1फिर परमेश्वर को यो वचन मोरो जवर पहुंच्यो :2“हे आदमी की सन्तान, भविष्यवानी कर क् कहो, परमेश्वर यहोवा यो कह्य हय :”विलाप करो अऊर कहो, हाय, हाय ऊ दिन पर!3कहालीकि ऊ दिन मतलब परमेश्वर को दिन जवर हय; ऊ बादलो को एक दिन होयेंन,अऊर राज्यों को सजा को समय होयेंन।4मिस्र देश पर तलवार चलेंन,अऊर जब मिस्र म लोग मारयो जायेंन,तब कूश देश म भी संकट पड़ेंन,लोग मिस्र देश ख लूट क लिजायेंन,अऊर ओकी नीव उलटाय दियो जायेंन।5कूशी, पूती, लूदी अऊर सब अरबी, अऊर कूब देशों को लोग, अऊर वाचा बान्ध्यो हुयो देश को निवासी, मिस्रियों को संग तलवार सी मारयो जायेंन।6“परमेश्वर यो कह्य हय : मिस्र देश ख सम्भालन वालो भी गिर जायेंन, अऊर अपनी जो सामर्थ पर मिस्री लोग घमण्ड करय हय, हि टूट जायेंन; मिग्दोल नगर सी ले क सवेने नगर तक ओको निवासी तलवार सी मारयो जायेंन, परमेश्वर यहोवा की या वानी हय।7हि उजड़्यो हुयो देशों को बीच उजड़्यो रहेंन, अऊर उन्को नगर खण्डर करयो हुयो नगरों म गिन्यो जायेंन।8जब मय मिस्र देश म आगी लगाऊं अऊर ओको सब मदतगार नाश होयेंन, तब हि जान लेयेंन कि मय परमेश्वर आय।9“ऊ समय मोरो सामने सी दूत जहाजों पर निडर होय क जायेंन अऊर कूश देश को लोगों ख डरायेंन; अऊर उन पर असो संकट आयेंन जसो की मिस्र देश को विनाश को समय ख देख; ऊ दिन आवय हय!10“परमेश्वर यहोवा यो कह्य हय : मय बेबीलोन को राजा नबूकदनेस्सर को हाथ सी मिस्र देश की भीड़-भाड़ को नाश कराय देऊं।11ऊ अपनी प्रजा समेत, जो सब राज्यों म भयानक हय, ऊ देश को नाश करन ख पहुंचायो जायेंन; अऊर हि मिस्र देश को खिलाफ तलवार उठायेंन अऊर पूरो देश ख लाशों सी भर देयेंन।12मय नदियों ख सुखाय डालूं, अऊर मिस्र देश ख बुरो लोगों को हाथ म सौप देऊं; अऊर मय परदेशियों को द्वारा देश ख, अऊर जो कुछ ओको म हय उजाड़ देऊं; मय परमेश्वर नच यो कह्यो हय।13“परमेश्वर यहोवा यो कह्य हय : मय मेम्फिस नगर म सी सब मूर्तियों को नाश करूं अऊर ओको म की सब मूर्तियों को अस्तित्व मिटाय देऊं; फिर कोयी मुखिया मिस्र देश म नहीं उठेंन; अऊर मय मिस्र देश म डर पैदा करूं।14मय पत्रोस नगर ख उजाड़ूं, अऊर सोअन नगर म आगी लगाऊं, अऊर नोप नगर ख सजा देऊं।15सीन नगर जो मिस्र को मजबूत गढ़ आय, ओको पर मय अपनी जलजलाहट भड़काऊं, अऊर नो नगर की भीड़ को अन्त कर डालूं।16मय मिस्र देश म आगी लगाऊं; सीन नगर बहुत थरथरायेंन; अऊर नो नगर की दीवाल तोड़ी जायेंन अऊर मेम्फिस नगर को विरोधी दिन दहाड़े उठेंन।17आवेन नगर अऊर पीवेसेत नगर को जवान तलवार सी मारयो जायेंन, अऊर हि नगर गुलामी म चली जायेंन।18जब मय मिस्रियों की शक्ति ख तहपन्हेस नगर म तोड़ूं, तब ओको म दिन ख अन्धारो होयेंन, अऊर ओकी सामर्थ जेको पर ऊ घमण्ड करय हय, ऊ नाश होय जायेंन; ओको पर बादर को ढग छाय जायेंन अऊर ओकी टुरियां गुलामी म चली जायेंन।19यो तरह मय मिस्रियों ख सजा देऊं। तब हि जान लेयेंन कि मय परमेश्वर आय।”
मिस्र को राजा की टूटी हुयी शक्ति
20फिर ग्यारावों साल को पहिलो महिना को सातवों दिन परमेश्वर को यो वचन मोरो जवर पहुंच्यो :21“हे आदमी की सन्तान, मय न मिस्र देश को राजा फिरौन की भुजा तोड़ दियो हय; अऊर देख, नहीं वा जोड़ी गयी, नहीं ओको पर लेप लगाय क पट्टी बान्धी गयी कि ऊ बान्धन सी तलवार पकड़ को लायक बन सके।22येकोलायी प्रभु यहोवा यो कह्य हय : देख मय मिस्र को राजा फिरौन को खिलाफ हय, अऊर ओकी अच्छी अऊर टूटी दोयी भुजावों ख तोड़ डालूं; अऊर तलवार ख ओको हाथ सी गिराय देऊं।23मय मिस्रियों ख राज्य राज्य म तितर-बितर कर देऊं, अऊर देश देश म बिखेर देऊं।24मय बेबीलोन को राजा की भुजावों ख मजबूत कर क् अपनी तलवार ओको हाथ म देऊं; पर फिरौन की भुजावों ख तोड़ डालूं, अऊर ऊ बेबीलोन को राजा को सामने कराहेंन जसो मरन वालो व्यक्ति करावय हय।25मय बेबीलोन को राजा की भुजावों ख मजबूत करूं, अऊर फिरौन की भुजायें ढीली पड़ जायेंन, तब हि जानेंन कि मय परमेश्वर आय। जब मय बेबीलोन को राजा को हाथ म अपनी तलवार देऊं, तब ऊ ओख मिस्र देश पर चलायेंन;26अऊर मय मिस्र देश को लोगों ख राज्य राज्य म तितर-बितर कर देऊं अऊर देश देश म बिखेर देऊं। तब हि जान लेयेंन कि मय परमेश्वर आय।”