ISIKIEL3chk_bsm

1Iwe, Kot a üreniei, “Nöün aramas, kopwe eni mine üpwe ngonuk. Kopwe oromala ei toropwe, mürin kopwe feila o fos ngeni ekewe chon Israel.”2Iei mine üa amasala awei, nge i a ngeniei ewe toropwe pwe üpwe eni.3Iwe, a pwal üreniei, “Nöün aramas, kopwe eni ei toropwe üpwe ngonuk, pwe lukom epwe masou ren.” Mürin üa eni, nge nennen ewe toropwe me lon awei a arar usun chönün chunen.4Mürin, Kot a üreniei, “Nöün aramas, kopwe fokun feila ren chon Israel o üreniir ai kewe kapas.5Üsap tinukela ren eu mwichen aramas mi eäni fosun ekis me kapas weires, nge üa tinukela ren chon Israel.6Are üpwe tinukela ren ekewe mwü mi watte ra eäni fosun ekis me kapas weires kosap wewe ren, ellet, ir repwe aüselingok.7Nge chon Israel resap mochen aüselingok, pun resap pwal mochen aüselingaei. Ir meinisin ra tipepöchökül o tipeweires.8Nge iei üpwe föri pwe pwal en kopwe tipepöchökül o tipeweires ngeniir usun chök ir.9Üa föri pwe kopwe pöchökül usun chök ewe fau aüchea itan taiamon mi pöchökül seni föüchol. Kosap niuokusitiir, kosap pwal fokun niueitiir, inamwo ika ir eu täppin aramas mi lükümach o ü ngeniei.”10Iwe, a pwal apasa ngeniei, “Nöün aramas, kopwe fokun aüselinga ai kewe kapas meinisin üpwe ürenuk pwe kopwe iseis lon letipom.11Mürin kopwe feila ren aramasom kewe mi oola o asile ngeniir, pwe mine kopwe üreniir iei aloi ngang ewe Samol mi Lapalap, inamwo ika repwe rongorong ika resap rongorong.”12Mürin Ngünün Kot a ekieitä, nge üa rongorong eu möngüngü mi watte me lükisöküri, a apasa, “Oupwe mwareiti lingen ewe Samol mi Lapalap lon läng.”13Iwe, üa rongorong akürangen pöükässin ekewe mönümanau, lupwen ra afeikesifengeniir, pwal akürangen ekewe wiil lepekir a usun chök akürangen eu chechechin fanü mi lapalap.14Mürin, Ngünün Kot a ekieitä o uweeila. Üa feila fän ai weires me letipechou, nge än ewe Samol mi Lapalap manaman mi pöchökül a toriei.15Iwe, üa tori ekewe chon oola lon Telapip mi nonom arun ewe chanpupu Kepar o mot leir lon ükükün fisu rän fän mairü ren mine üa küna o rongorong.

Eman chon mas fän iten chon Israel

16Iwe, wesin ekewe fisu rän ewe Samol mi Lapalap a kapas ngeniei,17“Nöün aramas, üa awisa ngonuk ewe wisen chon mas fän iten chon Israel. Iteiten fansoun, lupwen kopwe rongorong eu kapas seniei, kopwe fönöör ren.18Ika ngang üpwe apasa pwe eman chon föföringau epwe fokun mäla, nge en kosap asile ngeni o fönöü pwe epwe kul seni an föföringau o küna manau, ewe chon föföringau epwe mäla pokiten an tipis, nge en kopwe angei chappen om tümwününgau.19Nge are kopwe fönöü eman chon föföringau, nge esap kul seni an föföringau, ätewe epwe mäla pokiten an tipis, nge en kopwe manau.20Iwe, ika eman chon pwüng a kul seni an föförün pwüng o föföringau, ngang üpwe atolonga lon feiengau, iwe, epwe mäla. Pokiten om kosap fönöü, ätewe epwe mäla pokiten an tipis, üsap pwal chüen chechemeni an föför mi pwüng, nge en kopwe angei chappen om tümwününgau.21Nge ika ka fönöü eman chon pwüng pwe esap tipis, nge a aleasochis, ätewe epwe fokun manau, pun a aüselinga om fönöü. Iwe, en kopwe pwal manau.”

Ewe soufos esap chüen tongeni fos

22Iwe, me ikenan üa mefi pwe ewe Samol mi Lapalap a nom rei ren an manaman. A üreniei, “Kopwe ütä o feila lon ewe lemol pwe üpwe fos ngonuk me ikenan.”23Mürin üa ütä o feila lon ewe lemol. Ikenan üa küna lingen ewe Samol mi Lapalap, a usun ewe ling üa fen küna me arun ewe chanpupu Kepar. Iwe, üa chapetiu lepwül.24Nge Ngünün Kot a feitiu woi o aütäei. Iwe, a üreniei, “Kopwe feila o lokeekelong lon imwom.25Nöün aramas, nengeni, repwe föti ngonuk säl, pwe kosap tongeni nonom lein aramas.26Iwe, üpwe föri pwe awom epwe mwöch, pwe kosap chüen tongeni fos ngeniir o fönöü ei täppin aramas mi lükümach o ü ngeniei.27Nge lupwen ai fos ngonuk, üpwe suki awom pwe kopwe üreniir, ‘Iei alon Kot ewe Samol mi Lapalap.’ Iö a mochen rongorong, epwe rongorong, nge iö esap mochen, epwe chök lükümach. Pun ir eu täppin aramas mi lükümach o ü ngeniei.”
expand_more
Search