ⵃⵉⵥⵇⵉⵢⴰⵍ39rif_tti

ⵜⴰⵖⴰⵔⵚⵜ ⵜⴰⵎⴻⵇⵇⵔⴰⵏⵜ ⵅ ⵉⴷⵓⵔⴰⵔ ⵏ ⵉⵙⵔⴰⵉⵍ

1“ⵅⴻⵏⵏⵉ ⵍⴻⵅⵅⵓ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴰⴱⴱ ⴹⵉⴷⴷ ⵉ ⵀⴰⵊⵓⵊ ⵓⵛⴰ ⵉⵏⵉ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵣⴰⵔ, ⴰⵇⴰ ⴰⵢⵉ ⵅⴰⴽ, ⴰ, ⵛⴻⴽ ⵀⴰⵊⵓⵊ, ⵍⵃⴰⴽⴻⵎ ⵏ ⵔⵓⵛ, ⵎⴰⵛⵉⴽ ⴷ ⵜⵓⴱⴰⵍ.2ⵏⴻⵛⵛ ⴰⴷ ⵛⴻⴽ ⵙⵙⵄⴻⵇⴱⴻⵖ ⵓ ⴰⴷ ⴷⴰⵢⴻⴽ ⴳⴳⴻⵖ ⵜⵉⵙⴻⵏⵏⴰⵔⵉⵏ ⵓ ⴰⴷ ⵛⴻⴽ ⵙⵙⴳⴻⵄⵄⴷⴻⵖ ⵣⵉ ⵟⵟⵔⵓⴼⴰ ⵏ ⵛⵛⴰⵎⴰⵍ ⵓⵛⴰ ⴰⴷ ⵛⴻⴽ ⴳⴻⵡⵡⴷⴻⵖ ⵅ ⵉⴷⵓⵔⴰⵔ ⵏ ⵉⵙⵔⴰⵉⵍ.3ⴰⴷ ⵡⵜⴻⵖ ⵍⵇⴻⵡⵙ ⵣⴻⴳ ⵓⴼⵓⵙ ⵏⵏⴻⵛ ⴰⵣⴻⵍⵎⴰⴹ ⵓⵛⴰ ⴰⴷ ⵖⴻⴹⵍⴻⵖ ⴼⵍⵉⵜⵛⴰⵜ ⵏⵏⴻⵛ ⵣⴻⴳ ⵓⴼⵓⵙ ⵏⵏⴻⵛ ⴰⴼⵓⵙⵉ.4ⴰⴷ ⵜⴻⵡⴹⵉⴷ ⵅ ⵉⴷⵓⵔⴰⵔ ⵏ ⵉⵙⵔⴰⵉⵍ, ⵛⴻⴽ ⴷ ⵎⴰⵔⵔⴰ ⵍⵄⴻⵙⴽⴰⵔ ⵏⵏⴻⵛ ⴷ ⵍⴻⴳⵏⵓⵙ ⵏⵏⵉ ⵉⴵⴰⵏ ⴰⴽⵉⴷⴻⴽ. ⵏⴻⵛⵛ ⵡⵛⵉⵖ ⵛⴻⴽ ⴷ ⵎⴰⵛⵛⴰ ⵉ ⵄⵍⴰⵎ ⴽⵓⵍ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ ⵓ ⵉ ⵍⵎⴰⵍ ⵏ ⵍⴻⵅⵍⴰ.5ⵅ ⵡⵓⴷⴻⵎ ⵏ ⵢⴻⵢⵢⴰⵔ ⴰⴷ ⵜⴻⵡⴹⵉⴷ, ⵎⵉⵏⵣⵉ ⵏⴻⵛⵛ ⵏⵏⵉⵖ ⵜ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.6ⵏⴻⵛⵛ ⴰⴷ ⵙⵙⴻⴽⴽⴻⵖ ⵜⵉⵎⴻⵙⵙⵉ ⵅ ⵎⴰⵊⵓⵊ ⵓ ⵅ ⵉⵏⵏⵉ ⵉⵣⴻⴷⴷⵖⴻⵏ ⵙ ⵍⴻⵃⵏⴰ ⴷⵉ ⵜⴻⴳⵣⵉⵔⵉⵏ ⵓ ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.7ⵏⴻⵛⵛ ⴰⴷ ⵙⵙⴱⴰⵏⴻⵖ ⵉⵙⴻⵎ ⵉⵏⵓ ⵉⵇⴻⴷⴷⵙⴻⵏ ⴷⵉ ⵍⵡⴻⵙⵜ ⵏ ⵍⴳⴻⵏⵙ ⵉⵙⵔⴰⵉⵍ ⵓ ⵏⴻⵛⵛ ⵡⴰⵔ ⵜⵜⴻⵊⵊⵉⵖ ⵄⴰⴷ ⴰⴷ ⵙⵙⵅⴻⵎⵊⴻⵏ ⵉⵙⴻⵎ ⵉⵏⵓ ⵉⵇⴻⴷⴷⵙⴻⵏ. ⵍⴻⴳⵏⵓⵙ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⴰⵎⵇⴻⴷⴷⴰⵙ ⴷⵉ ⵉⵙⵔⴰⵉⵍ.8ⵅⵣⴰⵔ, ⴰⴷ ⴷⴷ-ⵢⴰⵙ ⵓ ⴰⴷ ⵉⵎⵙⴰⵔ!, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ. ⵡⴰ ⴷ ⴰⵙⵙ ⵏⵏⵉ ⵅ ⵙⵙⵉⵡⵍⴻⵖ.’”9“ⵉⵎⴻⵣⴷⴰⵖ ⵏ ⵜⵏⴻⴷⴷⴰⵎ ⵏ ⵉⵙⵔⴰⵉⵍ ⴰⴷ ⴼⴼⵖⴻⵏ ⵓⵛⴰ ⴰⴷ ⵙⵙⴰⵔⵖⴻⵏ ⵜⵉⵎⴻⵙⵙⵉ ⴰⴷ ⵙⵙⵛⴻⵎⴹⴻⵏ ⵎⴰⵔⵔⴰ ⵍⴻⵙⵏⴰⵃ: ⴰⵎ ⵜⵙⴻⴷⴷⴰⵔⵉⵢⵉⵏ ⵜⵉⵎⴻⵥⵢⴰⵏⵉⵏ ⴰⵎ ⵜⵙⴻⴷⴷⴰⵔⵉⵢⵉⵏ ⵜⵉⵎⴻⵇⵇⵔⴰⵏⵉⵏ ⵓⵍⴰ ⴷ ⵍⵇⴻⵡⵙ ⴷ ⴼⵍⵉⵜⵛⴰⵜ ⴷ ⵉⵄⵓⵎⴰⴷ ⵉ ⵢⵉⴼⴰⵙⵙⴻⵏ ⴷ ⵉⵃⵔⵉⵛⴻⵏ. ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⴰⴷ ⵣⵣⴰⵢⵙⴻⵏ ⵙⵙⴰⵔⵖⴻⵏ ⵜⵉⵎⴻⵙⵙⵉ.10ⵡⴰⵔ ⴷⴷ-ⵜⵜⵉⵡⵢⴻⵏ ⴰⴽⴻⵛⵛⵓⴹ ⵣⴻⴳ ⵉⵢⵢⴰⵔ ⵓ ⵡⴰⵔ ⵜⵜⵇⴻⵙⵙⵉⵏ ⵜⴰⴼⵍⴰⵡⵜ ⵣⴻⴳ ⵉⵣⴻⵖⵔⴰⵏ, ⵎⵉⵏⵣⵉ ⵙⵙⴰⵔⵖⴻⵏ ⵜⵉⵎⴻⵙⵙⵉ ⵙ ⵍⴻⵙⵏⴰⵀ ⵓⵛⴰ ⴰⴷ ⴽⴻⵛⵛⴹⴻⵏ ⵉⵏⵏⵉ ⵜⴻⵏ ⵉⴽⴻⵛⵛⴹⴻⵏ ⵓⵛⴰ ⴰⴷ ⴰⵛⴰⵔⴻⵏ ⵉ ⵢⵉⵏⵏⵉ ⴷ ⴰⵙⴻⵏ ⵢⵓⵛⴰⵔⴻⵏ!’, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.”11“ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ, ⴰⵇⴰ ⵏⴻⵛⵛ ⴰⴷ ⵙⵙⵡⴻⵊⴷⴻⵖ ⴷⵉⵏ ⴰⵎⵛⴰⵏ ⵉ ⵀⴰⵊⵓⵊ ⵉⵊⵊ ⵏ ⵡⴻⵏⴹⴻⵍ ⴷⵉ ⵉⵙⵔⴰⵉⵍ, ⵍⴻⵡⴹⴰ ⵏ ⵢⵉⵏⵏⵉ ⵉⵥⴻⴽⴽⵡⴰⵏ, ⵖⴰⵔ ⵛⵛⴰⵔⵇ ⵏ ⵍⴻⴱⵃⴰⵔ, ⵓ ⵜⴰⵏⵉⵜⴰ ⴰⴷ ⵜⴱⴻⵍⵍⴻⵄ ⴰⴱⵔⵉⴷ ⵉ ⵢⵉⵏⵏⵉ ⵉⵅⵙⴻⵏ ⴰⴷ ⵥⴻⴽⴽⵡⴰⵏ. ⴷⵉⵏ ⵉ ⵖⴰ ⵏⴻⴹⵍⴻⵏ ⵀⴰⵊⵓⵊ ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ ⵓ ⴰⴷ ⵅⴰⵙ ⵍⴰⵖⴰⵏ: ⵍⴻⵡⴹⴰ ⵏ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵀⴰⵊⵓⵊ.12ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⴰⴷ ⵜⴻⵏ ⵜⴻⵏⴹⴻⵍ, ⵎⴰⵃⴻⵏⴷ ⴰⴷ ⵙⵙⵉⵣⴷⴻⴳⴻⵏ ⵜⴻⵎⵎⵓⵔⵜ, ⵍⵎⵉⵊⴰⵍ ⵏ ⵙⴻⴱⵄⴰ ⵏ ⵉⵢⵓⵔⴻⵏ.13ⵎⴰⵔⵔⴰ ⵍⴳⴻⵏⵙ ⵏ ⵜⴻⵎⵎⵓⵔⵜ ⴰⴷ ⵜⴻⵏ ⵏⴻⴹⵍⴻⵏ ⵓⵛⴰ ⴰⵢⴰ ⴰⴷ ⴰⵙⴻⵏ ⵢⵉⵍⵉ ⵉ ⵛⵛⴰⵏ, ⴷⴻⴳ ⵡⴰⵙⵙ ⵉ ⴷⵉ ⵖⴰ ⵜⵜⵡⴰⵙⵙⵄⵓⴵⴻⵖ!’, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.14‘ⴰⴷ ⴼⴰⵔⵣⴻⵏ ⵄⴰⵡⴻⴷ ⵉⵔⵢⴰⵣⴻⵏ ⵎⴰⵃⴻⵏⴷ ⴰⴷ ⵥⵡⴰⵏ ⵏⵉⵜⵏⵉ ⵜⴰⵎⵎⵓⵔⵜ ⴱⵍⴰ ⵇⴻⵟⵟⵓ ⵎⴰⵃⴻⵏⴷ ⴰⴷ ⵏⴻⴹⵍⴻⵏ ⵉⵏⵏⵉ ⵅⴰⵙ ⵉⴽⴽⵉⵏ, ⵉⵏⵏⵉ ⵜⵓⵖⴰ ⵉⵇⵇⵉⵎⴻⵏ ⴱⵓⵣⵣⵍⴻⵏ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ, ⵃⵉⵎⴰ ⴰⴷ ⵙⵙⵉⵣⴻⴷⴳⴻⵏ ⵜⴰⵎⵎⵓⵔⵜ. ⴰⵡⴰⵔⵏⵉ ⵙⴻⴱⵄⴰ ⵏ ⵉⵢⵓⵔⴻⵏ ⴰⴷ ⵇⴻⴵⴱⴻⵏ ⵏⵉⵜⵏⵉ.15ⵉⵏⵏⵉ ⵉ ⴷ ⴰⵙⴻⵏ ⵉⵜⵜⵅⴻⵚⵚⴰ ⴰⴷ ⵥⵡⴰⵏ ⵜⴰⵎⵎⵓⵔⵜ ⴰⴷ ⵜⵜ ⵥⵡⴰⵏ ⵓ ⵅⵎⵉ ⵉⵜⵜⵡⴰⵍⴰ ⵃⴻⴷ ⵉⵊⵊ ⵏ ⵢⵉⵖⴻⵙ ⵏ ⴱⵏⴰⴷⴻⵎ, ⴰⴷ ⵢⴻⴳⴳ ⵖⴰⵔⴻⵙ ⵉⵛⵜ ⵏ ⵍⵎⴰⵔⴽⴰ ⴰⵍ ⵜ ⵖⴰ ⵏⴻⴹⵍⴻⵏ ⵉⵏⵏⵉ ⵉⵏⴻⵟⵟⴰⵍⴻⵏ ⴷⵉ ⵍⴻⵡⴹⴰ ⵏ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵀⴰⵊⵓⵊ.16ⵄⴰⵡⴻⴷ ⴰⴷ ⵢⵉⵍⵉ ⵉⵙⴻⵎ ⵏ ⵉⵛⵜ ⵏ ⵜⴻⵏⴷⵉⵏⵜ ‘ⵍⵖⴰⵛⵉ ⵉⵏⵀⴻⵡⵍⴻⵏ’. ⵏⵉⵜⵏⵉ ⴰⴷ ⵙⵉⵣⴻⴷⴳⴻⵏ ⵜⴰⵎⵎⵓⵔⵜ.’”17“ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵉⵏⵉ ⵉ ⵎⴰⵔⵔⴰ ⵍⵎⴰⵔⴽⴰⵜ ⵏ ⵉⵊⴹⴰⴹ ⵓ ⵉ ⵎⴰⵔⵔⴰ ⵍⵎⴰⵍ ⵏ ⵢⴻⵢⵢⴰⵔ: ⵎⵓⵏⴻⵎ-ⴷⴷ ⴷⴰ, ⴰⵙⴻⵎ-ⴷⴷ, ⵙⴻⴷⴷⴻⵎ ⵉⵅⴻⴼ ⵏⵡⴻⵎ ⵣⴻⴳ ⵡⴻⵏⵏⴻⴹ ⵖⴰⵔ ⵜⵖⴰⵔⵚⵜ ⵉⵏⵓ ⵏⵏⵉ ⵖⴰⵔⵚⴻⵖ ⵉ ⴽⴻⵏⵏⵉⵡ, ⵜⴰⵖⴰⵔⵚⵜ ⵜⴰⵎⴻⵇⵇⵔⴰⵏⵜ ⵅ ⵉⴷⵓⵔⴰⵔ ⵏ ⵉⵙⵔⴰⵉⵍ, ⵓⵛⴰ ⴰⴷ ⵜⴻⵛⵛⴻⵎ ⴰⵢⵙⵓⵎ, ⴰⴷ ⵜⴻⵙⵡⴻⵎ ⵉⴷⴰⵎⵎⴻⵏ.18ⴰⴷ ⵜⴻⵛⵛⴻⵎ ⴰⵢⵙⵓⵎ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ ⵓ ⴰⴷ ⵜⴻⵙⵡⴻⵎ ⵉⴷⴰⵎⵎⴻⵏ ⵏ ⵍⵃⵓⴽⴽⴰⵎ ⵏ ⴷⴷⵓⵏⴻⵛⵜ, ⵏ ⵉⵛⴰⵔⵔⵉⵢⵢⴻⵏ ⴷ ⵉⵣⵎⴰⵔⴻⵏ ⴷ ⵉⵖⴰⵢⴹⴻⵏ ⴷ ⵉⴼⵓⵏⴰⵙⴻⵏ ⵉⵎⴻⵥⵢⴰⵏⴻⵏ, ⴰⵇⴰ ⴰⵜⴻⵏ ⵎⴰⵔⵔⴰ ⴷⴻⵡⵙⴻⵏ ⴷⵉ ⴱⴰⵙⴰⵏ.19ⴰⴷ ⵜⴻⵛⵛⴻⵎ ⵜⴰⴷⵓⵏⵜ ⴰⵍ ⵖⴰ ⵜⴻⵊⵊⵉⵡⵏⴻⵎ ⵓⵛⴰ ⴰⴷ ⵜⴻⵙⵡⴻⵎ ⵉⴷⴰⵎⵎⴻⵏ ⴰⵍ ⵖⴰ ⵜⴻⵙⵛⴰⵔⴻⵎ ⵣⵉ ⵜⵖⴰⵔⵚⵜ ⵉⵏⵓ ⵉ ⵖⴰⵔⵚⴻⵖ ⵉ ⴽⴻⵏⵏⵉⵡ.20ⴽⴻⵏⵏⵉⵡ ⴰⴷ ⵜⴻⵊⵊⵉⵡⵏⴻⵎ ⵖⴰⵔ ⵟⵟⴰⴱⵍⴰ ⵉⵏⵓ ⵙ ⵉⵢⵙⴰⵏ ⴷ ⵉⵎⵏⴰⵢⴻⵏ, ⵙ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵓ ⵙ ⵎⴰⵔⵔⴰ ⵉⵄⴻⵙⴽⴰⵔⵉⵢⵢⴻⵏ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.21ⴰⴷ ⴳⴳⴻⵖ ⴰⵄⵓⴵⵉ ⵉⵏⵓ ⵊⴰⵔ ⵍⴻⴳⵏⵓⵙ ⵓⵛⴰ ⵎⴰⵔⵔⴰ ⵍⴻⴳⵏⵓⵙ ⴰⴷ ⵥⴰⵔⴻⵏ ⵍⵃⵓⴽⵎ ⵉⵏⵓ ⵏⵏⵉ ⴳⴳⵉⵖ, ⵓⵍⴰ ⴷ ⴰⴼⵓⵙ ⵏⵏⵉ ⵊⴰⵔ ⴰⵙⴻⵏ ⵙⵙⴰⵔⵙⴻⵖ.22ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⴰⴷ ⵜⴻⵙⵙⴻⵏ, ⴰⵇⴰ ⵏⴻⵛⵛ, ⵙⵉⴷⵉ, ⴷ ⴰⵔⴻⴱⴱⵉ ⵏⵙⴻⵏ, ⵣⴻⴳ ⵡⴰⵙⵙ ⵏⵏⵉ ⵓ ⵣⵉ ⵙⵙⴰ ⵜⵙⴰⵡⴻⵏⵜ.23ⴰⴷ ⵙⵙⵏⴻⵏ ⵍⴻⴳⵏⵓⵙ ⴰⵇⴰ ⵉⵏⵏⵉ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⵜⵜⵡⴰⵏⴻⴷⵀⴻⵏ ⴷⵉ ⵍⵎⴻⵏⴼⴰ ⵣⵉ ⵙⵙⵉⴱⴱⴻⵜ ⵏ ⵍⵎⵓⵄⵚⵉⵢⵢⴻⵜ ⵏⵙⴻⵏ, ⵎⵉⵏⵣⵉ ⵖⴻⴷⴷⴰⵔⴻⵏ ⴰⵢⵉ ⵓⵛⴰ ⵏⴻⵛⵛ ⴼⴼⴰⵔⴻⵖ ⵅⴰⵙⴻⵏ ⵓⴷⴻⵎ ⵉⵏⵓ ⵓⵛⴰ ⵡⵛⵉⵖ ⵜⴻⵏ ⴷⴻⴳ ⵓⴼⵓⵙ ⵏ ⵉⵖⵔⵉⵎⴻⵏ ⵏⵙⴻⵏ ⵓ ⵅⴻⵏⵏⵉ ⵡⴹⴰⵏ ⵎⴰⵔⵔⴰ ⵙ ⵙⵙⵉⴼ.24ⵏⴻⵛⵛ ⴳⴳⵉⵖ ⴰⵙⴻⵏ ⴰⵎ ⵎⴰⵎⵎⴻⵛ ⵜⴰⵅⵎⵓⵊⵉ ⵏⵙⴻⵏ ⵓ ⴰⵎ ⵎⴰⵎⵎⴻⵛ ⵍⵎⵓⵄⵚⵉⵢⵢⴻⵜ ⵏⵙⴻⵏ ⵓ ⵏⴻⵛⵛ ⴼⴼⴰⵔⴻⵖ ⵣⵣⴰⵢⵙⴻⵏ ⵓⴷⴻⵎ ⵉⵏⵓ.’”25“ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵍⴻⵅⵅⵓ ⴰⴷ ⵙⵙⵄⴻⵇⴱⴻⵖ ⵉⵎⴻⵃⴱⴰⵙ ⵏ ⵢⴰⵄⵇⵓⴱ, ⴰⴷ ⵃⵉⵏⵏⴻⵖ ⵅ ⵎⴰⵔⵔⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ. ⴰⴷ ⵓⵙⵎⴻⵖ ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵉⵏⵓ ⵉⵇⴻⴷⴷⵙⴻⵏ.26ⵏⵉⵜⵏⵉ ⴰⴷ ⴰⵔⴱⵓⵏ ⵍⴻⴼⴹⵉⵃⴻⵜ ⵏⵙⴻⵏ ⴷ ⵎⴰⵔⵔⴰ ⵍⵎⵓⵄⵚⵉⵢⵢⴻⵜ ⵏⵙⴻⵏ ⵉ ⵣⵉ ⴷ ⴰⵢⵉ ⵖⴹⴰⵔⴻⵏ ⵅⵎⵉ ⵏⵉⵜⵏⵉ ⵄⴰⴷ ⵣⴻⴷⵖⴻⵏ ⴷⵉ ⵍⴰⵎⴰⵏ ⴷⵉ ⵜⴻⵎⵎⵓⵔⵜ ⵏⵙⴻⵏ ⵓ ⵡⴰⵔ ⵉⴵⵉ ⵡⵉ ⵜⴻⵏ ⵉ ⵖⴰ ⵉⵙⵙⵉⴳⴳⵯⴻⴷⴻⵏ.27ⵅⵎⵉ ⵜⴻⵏ ⵉ ⵖⴰ ⵙⵙⵄⴻⵇⴱⴻⵖ ⵣⵉ ⵍⴻⴳⵏⵓⵙ ⵓ ⴰⴷ ⵜⴻⵏ ⵙⵙⵎⵓⵏⴻⵖ ⵣⵉ ⵜⴻⵎⵎⵓⵔⴰ ⵏ ⵍⵄⴻⴷⵢⴰⵏ ⵏⵙⴻⵏ ⵓ ⵏⴻⵛⵛ ⴰⴷ ⵜⵜⵡⴰⵇⴻⴷⴷⵙⴻⵖ ⵣⵣⴰⵢⵙⴻⵏ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵡⴰⵟⵟⴰⵙ ⵏ ⵍⴻⴳⵏⵓⵙ,28ⵅⴻⵏⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ, ⵎⵉⵏⵣⵉ ⵏⴻⵛⵛ ⵏⴻⴷⵀⴻⵖ ⵜⴻⵏ ⴷ ⵉⵎⴻⵃⴱⴰⵙ ⵊⴰⵔ ⵍⴻⴳⵏⵓⵙ ⵓ ⵏⴻⵛⵛ ⵙⵙⵎⵓⵏⴻⵖ ⵜⴻⵏ ⵄⴰⵡⴻⴷ ⴷⵉ ⵜⴻⵎⵎⵓⵔⵜ ⵏⵙⴻⵏ, ⵡⴰⵔ ⴷⵉⵏ ⵊⵊⵉⵖ ⵓⵍⴰ ⴷ ⵉⵊⵊⴻⵏ ⵣⵣⴰⵢⵙⴻⵏ.29ⵏⴻⵛⵛ ⵡⴰⵔ ⵅⴰⵙⴻⵏ ⵜⵜⴻⴼⴼⴰⵔⴻⵖ ⵄⴰⴷ ⵓⴷⴻⵎ ⵉⵏⵓ, ⵅⵎⵉ ⴰⵇⴰ ⵙⵙⴼⴰⵔⵔⵖⴻⵖ ⴰⵔⵔⵓⵃ ⵉⵏⵓ ⵅ ⵜⴰⴷⴷⴰⵔⵜ ⵏ ⵉⵙⵔⴰⵉⵍ!’, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.”
expand_more
Search