1Gubuꞌ nam igi ntsupa sib raiyi da Yawe ini nan da Abram i nam puafuban ibiani,“Abram, agu anungꞌ ratan u.Dzi su u ngantsamda u nanggam bini santan wainggan.”2Da bitsintaꞌ Abram ini binaꞌ, “O dzi Nifutsarifangꞌ Yawe, u nanggam bini u nida rima da dzi igi burima dzi sib bida anungꞌ i dzi garam yami bingan ani? Da dzi garam gumangꞌ Elieser, garam Damaskus ugu, bungꞌ asu wain i dzi nam bunumpangꞌ santan da gubuꞌ dzi mampan.3I Agu anungꞌ irim mamaꞌ narun bits da dzi u, ibinigi da dzi garam gumangꞌ mangan bungꞌ asu wain i dzi nanggangꞌ santan.”4Da Yawe nanggan itip iba rutin ibiani, “Garam gum arigi wasangꞌ suda wain i u nam bunumpam u; u biꞌ gam rururungan angu bungꞌ asu wain i u nanggam santan.”5Da Yawe iyu Abram iwaꞌ ifa manaꞌ da ini rutin, “Wadantangꞌ wayab gunungun da wafaris ngantam santan aga, bida u sangꞌa i farisa sib angu fantsupan. Waringantin! U yanginggam bungꞌ awaꞌ nabinigi.”6Abram irim runggan santan da Yawe nanggan nidan i bungꞌ awaꞌ nasu nidzun, ibinigi da Yawe ifaringꞌ arangan garam rururungan.7Yawe itip ini da arangan ibiani, “Dzi Yawe, Dzi aruani iyu agu sinungꞌ gamp Ur mingꞌa Kaldia ugu iba ani i rima intap ani da agu i suda u nanggam rururungan.”8Da bitsintaꞌ Abram ini, “O dzi Nifutsarifangꞌ Yawe, dzi bu sruꞌagin bida anungꞌ i dzi suda wain gin?”9Ibinigi da Yawe ini da Abram, “Wayu apu bida ani: makau rinan naru faꞌ mangan da nuning rinan mangan da dumpa arapuꞌ mangan, udzufan suda iruꞌ da bits, nampruꞌ da ngasabusir da ngarumum naru faꞌ mangan— naba da dzi.”10Abram iyu apu ibi Yawe nidan igi iba da Arangan, da idumpu wasaꞌ farab ifa mungaꞌ da mungaꞌ da irants i marafain da marafain. Da apu dzuf iruꞌ igi isintungꞌ santan angu.11Da watsawits idzuf iruꞌ i gadan da Abram idaru rai gin.12Gubuꞌ inang i ruꞌan da Anutu inang da Abram igingꞌ marampruꞌ funub da itsangan nam mimin tringtringan tsiraꞌ bingan ibuafir arangan sib da irat funub angu.13Da Yawe ini da arangan imingꞌ nam puafuban ibiani, “Waringantin! U yangin rusam bungꞌ ampa nabi garam marawampua namingꞌ garam gamp mangan intapan. Da garam intap igi bungꞌ arasu da nanang i nanggan mpadan namais, da nabuaringꞌ gum barabin tsiraꞌ nasangꞌ udzuf 400.14Da bitsintaꞌ dzi bungꞌ arim barabin tsiraꞌ mungaꞌ da garam intap igi nanga yaba i u yangin rusam. Da u yangin rusam tanginda intap igi rai da bungꞌ aba nanting da nam bunump tsiraꞌ.15Da bitsintaꞌ Abram, u bungꞌ ampa gubuꞌ guntiꞌ bingan ruta nan nufan bini nasangꞌ agu fufida funub da wamus mampan da narim agu.16Da udzuf 400 ba ntsupa sib da u yangin rusam bungꞌ atip abau intap ani, da gubuꞌ bampan aga garam Amor nanggan maisan bawaꞌa ampapan da Dzi bungꞌ asiat ribarangan rai.”17Da gubuꞌ ruꞌa sib da nam mimin tringtringan da gur mangan dugunt waꞌa gin impruꞌ da dzaf bururungan iwaꞌ da iyung wasaꞌ i apu Abram safan ugu.18Da gubuꞌ arigi, Yawe inang nan utusa i ruan gin da Abram da ini, “Dzi tangin intap ani da u yangin rusam, da ampapan imingꞌ mpui Idzip da ifawaꞌ mpui tsiraꞌ Yufretis—19intap garam Ken da Kenis, Kadmun,20Hit, Peris, Refa,21Amor, Kanan, Girgas da Dzebus gin isu ribarangan nanggan.”