Hizqeela Maxaafa46gof_ltw

1Ubbaa Haariya Goday haysada yaagees: “Giddo dabaaba gelsiya doloha bagga dirsa pengey usupun ooso gallasatan gordetidi gam7o; shin Sambaata gallasinne ageena xeero gallasan dooyeto.2Isra7eele halaqay dirsa pengiya baggara kare dabaabape gaathi gelidi, dirsa pengiya matan eqo. Kahineti I immida xuussa yarshonne issifetetha yarsho shiisho. I yan dirsa pengiya matan goyinnidi simmidi kare keyo. Shin dirsa pengey omarsi gakanaw gordetenna.3He biitta asay Sambaataninne ageena xeero wode he gido dabaaba pengiya sinthan Godaa goyinno.4Halaqay Sambaata gallas Godaas xuussa yarsho oothidi, borey bayna usupun urge dorsatanne issi maraze dorsi shiisho.5Issi dorsa urgiyara tammane laapun kilo giraame katha yarsho immo. Urge dorsatar shiiqiya katha yarshoy halaqay baw shiishanaw koyeysa mela gido. Qassi issi issi tammane laapun kilo giraame kathara heedzu heedzu litiro zaytey immo.6Ageena xeero gallas borey bayna issi wofaano, usupun urge dorsatanne issi maraze shiisho.7Issi issi wofaanonne urge dorsi yarshiya wode katha yarshos issi issi tammanne laapun kilo giraame gistenne heedzu heedzu litiro zayte shiisho. Urge dorsatara shiiqiya katha yarshoy halaqay baw shiishanaw koydaysa mela gido.8Halaqay gelishe, dirsa penge barandaara aadhidi gelo; keyisheka yaara keyo.9“Asay ba7aale gallas Godaa goyinnanaw yaa wode goyinnanaw pudeha pengiyara gelidaysati garsa pengiyara keyo; dugeha pengera gelidaysati pudeha pengera keyo. Oonika ba sinthan de7iya pengiyara sitti gidi keyope attishin, ba gelida pengiyara keyopo.10Enti geliya wode, halaqay entara gelo; enti keyiya wode entara keyo.11“Ufaysa gallasataninne laytha ba7aaletan issi issi kormaranne issi issi maraziyara shiiqiya katha yarshoy issi issi tammane laapun kilo giraame gistera heedzu heedzu litiro zaytera gido. Qassi urge dorsaara shiiqiya yarshoy halaqay baw shiishanaw koydaysa mela gido.12Halaqay ba dosan immiya yarsho, hessika xuussa yarsho woyko issifetetha yarsho Godaas ehiya wode, doloha bagga dirsa pengey iyaw dooyeto. Ba xuussa yarshuwa woyko issifetetha yarshuwa Sambaata gallas I shiisheysada shiisho. I keyidi bin, dirsa pengey gordeto.

Gallasa Yarsho

13“Halaqay gallas gallas borey bayna issi laythi gidida issi dorse xuussa yarsho oothidi, Godaas shiisho; I hessa wonta guura pacey bayna ootho.14Hessadaka nam7u kilo giraame dhiilley issi litiro zaytera munuqetidi, wonta guura katha yarsho gididi shiiqo. Hessi hinte Godaas gallas gallas shiishiya yarsho wogaa.15Haysi urge dorsay, kathinne zaytey paci bayna wonta wonta xuussa yarsho gididi shiiqanaw bessees” yaagees.16Ubbaa Haariya Goday haysada yaagees: “Halaqay ba gadiyape shaakidi, ba adde naytape issuwas immiko, hessi he na7aasinne iya naytas laata gidees.17Shin halaqay ba gadiyape shaakidi, ba aylletape issuwas immiko, Ishatamantho Laytha ba7aaley gakanaw, he gadey iyabaa gidees. Hessafe guye, halaqaas simmo; hessi halaqaasa gidiya gisho, merinaw iyawunne iya naytas laata gidees.18Halaqay ase naaqidi, asaa laata gadiya wolqan ekofo. Ta asay ba laata gadiyape shodetonna mela I ba adde naytas ba gadiyape immo” yaagees.

Yarsho Giigisiya Bessata

19Hessafe guye, he uray tana qommo baggan de7iya kahineta kifileta geliya pengiyako ehis. Hessati giddo dabaaba gathiya garsa bagga dirsa pengiya matan de7eyisata. Kifiletape wuloha baggara taani issi bessi be7as.20I taako, “Ha bessay kahineti nagara yarshonne naaqo yarsho ashuwa doysiya bessinne katha yarsho uukiya bessi. He bessan go7etiya gaasoy asaa qohoy gakonna mela geeshsha yarshuwafe kare dabaaba keyenna” yaagis.21Hessafe guye, he uray tana kare bagga dabaaba efidi, dabaaba oyddu maazaneta yuushshidi bessis. Issi issi maazaniyan guutha dabaabi de7ees.22Oyddu maazanetan de7iya dabaabati issi gina; enti oytamu wadha adusse; hastamu wadha orde.23He oyddu dabaabata yuushon shucha gimbey de7ees; gimbiya garsan tama eethiya bessi de7ees.24He uray taako, “Haysi ubbay Xoossaa keethan ootheysati asay ehiya yarshuwa doysiya bessata” yaagis.
expand_more
Search