'Etsekieri28hch_wb2

Niuki Tirutsie ti'aitame hetsiemieme

1Yawé mɨpaɨ kanetiniutahɨawe:2«Tewi pemunu'aya, mɨpaɨ ketinayehɨtɨa ti'aitame Tiru kiekame, Yawé naimekɨmɨyɨwe mɨpaɨ kanaineni:»“'Ataɨta pe'uyuta'ɨreka mɨpaɨ peputayɨ:‘Ne kakaɨyari nepɨhɨkɨ.Haramara 'amatiyewatsie nepɨyeyeika,kakaɨyarixi wa'uwenitsie ne'akaitɨ’.Peru neuxei 'ekɨ pepɨkakakaɨyari,tsepa mɨpaɨ pemɨti'amate.'Ekɨ tewi pemɨmɨwe xeikɨa pekanihɨkɨtɨni.3¿Kamɨtsɨ Tanieri reuyeta petimaiwe?¿Kamɨtsɨ naime tita mɨti'awie petimate?4'Ekɨ kepemɨtimaiwekɨ meta kepemɨtimatekɨ'axikutɨriya pepɨtiukuxeɨri,'akakuni pemexeiyatsie pepeikayatsaxɨwaɨkawa huru meta pɨrata.5Kwinimieme pemɨreyutaharerutawekɨ,'ayumieme waɨkawa xiku pepa'ayeitɨa.Waɨkawa pemɨrexeiyakɨkwinimieme petiuyu'ɨretɨ pepatɨa.6'Ayumieme, Yawé naimekɨmɨyɨwe mɨpaɨ kanaineni:»”Metsɨ xeniu kakaɨyarihepaɨ petimaiwetɨ pekanayuyeitɨwani,7yanepɨtiyurieni memɨ'axɨanikɨ 'ateewa kiekatari 'ahetsɨa,kwinimieme memɨtehayu'eririya:'ixiparate mekaniwatihapakuni'aixɨa ti'aneme witsikepemɨrexeiya meta kepemɨtimaiwe hepaɨtsita mieme,mɨkɨ kepemɨtimariwe 'axamekaniyurikuni.8Putsuta mekamenikayunitɨakuni,haramara 'amatiyewatsie petikwinetɨ pekanimɨmɨkɨ.9Hikɨ, metsimemiwamete wahɨxie,¿petiyɨwe mɨpaɨ pemɨtayɨni: Ne nepɨkakaɨyari?Matsi metsimemiwamete wahɨxie,kakaɨyari pepɨkahɨkɨtɨni matsi tewi mɨmɨwe pekanihɨkɨtɨkamɨkɨ.10Teewatari mekametenikwinitɨakuni,mekamenimiekuni xitekiya 'inɨariyari memɨkahexeiya,ne mɨpaɨ nemainekɨ.Yawé naimekɨmɨyɨwe mɨpaɨ kanaineni”».
11Yawé mɨpaɨ kanetiniutahɨawe:12«Tewi pemunu'aya, Tiru kiekariyaritsie ti'aitame hetsiemieme hiwerika kwikariyari keneutakwika, meta mɨpaɨ ketinayehɨtɨa, Yawé naimekɨmɨyɨwe mɨpaɨ kanaineni:»“Witsipepɨtiyuxexeiyakai,waɨkawa petimaiwetɨ meta 'aixɨa petiyuxexeiyatɨ.13'Ereni pepuyeikakai, Kakaɨyari harawerita,witsiperekuniɨtɨ tetexi witsimɨ'anenekɨ:Xuwi, kɨritsuritu, kare,tupatsiyu, kuxinarina, katsipe,tsapiru, kɨranate meta 'etsimerarita.'Akuka meta 'akamixatetsie mɨranukuhe huru pɨwiriyarietɨkatei,wewiyatɨkaitɨ 'ahetsiemiemekepauka paitɨ pemutawewiyatsie.14Pepanayexeiyarie, Kakaɨyari teɨtameya ti'ɨwiyamekɨ,ne mɨpaɨ nemainekaikɨ.Kakaɨyari hɨrieya mɨpatsietsie pepukatei,tetexi tatɨkaimetsie pepuyeyeikakai.15Kepauka pemutawewiya'aixɨa pepɨtiuyeikakai,'atsita 'axamɨti'ane 'ahetsie mɨtiutixuawerixɨtsieke.16Waɨkawa perexeiyatɨ pematɨakɨ,'axapetiuka'iyaritɨ pepatɨa, 'ana 'axapepɨtiuyuri.'Ayumieme nepɨmatsihayewei Kakaɨyari hɨrieyatsie,tixaɨtɨ mɨkatipatsie hepaɨ.'Ekɨ, Kakaɨyari 'ɨwiyame tihɨweme,tetexi mɨtatɨkatsie nekamenakumaweriyamɨkɨ.17Witsipemɨtitemaikɨkaikɨpepu'ata'ɨrixɨ.Pemɨxawatɨriyatɨkaikɨpetimaiwetɨ pepɨkahatɨa.'Ayumieme kwiepa nepɨmatsiheukahɨa,meta te'aitamete wahɨxietewiyarika nepɨmatsihayeitɨa.18'Atukite mɨpatsietɨkatei kapatsietɨkaime pepayeitɨa,'axamɨti'ane waɨkawa pemexeiyakɨ,'axa'anemekɨ pemɨtituakaikɨ.'Ayumieme 'ahetsie nepenayetua taimɨmatsitaxɨtsitɨanikɨ.Yunaitɨ memɨmatsixeiya wahɨxie,kwiepa nepɨmatsi'ukahɨa meta naxi nepɨmatsihayeitɨa.19Mematsixeiyatɨ, mepɨmamayunaitɨ nuiwarite memɨmatsimate.'Imatɨrieka tukaritsie 'axape'anetɨ pepe'ayeitɨa,tawariri 'apepɨka'uyeikani”».

Niuki Tsiruni hetsiemieme

20Yawé mɨpaɨ kanetiniutaxatɨani:21«Tewi pemunu'aya, Tsiruni hɨxiena keneutakeka, hepaɨtsitana ketineutaxata.22Mɨpaɨ ketinayemari'itɨa, Yawé naimekɨmɨyɨwe mɨpaɨ kanaineni:»“'Ena nepuwe Tsiruni nematsitaxanetake,meta 'aixɨa nemɨtitahɨawarienikɨ 'ahetsiemieme.Kepauka 'ahetsie nemi'atɨani 'uximatɨarika heitserie mexeiya,'ahetsie kenemɨtipatsie nematsiɨkɨme nepaneyeitɨani,'ana mɨpaɨ pɨtimatsiɨkɨre kename ne, Yawé nehɨkɨ.23'Ahetsiemieme kwiniya nepanɨ'ani,'akaye 'utɨma xuriya puhaneni,'ixipara tiyurieyu,memɨwitekietɨka 'akaye 'utɨma mepɨkaxɨrieni,'ana mɨpaɨ mepɨtehetimani kename ne, Yawé nehɨkɨ.24'Ixaheritsixi tawariri mepɨka'uximatɨariekawa'aurie kiekatari 'aixɨa mekatewaxeiyakaku,kɨye manuyemɨtsɨkɨ 'anatseiwatɨ kemɨtiyukukuine hepaɨ,meta xuyakɨ hepaɨ,'ana mɨpaɨ mepɨtehetimani kename ne, Yawé nehɨkɨ”.25»Yawé naimekɨmɨyɨwe mɨpaɨ kanaineni: “Kepauka nemɨwakuxeɨrieni 'ixaheritsixi 'ateewa memutetɨka hipame nuiwarite wahetsɨa, kenemɨtipatsie nuiwarite wahɨxie matsiɨkɨme nepaneyeitɨani. Hikɨ 'ana 'Ixaheri yukwieyaritsie pukani, neti'uximayatsiriwame Kakuwu nemɨyetuiritsie.26Mana 'aixɨa 'iyari mepu'uwani, mepuyutikitɨani, kaxie mepɨka'eni, netsɨ nekaniwa'uximatɨamɨkɨ kemɨ'ane 'Ixaheri kiekariyari memɨxani'erie. 'Ana mɨpaɨ mepɨtehetimani kename ne, Yawé wakakaɨyari nehɨkɨ”».
expand_more
Search