Isra7eele Zumatas Odetida Tinbite
1“Asa na7aw, Isra7eele zumata haysada yaagada tinbite oda: ‘Hinteno, Isra7eele zumato, Godaa qaala si7ite.’2Hinte morketi, ‘Hashshu! Beni dhoqa dereti ubbay nu laata gididosona’ yaagidosona.3Hessa gisho, Ubbaa Haariya Goday haysada yaagees gada tinbite oda. Enti hintena ubba bessara mentherethidi baysa oothida gishonne hinte hara kawotethatan haaretana mela oothida gisho hintena cashshasinne miichas aggis.4Godaa qaala si7ite! Ubbaa Haariya Goday deretako, zumatako, zangaaratako, ollatako, yuushuwan de7iya hara kawotethan bonqetida, qelqisetidanne baysa attida katamatako haysada yaagees.5Taani, ta eexiya qaanatiyan hara kawotethata bollanne Edoome ubba bolla tuma odas. Enti ufaytishenne kadhishe ta biitta bantaw ekidosona; hentha gadeta laattidosona.6Hessa gisho, Isra7eele biitta bolla tinbite oda. Kawotethata cashshaa gisho, ta qanaaten eexada deretas, zumatas, zangaaratsinne ollatas odeysa oda.7Hinte yuushuwan de7iya kawotethati ubbay kawuyanaysa taani Ubbaa Haariya Goday hintew ta kushiya denthada caaqada odayis.8“Shin, Isra7eele dereta bolla de7iya mithati ta asaa Isra7eeles zaaridi aacana; ayfe ayfana; enti eeson banta biitta simmana.9Ta hintera de7ayis; ta hinteko simmana; hinte biittay goyetananne zeretana.10Ta Isra7eele asaa taybuwa ha biittan darsana; asay katamatan daana; laaletida bessati zaaridi gimbetana.11Taani asaanne mehiya hintew darsana; enti yeletananne darana. Beni hinte de7idaysada daana; kaseysafe aathada ta hintena dureyana. He wode hinte, taani Godaa gideysa erana.12Taani ta asaa Isra7eele, ha biittan zaaridi daana mela oothana. Zaaridi he biittay hinte nayta dhaysena; biittay hinte laata biitta gidana” yaagees.13Ubbaa Haariya Goday haysada yaagees asay hintena, “Biittay ase miya biitta” kawotethiuwka, “Na7i bayna asi oothasu” yaageysi tuma.14Hizape guye, biittay, “Ase miya biitta” giduku; qassi kawotethati, “Na7i bayna asi gidokona” yaagees Ubbaa Haariya Goday.15“Hizape guye, kawotethata cashshaa ta hintena sissike; hizape guye yeellateketa; he biittay hintew dhube giduku” yaagees Ubbaa Haariya Goday.16Zaaridi, Godaa qaalay haysada yaagishe taako yis.17“Asa na7aw, Isra7eele asay banta biittan de7iya wode, banta hanotaaninne banta oosuwan biitta tunisidosona; enta hanoy ta sinthan maccasa kushe meto mela.18Enti biittan suuthu gussida gishonne banta eeqan biitta tunisida gisho ta hanquwa enta bolla gussas.19Taani enta kawotethata giddon laallas; biitta ubban zeras. Taani enta hanotaanne enta oosuwa mela pirdas.20Enti bida besse ubban asay enta, ‘Haysati Godaa asata; enti iya biittafe keydaysata’ ” yaagidi ta geeshsha sunthaa tunisana mela oothidosona.21Shin Isra7eele asay bida kawotethata ubban tunisida ta geeshsha sunthay tana qofisees.22“Hessa gisho, taani Ubbaa Haariya Goday, Isra7eele asaas giyaba oda. ‘Hinteno, Isra7eele asaw, ta hessa oothey, hinte bida kawotethata giddon tunisida ta geeshsha sunthaa gishope attishin, hinte gisho gidenna.23Hinte tunisida, kawotethata giddon tunida ta gita sunthaa geeshshatetha ta bessaana. Enti xeellishin, hinte baggara ta geeshshatetha bessiya wode, taani Godaa gideysa enti erana’ ” yaagees Ubbaa Haariya Goday.24“Taani hintena kawotethata giddofe kessana; biitta ubbaafe shiishada hinte biitta zaarada ehana.25Ta hinte bolla xillo haathi dharcana; hinteka geeyana. Hintena hinte tunatethi ubbaafenne eeqa goyinno ubbaafe geeshshana.26Ta hintew ooratha wozanaa immana; ooratha ayyaana hinte giddon wothana; shucha wozanaa hintefe kessada, asho wozanaa hintew immana.27Ta Ayyaana hinte giddon wothana; ta wogaanne ta higgiya naagana mela oothana.28Ta hinte mayzatas immida biittan hinte daana; hinte ta ase gidana; taka hinte Xoossaa gidana.29Hinte tuna ubbaafe ta hintena ashshana; kathay hintew darana mela oothana; zaarada hinte bolla kosha ehike.30Koshaa gaason hinte kawotethata giddon kawuyonna mela hinte mitha ayfiyanne hinte goshsha kathan kunthana.31He wode hinte, hinte iita hanotaanne iita ogiya hassayana. Hinte nagaraanne hinte tuna oosuwa gisho, hinte hintena shaatettana.32Ta hessa ubbaa oothey hinte gisho gidonnaysa erite. Hinteno, Isra7eele asaw, hinte hanotan yeellatitenne kawuyite” yaagees Ubbaa Haariya Goday.33Ubbaa Haariya Goday haysada yaagees: “Ta hintena, hinte nagaraa ubbaafe geeshshiya wode, hinte katamatan zaaridi daana mela oothana; laaletidaysati zaaridi gimbetana.34Iya matara aadhiya asaa sinthan baysa gididi de7iya biittay goshsha biitta gidana.35Asay, ‘Haysi kase baysa gidida biittay ha77i waanidi Edene Gannate gididee? Kase laaletida, asi doonnanne baysa katamati ha77i waanidi yuushoy gimbetidanne asi de7iya katamata gididona?’ yaagana.36He wode hinte yuushuwan de7iya attida kawotethati, taani laaletida katamata zaarada keexidaysanne baysa biittay zaaridi kathi dolana mela oothiday tana Godaa gideysa enti erana. Taani Goday hessa odas; ta odidaysa ta oothana” yaagees.37Ubbaa Haariya Goday haysada yaagees; “Isra7eele asay issi toho tana maado oychana mela oothana; enta taybuwa wudeda darsana.38Ba7aale gallas yarshos yida wude mehen Yerusalaamey kumeysada, laaletida katamatan ase kunthana. He wode enti taani Godaa gideysa erana” yaagis.