1Kiristaani naafiɗ ɓoo ne ɓoo raak haf ɓoo. Kon, ndengɗukaat, te kinaat dokkis ɗu nikis ñaam.2Sikɗukaat to ! Mi yi Pool, ñam na woyee ɗu wa : Ɗu teyɗuk nguɗu ɗah, Kiristaani heyɗi ɗu raakɗisse njiriñ.3Te mi woytohis ɓo' nu teyɗuk nguɗu ɗah : Ɓoyeem inhaat ne a joy joy taambiɗ nakoh ciŋ waasi findi ca hend jen.4Ɗu ɓi na waake kiyurah taamboh ŋ nakoh ciŋ waasi, ɗu saɓsohuuɗ na Kiristaani ; ɗu ñakiɗ baahohiŋ Kooh.5Ɓoo nak, e Fuuɗsi Hoolohngaani on ɓoo oolki ɓoo ooluk ne Kooh hey ɓoo one kiyurah taamboh ŋ kosi ɓoo kos, te ɓoo ɓii seka na seesuk.6Ini raak njiriñ ngaŋ ɓi nik ŋ Kiristaani Yeesu, wa nguɗuk haa, wa nguɗkaaɗi haa, wa kosi na tume sagu waaɗoh.7Ɗu nikee ŋ waas baahiɗ ! Ya ɓa tufkiɗ ɗu, po a hondohha ɗu kerhiɗ keeh ki ?8Ini ɓek ɗu ŋ inii pulohɗi ŋ Kooh yi ɓeeɗuk ɗu.9Findi wa na woyohse : Lawiir ƴissuut na guufɗe muni jen.10Mi, ŋ oolkiɗ ɗu, ŋ niki ɓoo nik ŋ Heɗi. Ŋ inhiɗ ne ɗu hunan na so. Waaye ɓoyi yahroh hel ciŋ ɗu, ɓo' nu a min ki nik ɗah, Kooh hey ɗe wa wirnde.11Ɓaah ciŋ ngo, ini kaɗ nga so, nikee ne ŋ ris ɓeeɗkoh nguɗuk ɗah, kon, ŋ heeɗi tolfiɗasse poyi. Mbaa, yegɗohi mi na yegɗohe kakaan kiŋ Kiristaani ŋ kurwaana, heeɗi kafndisse ali ɓo' !12Ɓi na ɓaye ɗuuɗ ŋ ɗooƴ ɗu, cey, ɓa mineen nguɗuk po ɓa ɓuc haf ɓa ɗah !
Fuuɗsi Hoolohngaani na taambiɗ kiñin
13Ɗu nak, ɓaah ciŋ ngo, Kooh ɓeeɗkiɗ ɗu ne ɗu raak haf ɗu ; waaye kinaat tonduk ŋ ineem, ɗu taambɗee kiñin ciŋ ɗu ; yaa nu nga ɗu ɗah, waaɗi a waaɗ morom ce tahaat po a taambkohee ɗe.14Nakoh ciŋ waasi jen, ɓo' miniɗ ca rohƴiɗ ŋ woo yino, an : « Waaɗa morom fu findi fu waaɗoh haf fu. »15Waaye ɗu ɗoɓtiɗohe, ɗu sifiñsohtiɗohee ɗah, wortukaat yahrohtiɗoh.16Inii weɗ ŋ woo : Pesohaat Fuuɗsi Hoolohngaani, mbaa ɗu taambɗanɗi kiñin ciŋ ɗu.17Laam, ɓoo taambiɗ kiñin ciŋ ɓoo ɗah, in ci ɓoo waaɗ na ci Fuuɗsi waaɗ suftiɗkoh suftiɗkoh ; waaɗ-waaɗ ci kanak ci suftiɗkoh suftiɗkoh, po ɗu na tumeeɗi ini ɗu waaɗ.18Waaye ɗu faɗ Fuuɗsi, a adgiɗ ɗu ɗah, nakoh ciŋ waasi yilifɗi ɗu.19Ɓooɓi jen inhiɗ ini taambiɗ kiñin na rime : Faankoh sangohuuɗ, usɓiɗ haf fu, cakaay,20ñaamuk kooh ci nikaaɗiici, honjomoh, sangtiɗoh, lahtoh, siisoh, yooɓ ayruk, nook ŋ haf fu, saɓsoh ɓo', ɓek kerhiɗohaaɗi ŋ mboolo,21siis, [apoh,] laar, mbuumbaay na in ci mand na ca. Findi ŋ woytohee ɗu, mi yii woytohis ɗu : Ɓooɓi na tume in ceem, ɓa raakanɗi ɓak ŋ Nguuriŋ-Kooh.22Waaye ini Fuuɗsi na rime ŋ ɓoyi, weɗ in cii : Waaɗoh, sum, jam, min muñ seke, baah, haltukoh, car oolku,23nik ɓo' soosiɗ, min amb haf fu ; ali waas sangɗi in ceem.24Ɓi ɓaah ŋ Kiristaani Yeesu nak, ɓa daaƴiɗ ŋ kurwaa ini meeɗ ɓa ɓek ŋ taambiɗ kiñin ciŋ ɓa na waaɗ-waaɗ ciŋ ɓa na maɗ-maɗ ciŋ ɓa.25Ɓoo pesohee Fuuɗsi ɗah, ɓoo namaat taambiɗ Fuuɗsi.26Ɓoo kinaat hotsiɗuk ; ɓoo faɗaat waak lahtoh, ɓoo kinaat siisoh.