ሾ ጋዶ
1ሄሳፈ ጉየ ጎዳይ ሙሰኮ፥ “ግብፀ ካዋኮ ባዳ፥ ‘ጎዳይ፥ ታዉ ጎይናና መላ ታ አሳ የዳ።2ኔኒ ኤንታ የዶና እፅኮ፥ ነ ቢታ ኡባን ሾ ጋዶ የዳና።3ናይለ ሻፋን ሾይ ኩማና። ኤንቲ ያፐ ከይድ ነ ካዎተ፥ ነ ዝንእያ ክፍልያ፥ ነ ሂፃ፥ ነ ሞርናታ ኬነ ነ ደርያ ኬ ኡባን ገላና። ሄሳዳካ ነ ጮጨንነ ሙኑቃ ሚሸ ኡባን ገላና።4ሾት ነ ቦላ፥ ነ አሳ ቦላነ ነ ሹማታ ኡባ ቦላ ጉፓና ያጌስ’ ያጋዳ ኦዳ” ያግስ።5ጎዳይ ሙሰኮ፥ “አሮን ግብፀን ደእያ ሃታ ቦላ፥ ዛራ ሃታ ቦላነ ተቀ ሃ ኡባ ቦላ ባ ፃምኣ ደንና መላ ኦዳ” ያግስ።6አሮን ግብፀ ሃታ ቦላ ባ ፃምኣ ደንዳ ዎደ ሾት ከይድ፥ ግብፀ ቢታ ማእዶሶና።7ሽን ማሮትካ ባንታ ብታን ሄሳዳ ኦድ ግብፀ ቢታን ሾ ከስዶሶና።8ካዎይ ሙሰነ አሮና ፄግስድ፥ “ሀ ሾታ ታፐነ ታ አሳፐ ድጋና መላ ጎዳ ህንተ ዎስኮ ታ ህንተ አሳ ጎዳስ ያርሾ ያርሻና መላ የዳና” ያግስ።9ሙሰይ ካዋኮ፥ “ሾት ኔፐ፥ ነ ሞርናታፐነ ነ አሳፐ ክቻና መላ ታ ዎሳናዉ ቃፃሮ እማ። ሄሳፈ ጉየ ሻፋ ሾት ኔፐነ ነ ኬፈ ክችድ ናይለ ፃላላን ደአና” ያግስ።10ካዎይ ዛሪድ፥ “ዎንቶ ግዶ” ያግስ። ሙሰይ፥ “ኑ ጎዳ ፆሳ መል ሀር ኦንካ ባይናይሳ ኔኒ ኤራና መላ ነ ግዳይሳዳ ኦና።11ሾት ኔፐ፥ ነ ኬፈነ፥ ነ ሞርናታፐ ክችድ ናይለ ሻፋ ፃላላን አታና” ያግስ።12ሙሰይነ አሮን ካዉዋ ማታፐ ከይድ፥ ካዉዋ ቦላ ጎዳይ ኤህዳ ሾታ ድጋና መላ ሙሰይ ጎዳ ዎስስ።13ጎዳይ ሙሰይ ኦይችዳይሳዳ ኦን ሶን፥ ካረንነ ጌሻን ደእያ ሾት ሀይቅዶሶና።14ግብፀ አሳይ ሀይቅዳ ሾታ ሺሽድ ዶርዶሶና፤ ቢታ ኡባይ ፅንቅስ።15ሽን ሾት ሀይቅዳይሳ ካዎይ በእዳ ዎደ እያ ዎዛናይ ዛር ሙምስ። ጎዳይ ግዳይሳ መላ እ ሙሰነ አሮና ስኦና እፅስ።ቦፀ ጋዶ
16ሄሳፈ ጉየ፥ ጎዳይ ሙሰኮ “አሮን ባ ፃምአ ደንድ ቢታ ባና ሾጫና መላ ኦዳ። ግብፀ ቢታ ኡባን ደእያ ባናይ ቦፀ ግዳና” ያግስ።17ኤንቲ ኪተትዳይሳዳ ኦዶሶና። አሮን ፃምአራ ቢታ ባና ሾጭስ። ግብፀን ደእያ ባና ኡባይ ቦፀ ላመትድ መህያነ አሳ ማእስ።18ማሮትካ ባንታ ብታን ሄሳዳ ኦናዉ ፓጭዶሶና፥ ሽን ፆነትዶሶና። ቦፀይ አሳ ቦላነ መህያ ቦላ ላለትስ።19ማሮት ካዋኮ፥ “ሀይስ ፆሳ ኦሶ” ያግዶሶና። ሽን ካዋ ዎዛናይ ሙምስ። ጎዳይ ግዳይሳ መላ እ ኤንታና ስኦና እፅስ።ኡዱንፀ ጋዶ
20ጎዳይ ሙሰ፥ “ጉራ ደንዳዳ፥ ካዎይ ሻፋ ብሽን እያራ ጋሄታዳ፥ ‘ጎዳይ፥ ታና ጎይናና መላ ታ አሳ የዳ።21ኔኒ ታ አሳ የዶና እፅኮ፥ ታኒ፥ ነ ቦላ፥ ነ ሞርናታ ቦላነ፥ ነ አሳ ቦላ ኡዱንፀ ጋዶ የዳና። ግብፀታ ኬነ ኤንቲ ደእያ ቢታ ኡባን ኡዱንፀይ ኩማና።22ሽን ሄ ጋላስ ታ አሳይ ደእያ ጌሳመ ቢታን ኡዱንፀይ ዶናዳ ኤንታ ተቃዳ አሻና። ታኒ ጎዳይ፥ ሄ ዎደ ሀ ቢታን ታኒ ጎዳይ ኦይሳ ኔኒ ኤራና።23ታኒ፥ ታ አሳነ ነ አሳ ሻካና፤ ሄ ግታ ማላታይ ዎንቶ ሀናና’ ያጌስ ጋዳ ኦዳ” ያግስ።24ሄሳፈ ጉየ፥ ጎዳይ ግዳይሳዳ ኦስ። ካዉዋ ጋነ እያ ሞርናታ ሶ ዳሮ ኡዱንፀ ጋዶ የድስ። ኩመ ግብፀ ቢታይ ኡዱንፀ ጋዶን ቆሄትስ።25ሄ ዎደ ካዎይ ሙሰነ አሮና ፄግስድ፥ “ብድ፥ ሀ ቢታን ህንተ ፆሳስ ያርሾ ያርሽተ” ያግስ።26ሽን ሙሰ ዛሪድ፥ “ሄስ ሀኖናባ። ኑኒ ጎዳስ፥ ኑ ፆሳስ ያርሽያ ያርሾይ ግብፀታ ማታን እፀትያ ግሾ፥ ሄሳ ኦኮ። ኑ ያርሽሽን ኤንቲ በእኮ ኑና ሹቻን ጫዳና።27ኑና ኪትዳይሳ መላ፥ ኑኒ ጎዳስ፥ ኑ ፆሳስ ያርሾ ያርሻናዉ ሄ ጋላስ ኦገ መላ ቢታ ባናዉ በሴስ” ያግስ።28ካዎይ ዛሪድ፥ “ጎዳስ፥ ህንተ ፆሳስ መላ ቢታ ብድ ያርሻና መላ ታኒ ህንተና የዳና። ሽን ህንተ ሃክድ ቦፕተ፤ ታዉ ዎስተ” ያግስ።29ሙሰይ ዛሪድ፥ “ታኒ ነ ማታፐ ከይዳ መላ ጎዳ ዎሳና። ሀ ኡዱንፀይ ዎንቶ ካዉዋፐ፥ እያ ሞርናታፐነ እያ አሳፐ ክቻና። ሽን ካዎይ አሳይ ጎዳስ ጎይናናይሳ ድግድ ዛር ኑና ጭሞፎ” ያግስ።30ሄሳፈ ጉየ ሙሰይ ካዉዋ ማታፐ ከይድ፥ ጎዳ ዎስስ።31ጎዳይ ሙሰይ ኦይችዳይሳዳ ኦስ። ኡዱንፀይ ካዉዋፐ፥ እያ ሞርናታፐነ እያ አሳፐ እሶይካ አቶና ክችስ።32ሽን ሀእካ ካዉዋ ዎዛናይ ሙምን አሳ የዶና እፅስ።