1“उन्ख पवित्र करन ख जो काम तोख उन को संग करनो हय कि हि मोरो लायी याजक को काम करेंन, ऊ यो हय: एक निर्दोष बछड़ा अऊर दोय निर्दोष मेंढी लेजो,2अऊर अखमीरी रोटी, अऊर तेल सी सन्यो हुयो मैदा को अखमीरी सुवारी, अऊर तेल सी चुपड़ी हुयी अखमीरी पपड़ियां भी लेजो। यो सब गहूं को मैदा को बनायजो।3इन्को एक टोकनी म रख क उच टोकनी ख ओको बछड़ा अऊर उन दोयी मेंढी सहित जवर लायजो।4तब हारून अऊर ओको टुरावों ख मिलाप वालो तम्बू को फाटक को जवर सी लिजाय क पानी सी धुलायजो।5तब उन कपड़ा ख ले क हारून ख अंगरखा अऊर एपोद को पोशाक पहिनाजो, अऊर एपोद अऊर चपरास बान्धनो, अऊर एपोद को बनायो हुयो पट्टा भी बांधजो;6अऊर ओको मुंड पर फेटा रखजो, अऊर फेटा पर पवित्र मुकुट ख रखजो।7तब पवित्र तेल ले क ओको मुंड पर डाल क ओको अभिषेक करजो।8तब ओको टुरावों ख जवर लिजाय क उन्को अंगरखा पहिनाजो,9अऊर उन्को मतलब हारून अऊर ओको टुरावों को कमर बान्धजो अऊर उन्को मुंड पर टोपियां रखजो; जेकोसी याजक को पद पर हमेशा उन्को अधिकार रहेंन। यो तरह हारून अऊर ओको टुरावों को संस्कार करजो।10“तब बछड़ा ख परमेश्वर की उपस्थिति को तम्बू को आगु ले आजो। हारून अऊर ओको टुरा, बछड़ा की मुंड पर अपनो अपनो हाथ रखे,11तब ऊ बछड़ा ख परमेश्वर को आगु मिलाप वालो तम्बू की फाटक पर बलिदान करजो,12अऊर बछड़ा को खून म सी कुछ ले क अपनो बोट सी वेदी को सींगो पर लगाजो, अऊर शेष सब खून ख वेदी को पाये पर कुड़ाय देजो,13अऊर जेको चरबी सी अंतड़ियां झकी रह्य हंय, अऊर जो झिल्ली कलेजे को ऊपर होवय हय, उन्को अऊर दोयी गुर्दो ख उन्को ऊपर चरबी सहित लेकर सब ख वेदी पर जलाजो।14पर बछड़ा को मांस, अऊर खाल, अऊर गोबर, छावनी सी बाहेर आगी म जलाय देजो; कहालीकि यो पापबलि होयेंन।15“फिर एक मेंढा लेजो, अऊर हारून अऊर ओको टुरा ओकी मुंड पर अपनो अपनो हाथ रखे,16तब उच मेंढी ख बलि करजो, अऊर ओको खून ले क वेदी पर चारयी तरफ छिड़क देजो।17तब ऊ मेंढा ख तुकड़ा तुकड़ा काटजो, अऊर ओकी अंतड़ियां अऊर पाय ख धोय क ओको तुकड़ा मुंड को संग म रखजो,18अऊर पूरो मेंढा ख वेदी पर जलाजो; ऊ त परमेश्वर लायी होमबलि होयेंन; ऊ सुखदायक सुगन्ध अऊर परमेश्वर लायी हवन होयेंन।19“फिर दूसरो मेंढा ख लेजो; अऊर हारून अऊर ओको टुरा ओकी मुंड पर अपनो अपनो हाथ रखे,20तब ऊ मेंढा ख बलि करजो, अऊर ओको खून म सी कुछ ले क हारून अऊर ओको टुरावों को दायो कान को कोना पर, अऊर उन्को दायो हाथ अऊर दायो पाय को अंगुठा पर लगाजो, अऊर खून ख वेदी पर चारयी तरफ छिड़क देजो।21फिर वेदी पर को खून अऊर अभिषेक को तेल, इन्को दोयी म सी थोड़ो थोड़ो ले क हारून अऊर ओको कपड़ा पर, अऊर ओको टुरावों अऊर उन्को कपड़ा पर भी छिड़क देजो; तब ऊ अपनो कपड़ा सहित, अऊर ओको टुरा भी अपनो अपनो कपड़ा सहित पवित्र होय जायेंन।22तय उच मेंढी को चरबी लेजो, अऊर मोटी पूछ को अऊर जेको चरबी सी अतड़ियां झकी रह्य हंय ओको, अऊर कलेजा पर की झिल्ली ख, अऊर चरबी सहित दोयी गुर्दां ख, अऊर दायो जांघ लेजो, कहालीकि यो पुरोहित को अभिषेक बलि को मेंढा हय।23अऊर अखमीरी रोटी की टोकनी जो परमेश्वर को आगु रखी होना ओख म सी भी एक रोटी, अऊर तेल सी सान्यो हुयो मैदा को एक सुवारी, अऊर एक पपड़ी लेजो,24इन सब ख हारून अऊर ओको टुरावों को हाथों म रख क हिलाये जान की भेंट ठहराय क् परमेश्वर को आगु हिलायो जाये।25तब उन चीजो ख उन्को हाथों सी ले क होमबलि की वेदी पर जलाय देजो, जेकोसी ऊ परमेश्वर को आगु सुखदायक सुगन्ध ठहरे; ऊ परमेश्वर लायी हवन होयेंन।26“फिर हारून को संस्कार को जो मेंढा होना ओकी छाती ख ले क हिलायी जान की भेंट लायी परमेश्वर को आगु लहराजो; अऊर ऊ तोरो भाग ठहरेंन।27हारून अऊर ओको टुरावों को संस्कार को मेंढा होना ओको म सी हिलाये जान वाली भेंट वाली छाती जो हिलायी जायेंन, अऊर उठायी जान की भेंट वाली जांघ जो उठायी जायेंन, इन दोयी ख पवित्र ठहराजो।28अऊर यो हमेशा की विधि की रीति पर इस्राएलियों को तरफ सी हारून अऊर ओको टुरावों को भाग रहेंन, कहालीकि यो उठाये जान की भेंट ठहरी हंय; अऊर यो इस्राएलियों को तरफ सी उन्को मेलबलि म सी परमेश्वर लायी उठाये जान की भेंट होयेंन।29“हारून को जो पवित्र कपड़ा रहेंन ऊ ओको बाद ओको टुरा अऊर नाती ख मिलतो रहे, जेको सी उन्खच दे क उन्को अभिषेक अऊर नियुक्त करयो जायेंन।30ओको टुरावों म सी जो ओको जागा पर याजक होयेंन, ऊ जब पवित्र जागा म सेवा काम करन लायी मिलाप वालो तम्बू म पहले आये, तब उन कपड़ा ख सात दिन तक पहिने रहेंन।31“फिर याजक को अभिषेक-बलि को जो मेंढी होयेंन ओख लेकर ओको मांस कोयी पवित्र जागा म पकाजो;32तब हारून अपनो टुरावों सहित उच मेंढी को मांस अऊर टोकनी की रोटी, दोयी ख मिलाप वालो तम्बू को फाटक पर खाये।33जिन चिजों सी उन्को अभिषेक अऊर उन्ख पवित्र करन लायी प्रायश्चित करयो जायेंन उन्को त हि खाये, पर दूसरो वंश को कोयी उन्ख नहीं खान पाये, कहालीकि हि पवित्र होयेंन।34यदि अभिषेक वालो मांस यां रोटी म सी कुछ सुबेरे तक बच्यो रहेंन, त उच बच्यो हुयो ख आगी म जलाजो, ऊ खायो नहीं जाये; कहालीकि ऊ पवित्र होयेंन।35“मय न तोख जो जो आज्ञा दियो हय; उन सब को अनुसार तय हारून अऊर ओको टुरावों सी करनो; अऊर सात दिन तक उन्को संस्कार विधि करतो रहजो,36मतलब पापबलि को एक बछड़ा प्रायश्चित लायी हर दिन चढ़ाजो। वेदी ख भी प्रायश्चित करन को समय शुद्ध करजो, अऊर ओख पवित्र करन लायी ओको संस्कार करजो।37सात दिन तक वेदी लायी प्रायश्चित कर क् ओख शुद्ध अऊर पवित्र करजो, अऊर वेदी परम पवित्र ठहरेंन; अऊर जो कुछ ओको सी छूय जायेंन ऊ भी पवित्र होय जायेंन।
रोज की भेंट
38“जो तोख वेदी पर हमेशा चढ़ानो होयेंन ऊ यो आय : हर दिन एक एक साल को दोय मेंढी को बच्चा चढ़ाजो।39एक मेंढी को बच्चां ख त सुबेरे को समय, अऊर दूसरो मेंढी को बच्चां ख शाम को समय चढ़ाजो;40अऊर पहिलो मेंढी को बच्चां को संग दोय लिटर को तेल सी उसन्यो हुयो एक किलो मैदा, अऊर बली लायी अंगूर को रस चढ़ाजो।41अऊर दूसरो मेंढी को बच्चां ख शाम को समय चढ़ाजो, अऊर ओको संग सुबेरे की रीति अनुसार अनाज बलि अऊर अर्घ दोयी देजो, जेको सी ऊ सुखदायक सुगन्ध अऊर परमेश्वर लायी हवन ठहरे।42तुम्हरो पीढ़ी सी पीढ़ी म परमेश्वर को आगु मिलाप वालो तम्बू को फाटक पर हमेशा असोच होमबलि होतो रहे; यो ऊ जागा आय जेको म मय तुम लोगों सी येकोलायी मिल्यो करूं कि तोरो सी बाते करू।43मय इस्राएली लोगों सी उतच मिल्यो करूं अऊर ऊ तम्बू मोरो तेज सी पवित्र करयो जायेंन;44अऊर मय मिलाप वालो तम्बू अऊर वेदी ख पवित्र करूं, अऊर हारून अऊर ओको टुरावों ख भी पवित्र करूं कि हि मोरो लायी याजक को काम करेंन।45अऊर मय इस्राएलियों लोगों को बीच निवास करूं, अऊर उन्को परमेश्वर ठहरूं।46तब हि जान लेयेंन कि मय यहोवा उन्को परमेश्वर आय, जो उन्को मिस्र देश सी येकोलायी निकाल ले आयो कि उन्को बीच निवास करूं; मयच उन्को परमेश्वर यहोवा आय।