ESEGIELE19hui_png

Esegielehanda dugu daraore bia henego ogo

1Anduane Homogo ibugua i̱hondo lalu, Isaraele kinibi Yuda kinibi libunaga dugu daraore bia halu iba gana ogobi labe, laya.2Í̠ ai̱ya ibu gabua laiono timbuniore hene.Ibugua laiono wangabe dewa bu hearu ti dege dombeneha howaibu iginiru bayuwa handayaho hayagola ti bayale anda hai haya.3Ibu igini mbiraore wangabe timbuni anda hayagolaibugua igini ogoni nogo tara tara gabua taya helo biawai haya.Ibu laiono hongoheore howa agalibi bo nagane helo biawai haya.4Hameigini tara tara dindi tarani bu hearume laiono ogonime mana biaga ngago hale hai haya.Tigua ibalu laiononaga gundu uli tombo wiyagola laiono uli ogoniha pilaya.Tigua ibu ne harigaha wena langame helowa Iyibi dindiha gililo yalu piya.5Ai̱yahanda ibu igini dai bilo maliaho biraabo heagola igini biago dai nabiya.Dai nabiya handala ibu igini dege mende heagoibu laiono dalua bayale dege helo dabo helene.6Laiono igini ogoni andaho heagolaibu laiono maru hearu baba mandagi ibaga bu haya.Ibugua nogo tara tararu bolene mana bu manda bialu howanogo gabua tara tara taya bialu agalibi bo nagane dege hene.7Ibugua tinaga wai pabe anda hongohe hearubitano wiarubi bo gialo wahai haga bialu hene.Ibugua bi hongo howa layagolawali agali bibahende hearume gi hai haga hene.8Hameigini tara tara dindi tara wiaruha howa laiono ogoni baba wai bule íbu ngoai hene.Tigua gono wiago mo tigabu ngelo howagonoha dayagola hadene.9Tigua ibu wena langame hende howambogoyi mbiraha minu berelowa Babilono kini hearia yalu pene.Ibu pora bialu tagira napeloibu garabaya anda hongohe wiagoha helo helene.Wali agali Isaraele dindi hari ngaruha hearumeibunaga bi hongo howa laruane lone hale nahelo ani bini.
10Kini ogonilabo libu ai̱ya ibu pu mbira lini daga mini gerebiiba angeni hengene mbira haraligobi bereneya.Pu gerebi ogoni iba bayale bereagoria hengenegotimbuni anda howa gene maganeni yuni dewahe gerebi linibi dewaore deneya.11Pu gerebi ogoninaga gene magane hongoheore halukininaga halimbu hongohe ngaligobi haya.Irane ogoni luniore halu hari beraliba ela habehe haya.Ibu luniore halu magane yunibi timbuni dewaorebi heagobibahende hearume de handai hene.12Pu gerebi ogonibi heagola agali bu hearume keba howairane ogoni minu dugualu dindini bape haya.Tigua ani biyagola ni tagira ibiragohayagi howapuyabu poboyogobi ibiyagome gerebi lini deago bibahende yogo bialu gaulai haya.Agali urunime ira magane hearu dandape hai halumagane bibahende irani delai haya.13Mani tigua pu gerebi ogoni dugu yalu puwadindi ko yobini iba nabiraga wiagoha hangaya.14Ogoninaga teneha howaira datagi halu gene magane yuni linibi irame dai haya.Ibunaga magane bayale mbira hongohe ndo howakininaga halimbu wabibehe mbira naheneya.Bi ogoni dugu daraore binigo tigua iba gana lalu haabo haga winigo nga.
expand_more
Search