GALATA2kmg_png

Paulozi Jerusalem haeo aposolo gâcne iqic-jopawec

1Ehame jara 14 tarame Jerusalem haeo mocwâc fepemurâ Banaba â Tito rocjofape mâmâc fembeŋ.2Erâ i mâc mi epo, Wofuŋzi dâŋ mufua-narehuc bufahac qanareme fepo. Ferâ qâpuc jaŋerao Biŋebiaŋ musaweekopac i mutaniŋke-jarepo. Micne šâŋe biŋehec jaŋe bucko wâc ejarekicne, jaŋe hâcne manapie mi sâckeme gie maŋgâŋ bawefuhuc jupo iŋuc ezacte.3Jupe juju-nane Tito e Grikŋizi opâ ruakicne juwec, eme e wâc sahacnao mahec eocte mi mucnembiŋ.4Eme nâŋere giemaŋko mitiŋic burecnezi raširâ, nâŋe Kristo Jesure erâ rambaŋ juhapene rucko honetâc-nâporâ Mosere kiŋaŋ qaqa bacnâpozo mueŋgopieŋ,5ŋic izi hâcne bawahac-nâpozo mupie nâŋe Biŋebiaŋzi ŋoŋerao bâbâsifucnehec ezacte moc mi docke-jarembeŋ.

Aposolo gâcne jaŋe Paulo gie-ticnere manapie sâckewec

6Eme ŋic micne jaŋe mârâc jaha iŋuc me iŋuc jumbiŋ, no irec manape hawarine moc mi eekac, Anutuzi iŋuc jaha sahackopec honec-nâpome bârâwiŋ mi eekac. Ŋic micne jaŋe hâcne dâŋ furune mi šuhucke-narembiŋ.7Aricne, šiŋuc ine manambiŋ: Anutuzi Petoro ŋic mahec jaŋerao Biŋebiaŋ muiŋneocte mucnewec, iŋuc jaha no ŋic ma tâmiric jaŋerao muiŋnepere munarewec.8Ehuc Petoro aposolo gie-ticne baha bafickeme fârinehec ewec, iŋuc jaha no baficnume bape fârinehec jaha wâc ewec.9Eme Wofuŋ e gie tahacke-narewec, i Jakobo, Kefa â Johane jaŋe Jesure kikefuŋ guru jaŋere jâcne jumbiŋzi mana tararâ no â Banaba âgo bacnâfohuc menâhecko bambiŋ, erâ nâhe qâpuc jaŋerao gie bahapere jaŋe jaŋac ŋic mahec jaŋerao baniŋte mumbiŋ.10Erâ hapetacfâc-jeŋic ehâmo-jarenaŋte irec sawa nazambiŋ. Eme no irec dâŋ hâcne šoɋac erâ muekopac.

Petorozi wiac eme babahacnehec ewec

11Eme Kefazi Antiokia haeo warerâ wiac babahacnehec eme honerâ maiqanšaŋ jaha âzâcnepo.12E qanaŋ qâpuczi opâ ruac jaŋehec nânâ wirec nâwec. Ehame Jakobore ŋicfâc fisipie honec-joparâ mahec jaŋere hâwickeme qâpuckonec opâ ruac bâtâc bajarerâ hone takirec-jopawec.13Erâ âkeac ehuc ra rowec ware rowec eme Judaŋic gâcne bafickepie Banaba jaŋerao šuhuckerâ sâc ijaha ewec.14Eme Biŋebiaŋte hata fâretiŋ mi âtepie honec-joparâ ŋic gâcne jaŋere maio Kefa šiŋuc âzâcnepo: “Go Judaŋiczi Judaŋic nâŋâcne eebapao mâcne, qâpuc jaŋere eebapao eekic, izi wemocte qâpuc jaŋe Judaŋic nâŋâcne eebapao eniŋte muekic?”

Jesu manasiŋkehuc kiŋ tâmiric ezo

15Nâŋâc qâpuc kosa jujune jaŋe iŋucne mi fuambeŋ, Judaŋic fuambeŋ.16Erâ ine šiŋuc manaŋgopeneŋ: Ŋiczi sâcmutâc dâŋ reŋkehuc kiŋfâsâc eene mi fokac. Eme Kristo e sâcmutâc dâŋ rereŋkere mâcne, mamanasiŋ-nâŋecte erâ kiŋfâsâc bâcnâpoocte, nâŋâc wâc Jesu Kristo manasiŋkeeŋgopeneŋ. Sâcmutâc dâŋte gie bahuc moczi moc kiŋfâsâc eene mi fokac.17Eme Kristorao qohotahuc kiŋfâsâc ezo mueŋgopeneŋzi sifu sâqocne baeŋgopeneŋko weniŋuc muzo? I Kristozi sâqocnere qafeŋ-nâpoekac me? Aricne, iŋuc mi fokac.18Á wiac duckepo i mocwâc heɋârepemu, ine jâmbomac qaqatara ŋic epemu.19Á sâcmutâc dâŋzi nume hâmocnepo i Anutu jucnepemurâ epo.20No Kristohec maripoŋko nukicne. Eme ši juekopac i no nahacne mâcne, Kristozi maŋnaneo juekac. Sahachec juju i juekopac, erâ Anutu Ŋokâ-ticne manasiŋkehuc e sawa jucneekopac. Eki hâcne maŋjauŋ enarehuc juju-ticne nore due bawec.21No Anutu aki anonoc-ticne mi qâsuakopac. Sâcmutâc dâŋ reŋkehuc kiŋfâsâc eene fozacko Kristo e maŋgâŋko hâmowec ezac.
expand_more
Search