Naninge sinang kavuaing tee-koo kapooꞌkoo keempumaung-koo
1Mmaikoriꞌ ee, diiꞌke niiꞌnung narung orakaꞌ nkoarako ooverira deekoꞌ diiꞌ Tanuaang Meekung siomperimainge tampaꞌ pakueri koong-antaveriaing dooroomperi, tarerariri diiꞌ teeꞌ nariꞌ napoꞌ duaꞌdariꞌneenga.2Narunaꞌ narunaꞌ pakureeriai mankiꞌkoo. Teeꞌ nkorarima diiꞌke dupe-antaveriainaꞌ tee Karistooꞌnung boto.3Niiꞌnung narunge aaꞌpumaatoꞌneeng, “Ning narung kapooꞌ,” nka tee kapooꞌpinaꞌ oroꞌparavaꞌ. Teeꞌ nkoarama tee eeꞌnara baka tosi-antavarapeuꞌ.4Niiꞌnung naning ninka mintarama doturarama daangantaravaukaꞌ, teka tutung norunoruꞌdaravaing dakaang nko-nko-koo, tampaꞌ otoing deekoꞌ eeꞌnaꞌkoo doturoturaravai makosi.5Kumponinge kantemuri mankiꞌ nka-koo bamuruꞌ. Teeꞌkoo daangantariaꞌ piaareeri pakureerimaatoai.6Aaꞌnoaing tee naning diiꞌ Kumponing bakaang kara nau-antarurimaung pakueri mooꞌeriainge.7Niiꞌnamuriiꞌ onoue tosiruriaukaꞌ, aiꞌ Kumponing tee daang-pinaꞌ oroꞌanta deeaꞌ. Tee-koo kapooꞌkoo naninge keempuaing-koo tee tee-koo eeꞌnung-koo sinang kavuaing.8Dake dakaang mono narung dotu-anta-koo noruꞌei keenkiaing deekoꞌ dake teieta mono-ita orari-anta kaveaing simpeꞌmuriainaꞌmung. Eeꞌnoko dake Tanuaang Meekung dotu-anta-koo noruꞌei keenkiaing deekoꞌ dake teieta Tanuaang Meekung-eta domaang oparavaung kaveaing.9Tee tee enang kakaruaꞌmoriaukaꞌnung tampaꞌ nko-koo damaꞌke makosinaveraaꞌkoo tampaꞌ kavampiainaꞌ kontemoriaukaꞌnung deekoꞌ.10Teeꞌkoo enang batei otoꞌmemuri tampaꞌ nkoarampiai ookara nantoong, baruꞌnooꞌ teing niiꞌmaiaꞌkooning masikaꞌantanava-koo kuung otoromaing.Paulaꞌ Dotuaruꞌnaꞌ Karistooꞌke Aaꞌbarataꞌkoo Boora Simpiriꞌantamurioꞌ
11Ooveriko enang daari-nko pariꞌamira daari pankaveroveroiꞌ narunge daarirerompimang nkaang birenge taaꞌniꞌantamari.12Nantoong Kumponing ninka naroompariiꞌnaang Karistooꞌ aaꞌbarataꞌkoo booꞌparuꞌ baitoaara daankiampiko teing Juꞌnupoong iiravoromaung dopaꞌtotoꞌ minkuampiaruko, Moosesi-nung boto dovang ninka. Teeꞌkoo niiꞌninge eturaarimaung dopaꞌ totoꞌkoo tampaꞌ oroꞌpariiꞌ naang Juꞌnupoong-koo. Maroita, Juꞌnupoonge turampaariarooꞌnaang teing.13Teinge eeꞌninge dopaꞌ totoꞌparira boto biiꞌka siompaavaunge, tamung diiꞌ eeꞌning dopaꞌ totoꞌkoo piavoromaung diiꞌ teeꞌ nkorariko miring pankaing nkavaavaꞌnaang.14Nka ning temuriiꞌ aarumo piamoaung bakei, Karistooꞌ aaꞌbarataꞌkoo booꞌnavung masikaꞌantavamaung-koo deekoꞌ, miring pankaing nka-koo makosi. Tevunge kansiꞌnung aarumo ninka siivenkeꞌmeeresi aaꞌnong kansiꞌnung aarumo taakavaring-pinaꞌ otong ning-koo eeꞌnoko ning taakamaring-pinaꞌ oꞌnong tee-koo.15Tenaankai aaꞌnoko dopaꞌ totoꞌ eeꞌnoko dopaꞌ totoꞌ deeaung kapooꞌ basi-antavureaung, teka napoꞌ nerakaꞌpari nkoniiꞌke deekoꞌ makosi.16Mooa eeꞌnoko piaa diiꞌkoo otoaing aung eeꞌnara aarumo minkuansinung siomperimaing-koo, teing Isireeli masikeng-koo Kumponing bakanavitu-koo.17Enang-eta deto ning naninge poreꞌantamuaukaꞌnung, aiꞌ ninge tee nkaang mono-koo Karistooꞌkoong taaꞌmenanka taaꞌniꞌanta-pinaꞌ kompansi oꞌnong.18Diiꞌ mmaikoriꞌ, tee biraanke niikaang Ovoring Jiisuuꞌ Karistooꞌ bakaang diikaang tanuaang ninka nariꞌ otomatoaing. Masikung.