Gibxe Bolla Odetida Tinbite
1Nuuni di7etida tammantho laythan, tammantho ageenan, tammanne nam7antho gallas, Godaa qaalay haysada yaagishe taako yis.2“Asa na7aw, ne som7uwa Gibxe kawako zaarada, iya bollanne Gibxe biitta ubbaa bolla tinbite oda.3Ubbaa Haariya Goday haysada yaagees gada oda. ‘Neno, Nayle shaafa giddon zin7ida, gitanne yashshiya do7a daaneyso. Nayle shaafay tabaa; iya medhiday tana’ giya Gibxe kawaw, ta new morke gidana.4Ta ne siidhen dafo aathana; ne shaafan de7iya molota qefey ne galbara oyketana mela oothana; moloti ne gogaara oyketidi uttidashin, ta nena haathaafe goochada gaxa kessana.5Ta nenanne ne shaafan de7iya molota ubbaa mela biitta holana; ne ahay denban yegetidi attana; ne aha shiishidi moogiya asi dhayana. Ta nena salo kafotasinne sa7aa do7atas kathi oothana.6Gibxen de7iya asa ubbay taani Godaa gideysa he wode erana. “Neeni Isra7eele asaas maqa xam7a gidadasa;7Enti nena oykida wode meqada enta shophen caddadasa; enti nenan zempida wode meqada enta zokuwa duuthadasa.8Hessa gisho, taani Ubbaa Haariya Goday, ne bolla mashshe dentheyisata ehana; enti ne asaanne ne mehiya ubbaa wursana.9Gibxe laaletidi baysa biitta gidana. Taani Godaa gideysa enti he wode erana. Neeni, ‘Nayle shaafay tabaa; iya medhiday tana’ yaagida gisho,10taani ne bollanne ne shaafa bolla dendas. Pudeha baggara Migdoolape doomada, dugeha baggara Aswaana gakanaw, yaara kanthidi Tophe zawa gakanaw Gibxe ubbaa asi bayna baysa besse kessana.11Ase gidin mehe gidin yaara kanthenna; oytamu laythi wurana gakanaw, aybika yan deenna.12Taani Gibxe biitta ubbaafe aadhida baysa biitta oothana; iya katamati oytamu laythi wurana gakanaw, hara laaletida katama ubbaafe aadhidi laaletida katama gidana. Gibxe asaa taani kawotethata giddoninne hara asaa giddon laallana” yaagees.13Ubbaa Haariya Goday haysada yaagees: “Oytamu laythafe guye, taani Gibxey laaletida kawotethata giddofe shiishana.14Taani nena zaarada gashtisana enta yeletida dugeha Gibxen de7iya Phatroosa biitta zaarana; yan enti laafa kawotethi gididi daana.15Gibxey hara kawotethata ubbaafe laafa kawotethi gidana. Zaaridi hara kawotethata bolla bana dhoqu dhoqu oothenna; I hara kawotethi haaronnaada taani iya guuthana.16Isra7eeley zaaridi maado demmanaw Gibxen ammanetena; Gibxen ammanetida ammanetethay ay mela qohoko Isra7eeley akeekana. Taani Ubbaa Haariya Godaa gideysa enti he wode erana” yaagees.17Nuuni di7etida laatamanne laapuntho laythan, koyro ageenan, koyro gallasan, Godaa qaalay haysada yaagishe taako yis.18“Asa na7aw, Babiloone kawoy Nabukadanaxoori Xiroosa bolla olaa denthanaw giigis. Enta huuphey qolettana gakanawunne enta hashey shooletana gakanaw olanchoti deexo tooho tookana mela oothidosona. Gidoshin, kawoynne olanchoti ha daabura ubban Xiroosape demmidabay baawa.19‘Taani Gibxe biitta Babiloone kawa Nabukadanaxooras aathada immana; ika ba olanchotas damooze gidana mela di7oninne bonqen oykidaba ubbaa ekidi baana.20Inne iya olanchoti taw oothida gisho, taani iyaw Gibxe biitta enta daaburas damooze oothada immana’ ” yaagees Ubba Haariya Goday.21“He gallas taani Isra7eele deriya minthana. Hizqeela, neka asaas odana mela ta nena minthana. Taani Godaa gideysa enti he wode erana” yaagis.