Emyambalo y’abadâhwa bakulu
1Banacirhôla emyenda y’akaduku k’omukara, ey’akaduku k’akalinga, ey’akaduku kêru, bàjiramwo emyambalo y’obugashânize y’okurhumikira omu ka-Nyamuzinda, banacijiramwo emyambalo mitagatîfu ya Aroni, nk’oku Nyakasane anali arhegesire Mûsa.Efodi
2Banacijira efodi y’amasholo, akaduku k’omukara, akaduku k’akalinga, akaduku kêru n’ecitâni ciniole.3Batula amasholo gâbà nka hyasi bya lubambà, balukiramwo orhukwêgè, barhulukira omu myenda y’akaduku k’omukara, ey’akaduku k’akalinga, ey’akaduku kêru n’ecitâni ciniole, mukolo gwa muntu mulenga.4Omu kuyigwâsa, àyijirira mishumi ibirhi oku bikwi byâyo byombi.5Omusiho gw’efodi gwàli gugezire enyanya gunalungine nayo, nagwo gwàli gukozirwe kuguma nayo: gwàli gwa masholo, gwa kaduku kêru n’ecitâni ciniole, nk’oku Nyakasane anali arhegesire Mûsa.6Barhendêza amabuye ga onikisi, bàgahira omu lûbarhi lw’amasholo bayandikakwo amazîno ga Bene Israheli nka kula babînja eciziriko.7Banacigahira oku mishumi y’eyo efodi, mpu gabè mabuye ga kukâyibusa Bene Israheli.Enshoho y’oku cifuba
8Bajira enshoho y’oku cifuba, mukolo gwa bulenga, yali ekozirwe kuguma n’efodi, yali ya masholo, ya kaduku k’omukara, ya kaduku ka kalinga, ya kaduku kêru n’ecitâni ciniole.9Yali eyumânîne enyunda zoshi, yanali ngoye, yali ya buli bwa cihimbi c’ikoro na bugali bwa cihimbi c’ikoro.10Bayilukirakwo milongo inni ya rhubuye: oku omulongo murhanzi, kwalukirwa esadoki, etopazi n’esumarado,11oku mulongo gwa kabirhi kwajà enofeki, esafiri n’ealimasi.12Oku mulongo gwa kasharhu bahirakwo enjwijwi, eata n’eamatusta;13oku mulongo gwa kani kwalukirwa ekrizoliti, ehyansinti n’eyaspiri. Orhwo rhubuye rhwàli rhuhangirwe omu mpogo z’amasholo.14Orhwo rhubuye rhwàli rhuyandikekwo amazîno ga Bene Israheli: ikumi n’abirhi gali matâke nka biziriko, ngasi ibuye n’izîno, nk’oku emilala yâbo ikumi n’ibiri yanali.15Enshoho y’oku cifuba bàyijirira emigufu y’amasholo gônene, miluke nka migozi.16Bajira mburungusè ibirhi za masholo na rhugondo rhwa masholo oku bikwi byoshi oku binali bibirhi;17bàgeza erya migufu ibirhi y’amasholo muli rhulya rhogondo rhubirhi, oku bushwinjiro bw’enshoho y’oku cifuba.18Nabyo ebikwi by’orhwo rhwombi, babishwekera kuli zirya mburungusè zombi, oku mishumi y’efodi, embere zâyo.19Bajira rhugondo rhubirhi rhwa masholo, barhuhira omu bushwinjiro bw’enshoho y’oku cifuba oku muhiro gw’endalâla, olunda lw’efodi.20Bajira rhugondo rhubirhi rhwa masholo, baruhira oku bushwinjiro bw’enshoho y’oku cifuba, oku muhiro gw’endalâla, olunda lw’efodi, olunda lw’embere, hôfi n’obugonyero bwâyo, enyanya ly’omushumi gw’efodi!21Bashwêkera empogo z’enshoho y’oku cifuba oku mpogo z’efodi, n’ehigozi hy’akaduku k’omukara, lyo ebêra enyanya ly’omushumi gw’efodi, lyo n’enshoho y’oku cifuba esêra oku efodi, kwo Nyakasane anali arhegesire Mûsa.Ecishûli
22Okuhandi banacijira ecishûli c’omwenda gw’akaduku k’omukara coshi coshi, bushanja bwa mulenga w’okuluka.23Aha kâgarhî k’eco cishûli, hàli omurhule gushwinjirwe nka murhule gwa lûba, lyo cirhagibereka.24Oku muhiro gw’omu ndalâlà kwajà emishemberere y’akaduku k’omukara, akaduku k’akalinga, akaduku kêru n’ecitâni ciniole.25Bajira orhudende rhw’amasholo garhalimwo mvange, barhuhangira muli erya mishemberere, oku muhiro gw’ecishûli, omu marhambi mwoshi, omu kâgarhî k’emishemberere: hidende higuma na mushemberere muguma,26hidende higuma na mushemberere muguma oku muhiro gw’ecishûli n’omu marhambi mwoshi, lyo bikwanana obugashânize, nk’oku Nyakasane anali arhegesire Mûsa.Emyambalo y’obudâhwa
27Balukira Aroni n’abagala orhwanzo rhw’ecitâni, mukolo gwa mulenga wa kuluka.28Bajira n’ensirha z’ecitâni, ensirha z’ecidesi, n’orhubutura rhw’ecitâni ciniole.29Bajira emikaba y’ecitâni ciniole, ya kaduku ka mukara, ya kaduku ka kalinga n’ey’akaduku kêru, mukolo gwa muntu mulenga, nk’oku Nyakasane àrhegekaga Mûsa.30Bàtula ehy’olubambà hy’amasholo gône gône, lyo ishungwè litagatîfu, banabînjakwo nka kula babinja akahamikizo, mpu: «Mutagatîfu wa Nyakasane!»31Bahishwekera emalanga g’ensirha n’ehigozi hy’akaduku k’omukara, nk’oku Nyakasane anali arhegesire Mûsa.32Yanacihwa ntyo emikolo y’Endâro, y’Ecihando c’Ihano. Bene Israheli banacijira byoshi nka kulya Nyakasane anarhegekaga Mûsa. Ntyo ko bajizire!Mûsa arhonya emikolo yàjizirwe
33Bayêreka Mûsa Endâro n’Ecihando c’Ihano n’orhulugu rhwamwo rhwoshi, bàmuyêreka engondôzo z’okuyigwasa, empaho, emirhamba, emitungo n’amarhwèrhwè gâyo;34bàmuyêreka omufûniko gw’empù z’enganda-buzi z’akaduku, omufûniko gw’empù z’ebigoho n’omwenda gw’omu ndalâlà,35bàmuyêreka omucîmba gw’Endagâno, emirhamba yagwo n’omufûniko,36bàmuyêreka ameza n’orhulugu rhwâgwo rhwoshi n’emigati y’oburherekêre.37Bàmuyêreka akamole k’amasholo garhalimwo mvange n’orhumole, n’orhulugu rhwâko rhwoshi haguma n’amavurha g’okutwana orhumole.38Bàmuyêreka oluhêrero lw’amasholo, amavurha gw’okucîshîga, enshangi y’omugavu n’omwenda gw’aha muhango gw’Ecihando.39Oluhêrero lw’omulinga n’akasirha kâlwo k’omulinga, emirhamba yakwo n’orhulugu rhwâlwo rhwoshi, omukenzi n’amakondo gâgwo; emyenda y’omu bululi, emitûngo yamwo n’emifûnikiro zâyo,40emyenda y’aha muhango gw’obululi, emigozi yayo, enkwîra zamwo n’ebirugu byoshi by’omukolo gw’omu Cihando c’Ihano.41Bàmuyêreka emyambalo y’obugashânize y’okukolera omu ka-Nyamuzinda, emyambalo mitagatîfu y’omudâhwa Aròni n’emyambalo abagala bakaziyambala nka bajira omukolo gw’obudâhwa.42Ogwo mukolo gwoshi Bene Israheli bagujira nk’oku Nyakasane anali arhegesire Mûsa.43Mûsa asîngiriza ogwo mukolo gwoshi, abona oku bajizire kulya Nyakasane anarhegekaga kwo na nênè. Okuhandi Mûsa anacibagisha!