai si ene, “Monem Saraha wa ia haedi?” Ia i ene, “Ia hede numa‐lulu alona eai.”10I ene, “Abo ea uioma arimiu eai, borimai sigana eai, monem Saraha abo natum i labasi.” Na Saraha wa ia numa‐lulu guduna murina eai i ata’atai, dagelana eai.11Aberahama eo Saraha se tautaubada se sinesinebada ariri, eo edi borimai se gamagari; sisine kamanidi wa Saraha arinai i lautom’o.12Arinai Saraha nuaboeana eai i maruhi, i ene, “Ea sinesinebada’o, eo monegu i tautaubada’o, abo gonoamai kodena ai lobai?”13GUIAU abo ie riba Aberahama arinai, i ene, “Paana saha Saraha i maruhi, eo i ene, ‘Mamohoi abo merumeru ea labasi, ea sinesinebada’o ta?’14Au ene bena ginauri esau i piripiri ariri GUIAU arinai? Huiana se tauribaei, arinai abo ea uioma, borimai sigana eai, Saraha natuna tau abo i abi.”15Na Saraha i halele, i ene, “Eau nige ea maruhi” — paana i matausi. GUIAU i ene, “Nige’e, na u maruhi wa!”
Aberahama Sodoma Enana i Aiboda Gadogadora
16Abo tatao wa se torohai, se italau Sodoma edana eai; Aberahama maedi se lau, bena edi dobila eai i healatudi.17GUIAU i ene, “Laulau abo ea ginauri wa, abo ea toreyamui Aberahama arinai, wa?18Paana ia abo i hemala basileia saesaena eo gigigiborina, eo tanoubu basileiadi gamagaridi abo se helolouioidi ia debana eai.19Nige’e, paana ia egu hineri tauna, abo nanatunayao eo ena numa tataodi murina eai i heatadi GUIAU ena laulau se sogohidi, laulau dudurai eo abi dudurai hinage; bena GUIAU saha i ribahesunumadi wa abo i hetubudi Aberahama arinai.”20Abotai GUIAU i ene, “Lauhegiru Sodoma eo Gomara aridi eai i lai ariri, paana edi baaea i lai ariariri,21Arinai abo ea dobi ea ita, lauhegiru i laoma arigu eai wa, mamohoi se ginauri ede; eo ena nige’e, abo abina ea ata.”22Arinai tatao wa se sinibui, se lau Sodoma hesabana; na Aberahama sora i totoro GUIAU matana eai.23Aberahama i sigilaoma i ene, “Mamohoi abo tatao duduraidi u hebaaeadi maediyao tatao baaeadi wa?24Ena taba ta ene tatao duduraidi tatao‐labui‐se‐mate‐saudoudoi ma miadi eanua eai me, abo eanuana u hebaaea, taba nige u nuatoatoaei wau tatao duduraidi tatao‐labui‐se‐mate‐saudoudoi miamiadi wa debadi eai?25Oa taba nige em laulau doha nei, laulau dudurai tataodi eo laulau baaea tataodi u unuesegaidi doha tatao baaeadi se heai gonogonoaiei! Taba nige em laulau doha nei! Tanoubu maudoina Tauheduduraina abo nige ena abi i dudurai?”26Abo GUIAU i ene, “Ena Sodoma eai tau laulau dudurai tatao‐labui‐se‐mate‐saudoudoi ea lobaidi, eanuana abo ea nuatoatoaei, isi debadi eai.”27Aberahama riba ta i heuio i ene, “U ita, nuagu ea tore ina, bena Guiau arinai ea riba, eau doha wenu eo ahu mo.28Ena taba ta ene, wau tau laulau duduraidi tatao‐labui‐se‐mate‐hesaudoudoina wa haligigi wa nige’e? Abo eanua maudoina u hebaaea, paana haligigi wa nige’e?” I ene, “Taba nige ea hebaaea ena tatao‐labui‐se‐mate‐haligigi nei eai ea lobaidi.”29Abo i ribauio, i ene, “Ena taba tatao‐labui‐se‐mate mo u lobaidi nei eai?” I heuio i ene, “Tatao labui‐se‐mate mo debadi eai taba nige eo ginauri.”30Abo i ene, “Agutoi, tabu Guiau i ouyalayala, na egu riba ea ribaei mo. Ena tau esega‐i‐mate‐saudoudoi se lobaidi nei eai?” I heuio i ene “Taba nige ea ginauri, ena tau‐esega‐i‐mate‐saudoudoi ea lobaidi nei eai.”31Abo i ene, “U itagu ta, awagu ea dabariyao Guiau arinai. Ena taba tau‐esege‐i‐mate se lobaidi?” I heuio i ene, “Tau‐esega‐i‐mate debadi eai taba nige ea hebaaea.”32Abo i ene, “Agutoi, tabu Guiau i ouyalayala, na ma esegana ta ea ribauio. Ena taba saudoudoi se lobaidi nei eai?” I heuio i ene, “Saudoudoi debadi eai taba nige ea hebaaea.”33Abo GUIAU ena eda eai ie lau, huiana maena Aberahama se ribariba lautom; na Aberaham ie uio ena abamia eai.