1ታ ገይስ ሀይሳ። ላተይ ናኣ ግድ ደእሸ፥ ሻሎ ኡባይ እያባ ግድኮካ፥ እ አይለፈ አይኮካ ዱማተና።2ሽን እያ አዋይ ግዳ ዎደይ ጋካናዉ እ ሀዳራ ኤክዳይሳታ ኩሸንነ ናገይሳታ ኩሸን ደኤስ።3ሄሳዳካ፥ ኑኒ ናአተን ደእያ ዎደ አላምያ ዎጋስ አይለትድ ደእዳ።4ሽን ዎደይ ጋክዳ ዎደ ፆሳይ ህገፈ ጋርሳን፥ ማጫሳፐ የለትዳ ባ ናኣ ኪትስ።5እ ሄሳ ኦዳይ፥ ህገስ ሃረትድ ደኤይሳታ ዎዛናዉነ ኑና ባ ናይታ ኦናሳ።6ኑ ፆሳ ናይታ ግድያ ግሾ፥ “አባ፥ አዋዉ” ግድ ፄግያ ባ ናኣ አያና ኑ ዎዛና ግዶ ኪትስ።7ሄሳ ግሾ፥ ህዛፐ ኔኒ ፆሳ ናአፐ አትሽን፥ አይለ ግዳካ። ኔኒ እያ ናአ ግድኮ፥ ፆሳ ላተይሳ ግዳዳሳ።
ጳዉሎስ ጋላትያ አሳስ ቆፔስ
8ህንተ ካሰ ፆሳ ኤሮና ዎደ ፆሰ ግዶናይሳታስ አይለ ግድድ ሃረትደታ።9ሽን ሀእ ህንተ ፆሳ ኤርደታ፤ ኡባራካ ፆሳን ኤረትደታ። ያትን ፓናነ ጎኦና አላመ ዎጋታኮ ጉየ ዋንድ ስመቲ? ዎ ኤቅድ፥ ዋንድ ኤንታዉ አይለ ግዳናዉ ኮዬቲ?10ዱማ ግድዳ ጋላሳታ፥ አጌናታ፥ ዎደታነ ላይታ ህንተ ሎይ ቦንቸታ።11ታና ህንተባይ ያሼስ፤ ታ ህንተዉ ጮ ዳቡራድናሻ?12ታ እሻቶ፥ ታ ህንተዳ ሀንዳ ግሾ፥ ህንተካ ታዳ ሀንተ ጋዳ ህንተና ዎሳይስ። ህንተ ታና አይብንካ ቆህቤከታ።13ታኒ ኮይሮ ሀርገታሸ ህንተዉ ዎንገላ ኦድዳይሳ ህንተ ኤሬታ።14ታ ሀርገይ ህንተዉ ፓጨ ግድኮካ፥ ታና ሳለትበከታ፤ እፅበከታ። ሽን ታና ፆሳ ኪታንቾ ዎይኮ ክርስቶስ የሱሳ ሞከይሳዳ ሞክደታ።15ያትን፥ ሄ ህንተዉ ደእያ ኡፋይሳይ ኡባይ አዉ ብዴ? ህንተዉ ዳንዳኤትዳኮ፥ ህንተ ታዉ፥ ህንተ አይፍያ ከስድ እምያኮ እፆናይሳ ታ ማርካታይስ።16ያትን፥ ታ ህንተዉ ቱማ ኦድዳ ግሾ ህንተዉ ሞርከ ግዳድናዬ?17ሄ አሳት ህንተና ባንታኮ ዛራናዉ ኮዮሶና፥ ሽን ኤንታ ቆፋይ ሎኦሳ ግደና። ኤንታ ቆፋይ ህንተና ሻካናሳነ ህንተ ኤንታዉ ቆፓና መላ ኦናሳ።18ሎኦባ ኦናዉ አሞትኮ ሎኦ፥ ሽን ሄስ ታ ህንተራ ደእያ ዎደ ፃላላ ግዶናሽን ኡባ ዎደ ግዶ።19ታ ሲቆ ናይቶ፥ ክርስቶስ ህንተናን ምስለታና ጋካናዉ ማጫስ የሎስ እቀተይሳዳ ታ ህንተ ግሾ እቀታይስ።20ህንተባይ ታዉ ሀድርን ታ ኡንኤታስ፤ ሀእ ህንተ ግዶን ታ በንታዳ ሸነታዳ ኦድያኮ አይ መላ ዶሳይናሽን።አጋሮነ ሳሮ
21ሙሰ ህገን ሃረትድ ዳናዉ ኮየይሳቶ፥ አነ ታዉ ኦድተ፤ ህገይ አይ ግያኮ ኤረከቲ?22ጌሻ ማፃፋይ፥ “አብራሃመስ ጋንደፈነ ጎዳተፈ የለትዳ ናምኡ ናይት ደኦሶና” ያጌስ።23ጋንደ ናአይ አስ ናአ የልያ ማራን የለትስ፥ ሽን ጎዳተ ናአይ ፆሳ ኡፋይሳ ቃላን የለትስ።24ሀ ማጫሳት ናምኡ ጫቆታስ ሌምሶ ግድድ ኤከቶሶና። ኤንታፈ እስንያ፥ ሲና ዙማፐ ይዳራ፥ ባ ናይታ አይለተስ የላሱ፤ እያካ አጋሮ።25አጋራ አራበ ቢታን ደእያ ሲና ዙማን ሌምሰታዳ ሀእ ደእያ የሩሳላመ ዳናዉሱ። አይስ ጊኮ፥ እያ ባ ናይታራ አይለተን ደአዉሱ።26ሽን ሳሎን ደእያ የሩሳላመይ አይለተን ደኡኩ፤ እያ ኑ ኡባስ አዮ።27ጌሻ ማፃፋይ፥“ናተ፥ የሎና ማይንተ ኡፋይታ፤ናተ እቀታ ኤሮናረ እልላ።አዝናራ ደእያ ማጫሴፐ፥አዝን ባይና ማጫሴስ ናይት ዳሮ” ያጌስ።28ታ እሻቶ፥ ህንተ ይሳቃዳ ፆሳ ኡፋይሳ ቃላን የለትዳ ናይታ።29ሽን ሄ ዎደ አሳ ማራዳ የለትዳይስ፥ አያና ዎልቃን የለትዳይሳ ጎድስ። ሀችካ ሄሳ መላ።30ሽን ጌሻ ማፃፋይ ዎይጊ? “ጋንደ ናአይ ጎዳተ ናኣራ እስፈ ላቶና ግሾ፥ አይልዉ እ ናኣራ ዎላ ከሳ የዳ” ያጌስ።31ሄሳ ግሾ፥ ታ እሻቶ፥ ኑኒ ጎዳተ ናይታፐ አትሽን፥ ጋንደ ናይታ ግዶኮ።