Geella Isra7eele
1Nu di7etida laapuntho laythan, ichashantho ageenan, tammantho gallasan, Isra7eele cimatape guuthati Godaa sheniya oychanaw yidi, ta sinthan uttidosona.2He wode Godaa qaalay haysada yaagishe taako yis;3“Asa na7aw, Ubbaa Haariya Goday, Isra7eele cimatako Goday haysada yaagees yaaga: ‘Hinte ta sheniya oychanaw yidetii? Taani Ubbaa Haariya Goday ta de7uwan caaqas: hinte tana oychana mela ta koyke.’4“Asa na7a ne enta bolla pirdanee? Tuma enta bolla pirdanee? Hessa gidiko, enta mayzata tuna oosuwa enta erisa.5Ubbaa Haariya Goday haysada yaagees gada entaw oda. ‘Taani Isra7eele doorida wode ta kushiya denthada Yayqooba zerethas caaqas. Taani tanatethaa Gibxe biittan entaw qoncisas. Ta kushiya denthada, taani Godaa, hinte Xoossa.6Ta hintena Gibxefe kessada, hintew doorida biitta, maathinne eessi goggiya biitta, hara biitta ubbaafe aadhida lo77o biitta ehana’ gada caaqas.7Ta entako, ‘Hinte issoy issoy dosiya tuna eeqata diggite; Gibxe eeqatan hintena tunisopite. Taani Godaa hinte Xoossaa’ ” yaagas.8Gidoshin, enti taw makallidi, ta odiyaba si7onna ixidosona. Enti banta amotida tuna eeqata diggibookona; Gibxe eeqata goyinno aggibokona. Hessa gisho, enti Gibxen de7ishin, ta hanquwa enta bolla gussanaw qopas. Ta sheniya wursanaw qofa qachas.9Shin enti de7iya kawotethata giddoninne Isra7eele asaa Gibxefe kessanaw caaqiya wode ta tanatethaa erisida asaa sinthan ta sunthay tunonna mela oothas.10Hessa gisho, ta enta Gibxefe kessada mela biitta ehas.11Kiitetiya ubbaas de7o immiya ta higgiya entaw immas; ta wogaa enta tamaarsas.12Enta geeshshey tana Godaa gideysa enti erana mela, ta Sambaata taapenne entafe giddon malla oothada immas.13Shin Isra7eele asay mela biittan ta bolla makallidosona. Kiitetyida ubbaas de7o immiya ta higgiya menthidosona; ta wogaa kaallibookona; ta Sambaata tunisidosona. Taani mela biittan ta hanquwa enta bolla gussada enta dhaysanaw qopas.14Shin ta enta Gibxefe kessiya wode be7ida kawotethata sinthan ta sunthay tunonna mela enta dhaysabike.15Enti mela biittan de7ishin, entaw immida, hara biitta ubbaafe lo77o gidida maathinne eessi goggiya biitta, enta gelsike gada caaqas.16Hessi haniday enti eeqa goyinnidi, ta higgiya menthida gisho, ta wogaa kaalliboonna gishonne ta Sambaata tunisida gishosa.17Gidoshin, ta entaw qadhetida gisho, mela biittan enta wursa dhaysabike.18Enti mela biitta de7ishin, enta naytako haysada yaagas; “Hinte aawata wogaa kaallopite; enta higgiya naagopite; woyko enta eeqatan tunopite.19Taani Godaa hinte Xoossaa. Ta wogaas kiitetite; ta higgiya naagite.20Ta hintera caaqida caaquwas malla gidana melanne taani Godaa hinte Xoossaa gideysa hinte erana mela Sambaata dummayite” yaagas.21“Shin enta nayti ta bolla makallidosona; kiitetiya ubbaas de7o immiya ta wogaa menthidosona; ta higgiya naagibookona; ta Sambaata tunisidosona. Yaatin, mela biittan ta hanquwa enta bolla gussada ta yiloy wurana gakanaw entana dhaysanaw qopas.22Shin taani enta Gibxefe kessiya wode be7ida kawotethata sinthan ta sunthay tunonna mela enta dhaysabike.23Enta hara kawotethata giddonne dumma dumma biitta laallanaw mela biittan ta kushiya denthada caaqas.24Enti ta wogas kiitetonna ixidosona; ta higgiya menthidosona; ta Sambaata tunisidosona; banta aawata eeqa amotidosona.25Yaatin, entaw lo77o gidonna wogatanne de7o immonna higgeta immas.26Enti banta yarshuwan tunanaada, banta bayra nayta yarshanaada, ta enta yedda bessaas. Ta hessa oothiday enta daganthanaasanne taani Godaa gideysa enti erana melasa” yaagis.27“Hessa gisho, asa na7aw, Isra7eele asaas, Ubbaa Haariya Goday haysada yaagees gada oda: hessa oothidi hinte aawati ammanetona ixidi tana cayidosona.28Ta entaw immana gada ta kushiya dentha caaqida biitta enta ehida wode, enti dereta ubbanne irxa mitha ubba be7idosona. Yan banta yarshuwa yarshidosona. Banta, ixaaniyaninne ushsha yarshuwan tana yiloyidosona.29Taani, ‘Haysi hinte biya dhoqa bessay aybee?’ yaagada oychas. Hachi gakanaw he bessay ‘Bama’ geetetees iya birshethay ‘Dhoqa Goyinno Bessata’ geetetidi xeegetees” yaagees.Seeranne Maarota
30“Hessa gisho, Isra7eele asaas, Ubbaa Haariya Goday haysada yaagees yaagada oda: ‘Hinte mayzati oothida nagara oothidi, ayis hintena tuniseetii? Enta tuna eeqa goyinnanaw amotidi ayis kaalleetii?’31Hachika hinte yarshuwa yarshiya wode hinte nayta taman yarshidi, eeqa ubban hintena tuniseeta. Hinteno, Isra7eele asaw, taani hintenan oysheto? Taani Ubbaa Haariya Goday ta de7uwan caaqas: ta hintenan oyshetike.32Hinte, ‘Nuuni mithinne shuchu goyinniya hara kawotethata melanne biittan de7iya hara asaa mela gidana yaagidi qopeeta. Shin hinte qofay polo hanenna.’ ”33Ubbaa Haariya Goday haysada yaagees: “Ta mino qesiyan, ta micetida kushiyaninne ta hanquwan hinte bolla kawotana.34Kawotethata giddofe ta hintena kessana; hinte laaletida biitta ubbaafe ta mino qesiyan, ta micetida kushiyaninne ta hanquwan hintena shiishana.35Ta hintena ‘kawotethata mela biitta’ giya mela biitta ehada, hintena ta sinthan essada, hinte bolla pirdana.36Gibxe mela biittan hinte mayzata bolla pirdidaysada, hinte bolla pirdana.37Taani hintena ta kawotetha xam7a garsan haarana; hinte ta caaquwa naagana mela oothana.38Makallanchotanne nagaranchota ta hinte giddofe diggana; ha77i enti de7iya biittafe ta enta kessana. Shin enti Isra7eele biitta gelonna mela teqana; he wode taani Godaa gideysa hinte erana” yaagees Ubbaa Haariya Goday.39Isra7eele asaw, hinteko Ubbaa Haariya Goday haysada yaagees: “Ha77i ta odeysa hinte si7onna ixiko, ubbay bidi hinte eeqa goyinnite. Shin hizape guye, hinte imotaninne hinte eeqatan ta geeshsha sunthaa tunisopite.40Ta geeshsha zumaa bolla, dhoqa Isra7eele zumaa bolla hinte Isra7eele asay tana, Ubbaa Haariya Godaa goyinnana. Taani hintena ekana; hinte yarshuwa, hinte doorida imuwanne hinte geeshsha imuwa ta hintefe koyana.41Hinte laaletida kawotethata giddofe taani hintena ehiya wodenne hara biittatape ta hintena shiishiya wode sawo tonku geetetiya yarshoda ta hintena ekana. Kawotethati xeellishin, hinte giddon ta geeshshatetha qoncisana.42Kase hinte mayzatas immana gada ta kushiya denthada caaqida Isra7eele biitta hintena zaarada ehida wode taani Godaa gideysa hinte erana.43Hinte iita hanotaanne hinte tuna oosuwa hinte he bessan hassayana; hinte oothida iita ooso ubbaa hinte shaatettana.44Hinteno, Isra7eele asaw, hinte iita hanota melanne hinte tuna oosuwa mela gidonashin, ta sunthaa gisho ta oothiya wode taani Godaa gideysa hinte erana” yaagees Ubbaa Haariya Goday.Dugeha Bagga Bolla Odetida Tinbite
45Godaa qaalay haysada yaagishe taako yis.46“Asa na7aw, dugeha bagga simmada xeella; dugeha baggaas oda; dugeha wora bolla tinbite oda.47Dugeha woraas, Ubbaa Haariya Goday odiyaba si7a yaagada oda. ‘Ta ne giddon tama yeddana; he tamay cil7o mithaanne mela mithaa ubbaa maana. He eexiya tamay to7enna; dugehape bidi, pudeha bagga gakanaw de7iya asa som7o ubbaa he lacoy labana.48He tama oythiday tana Godaa gideysa asa ubbay be7ana. He tamay to7enna’ ” yaagees.49Taani zaarada, “Ubbaa Haariya Godaw, hessa oda gada tana kiittofa. Enti, ‘I ubba wode leemison odees gidennee?’ yaagosona” yaagas.