መተ ማፃፋ16gof_etw
አጋሮነ እስማኤላ
1አብራመ ማችያ ሶራ እያዉ ናአ የላቡኩ። ሽን እዉ ግብፀፈ ይዳ አጋሮ ጌተትያ ጋንዶይ ደአዉሱ።2ሶራ አብራመኮ፥ “ታኒ ናአ የሎና መላ ጎዳይ ታና የሎ ድግስ። ኔኒ ባዳ ታ አይለራ አቃ፤ ታኒ እ ባጋራ ናአ ደማነኮነ ኦን ኤር” ያጋሱ። አብራመይ እ ቆፋ ኤክስ።3አብራመይ ካናነ ቢታን ታሙ ላይ ደእዳፐ ጉየ፥ እያ ማችያ ሶራ ግብፀፈ ይዳ ባ አይልዉ አጋሮ ባ አዝናስ ማቾ ኦዳ እማሱ።4አብራመይ አጋሮ ኤክስ፥ እያካ ቃንታሱ። እያ ባዉ ቃንትዳይሳ ኤርዳ ዎደ ባ ጎዳትዉ ካሱ።5ሶራ አብራመኮ፥ “ሀ ቆሁዋስ ታና ጋዳይ ነና፤ ታኒ ታ አይልዉ ነዉ እምን፥ እያ ቃንትድይሳ በአዳ ታና ካዉሱ። ነባነ ታባ ጎዳይ ፕርዶ” ያጋሱ።6አብራመይ ሶራኮ፥ “ሀኖ በአ ነ አይልዉ እያ ነ ኩሸና፤ ነና ሎእዳባ ኦ” ያግስ። ሄሳፈ ጉየ፥ ሶራ አጋሮ ኡንኤን ያፐ ከያዳ ባቃታሱ።7ጎዳ ኪታንቾይ አጋሮ መላ ቢታን፥ ፑልቶ ሃ ማታን ደምስ፤ ሄ ፑልቶይ ሹራ ቢታ ኤፍያ ኦግያ ማታን ደኤስ።8ኪታንቾይ አጋሮ፥ “ሶራ አይለተ፥ አጋረ፥ አዉፐ ያዲ? አዉ ባይ?” ያግድ ኦይችስ። አጋራ ዛራዳ፥ “ታኒ ታ ጎዳተ ሶራፐ ባቃታስ” ያጋሱ።9ጎዳ ኪታንቾይ ኢኮ፥ “ነ ጎዳተኮ ስማ ባዳ እዉ ሃረታ” ያግድ ኦድስ።10ጉጅድካ ጎዳ ኪታንቾይ ኢኮ፥ “ነ የለተ ኦንካ ታይባናዉ ዳንዳኦናዳ ኦዳ ዳርሳና” ያግስ።11ቃስካ ጎዳ ኪታንቾይ እዮ፥“ሄኮ ኔኒ ቃንታዳሳ፥ኔኒ አደ ናአ የላና።ፆሳይ ነ ዋሱዋ ስእዳ ግሾእያ ኔኒ እስማኤላ ጋዳ ሱንና12እ ባዞ ሀረ መላ ግዳና፥እ ባ ቀስያ አሳ ኡባ ቦላ ደንና፥ቃስ አሳ ኡባይካ ባንታ ቀስያ እያ ቦላ ደንና።እ ባ እሻታ ኡባራ እፆን ደአና”ያግስ።13አጋራ ባራ ኦደትዳ ጎዳ፥ “ኔኒ ታና በእያ ፆሳ” ያጋዳ ፄጋሱ። “ታኒ ታና በኤይሳ በአስ” ያጋሱ።14ሄሳፈ ደንዶይሳን ሄ ፑልቶ ሃይ፥ “ታና በእያ ደኦ ፆሳ ፑልቱዋ” ጌተትድ ፄገትስ። ሄ ሃ ፑልቶይ ቃደሳፐነ ባሬዳፐ ግዶን ደኤስ።15አጋራ አብራመስ አደ ናአ የላሱ፤ አብራመይ የለትዳ ናአ እስማኤላ ግድ ሱንስ።16አጋራ አብራመስ እስማኤላ የልያ ዎደ አብራመስ ላይ ሆስፑን ታማነ ኡሱፑና።