1Allabatala ka a fɔ Musa yɛ ko: «N kɛtɔ mɛn kɛla Ferawuna la, i jɛrɛ ri wo yen i ɲa la sisen. N di a diyagboya n na sebaya a la fɔɔ a ri Isirayɛlika bila. Ɔɔn, n di a diyagboya n na sebaya a la fɔɔ a ri ii gbɛn ka ii labɔ a la jamana kɔndɔ.»2Alla ka a fɔ Musa yɛ fanan ko: «Nde le Allabatala ri.3N ka n jɛrɛ yiraka Iburahima ni Isiyaka ni Yakuba la, ka a fɔ ii yɛ ko n ye Alla Sebɛɛtii le ri, kɔni n tɔɔ mɛn ye Allabatala ri, ii ma n lɔn tɔɔ wo la.4N ka teriya sidi ii yɛ ko n di Kanaan jamana di ii ma, ii siini tɛrɛ londanya la jamana mɛn dɔ.5Nba, sisen n da Isirayɛlika kurun kan mɛn, baa ii bilani jɔnya rɔ Misirankailu bolo. N ka teriya mɛn sidi, n hankili ye wo rɔ.6«Wo le rɔ, i ye wa a fɔ Isirayɛlika yɛ ko: ‹Nde le Allabatala ri. Misirankailu ra diyagboya baara mɛn la ai kan, ko n kɛtɔ ai bɔla wo rɔ. Ko n di ai labɔ Misirankailu bolo, sa ai kana to woilu la jɔnya wo rɔ butun. Ko n di ai kunka n na sebaya ba la, ka Misirankailu la kɛwaliilu hakɛ bɔ ii rɔ.7Ko n di Isirayɛlika kɛ n na mɔɔilu ri. Ko n di kɛ ai Maari Alla ri. Ko ai ri a lɔn ko n ye ai Maari Allabatala de ri, mɛn ye ai labɔla diyagboya baara rɔ Misirankailu bolo.8Ko n ka n kali Iburahima ni Isiyaka ni Yakuba yɛ n bolo layɛlɛnin, ko n di jamana mɛn di ii ma, ko n di ai ladon jamana wo kɔndɔ. Ko n di jamana wo kɛ ai ta ri. Nde le Allabatala ri.›»9Nba, Musa wara kuma wo fɔ Isirayɛlika yɛ, kɔni woilu jiitɛɛni tɛrɛ kojuuya ii la jɔnya gbɛlɛnya bolo ma. Wo rɔ, ii ma sɔn lala a la kumakan na.10Awa, Allabatala ka a fɔ Musa yɛ ikɔ tuun ko:11«I ye wa a fɔ Misiran mansa Ferawuna yɛ ko a ye Isirayɛlika bila sa ii ri bɔ a la jamana rɔ.»12Musa ka Allabatala jabi: «Ni Isirayɛlika ma sɔn n na kuma ma. Ferawuna ri sɔn n na kuma ma wo rɔ wa? Wo kuma tɛ, baa nde ma kusan kumala.»13Allabatala kɔnin kumara Musa ni Haruna yɛ Isirayɛlika ni Misiran mansa Ferawuna la ko rɔ. A ka a fɔ ko ii ye Isirayɛlika labɔ Misiran.
Haruna ni Musa buruju
14Isirayɛlika denbaya la kuntiilu tɔɔ le ɲin di. Isirayɛli dencɛ fɔlɔ tɔɔ le ko Rubɛn. Rubɛn dencɛilu tɔɔ le ten: Hanɔki, Palu, Hɛsirɔn, a ni Karimi. Nba, Rubɛn bɔnsɔn de ɲin di.15Simeyɔn dencɛilu tɔɔ le ten: Jɛmuwɛli, Jamin, Owadi, Jakin, Sohari, a ni Sawuli. Sawuli na tɛrɛ ye Kanaanka le ri. Nba, Simeyɔn bɔnsɔn de ɲin di.16Isirayɛli dencɛ Lebi ka san kɛmɛ ni san bisawa ni san wɔrɔnwula le sɔrɔn. Wo dencɛilu tɔɔ le ko Kerisɔn ni Kohati ni Merari.17Kerisɔn dencɛilu tɛrɛ ye Libini ni Simeyi ri, wo bɛɛ ni a denbayala.18Kohati dencɛilu tɔɔ le ɲin di: Amuramu, Isehari, Heburɔn, a ni Usiyɛli. Kohati ka san kɛmɛ ni san bisawa a ni san sawa le sɔrɔn.19Merari dencɛilu tɛrɛ ye Mahili ni Musi ri. Nba, woilu bɛɛ tɛrɛ ye Lebi bɔnsɔn mɔɔ le ri.20Amuramu ka a tɛnɛnmuso Jokebɛdi furu. Wo ka dencɛ fila sɔrɔn a yɛ, mɛnilu ye Haruna ni Musa ri. Amuramu ka san kɛmɛ ni san bisawa ni san wɔrɔnwula le sɔrɔn.21Isehari dencɛilu tɛrɛ ye Kora ni Nɛfɛki ni Sikiri ri.22Usiyɛli dencɛilu tɛrɛ ye Misayɛli ni Elisafan ni Sitiri ri.23Haruna ka Aminadabu denmuso Eliseba le furu, mɛn ye Nasɔn dɔɔmuso ri. Eliseba ka dencɛ naanin sɔrɔn Haruna yɛ. Woilu tɔɔ ko Nadabu ni Abihu ni Elasari a ni Itamari.24Kora dencɛilu tɛrɛ ye Asiri ni Elakana ni Abiyasafu ri. Kora la bɔnsɔn le ɲin di.25Haruna dencɛ Elasari ka Putiyɛli denmuso do furu. Wo ka dencɛ sɔrɔn a yɛ, mɛn tɔɔ ko Finehasi. Nba, mɔɔ mɛnilu a ra madan ɲin, woilu ye Lebi bɔnsɔn mɔɔ la denbayala kuntiilu le ri, a bɛɛ ni a la mɔɔilu.26Allabatala kumara Haruna ni Musa woilu le yɛ, ka a fɔ ii yɛ ko ii ye Isirayɛlika labɔ Misiran ikomin kɛlɛden dɛkuru.27Musa ni Haruna le wara ka a fɔ Misiran mansa Ferawuna yɛ ko a ye Isirayɛlika bila sa ii ri bɔ a la jamana rɔ.
Alla ka baara mɛn di Musa ni Haruna ma
28Nba, Allabatala kumara Musa yɛ Misiran tuma mɛn na,29a ka a fɔ a yɛ ko: «Nde le Allabatala ri. N kɛtɔ fen fen fɔla i yɛ, i ye wa wo fɔ Misiran mansa Ferawuna yɛ.»30Wo tuma, Musa ka Allabatala jabi: «Nde ma kusan kumala. Nfenna Ferawuna ri a tolo malɔ nde la wa?»